KIRUOGIK 14 - BUKUIT NE TILIL

Katunisietab Samson

¹ Ak kichortagei Samson kwo Timna, ak kigeer chepto eng’ Timna eng’ tibikab Pilistik.

² Ak kitogos inendet, konyo komwachi kwanda ak kamet, kolenji, Kaageer chepto eng’ Timna eng’ tibikab Pilistik: ara anyun omutwa atun.

³ Yeityo kolenji kwandanyi ak kamennyi, Tos mami chepto eng’ tibikab tupchosieguk, agot eng’ bikyuk tugul, kot iwe kitun ne bo Pilistik che ma kimuratan? Ak kilenji Samson kwandanyi, Omutwa; amu achame kot.

⁴ Ago kima nai kwandanyi ak kamennyi kole ki bo Jehovah ng’olyondonoto; amu kicheng’ei boroindo ne yachine luget Pilistik. Kibou Pilistik Israel eng’ betusiechoto.

⁵ Kichortagei anyun Samson, koboto kwandanyi ak kamennyi, koba Timna, ak kiit mbarenikab sabibuk che bo Timna: ak ogeero, kiborisenjin inendet ng’etundo ne neran.

⁶ Ak kinyonji inendet Tamirmirietab Jehovah eng’ kimnatet, ak kigerer ng’etunyoto, ko u ye imuchi kogerer aruetab ng’oror, ak kima kotinyei kiy eng’ eut; ago ma mwachi kwanda anan ko kamet kit ne kayai.

⁷ Ak kichortagei, kwo kong’alalji kwonyoto; ak kiibaibai Samson kot.

⁸ Ak ye matianit, koweek kwo komut, ak kiwa taban kogeer bortab ng’etunyoto: ak ogeero, kimi segemik kebomboruetab ng’etunyoto, ak kumik.

⁹ Ak kiinem eng’ eunekyik ak kwo koamat, ak kiit ole mi kwandanyi ak kamennyi, ak kiigochi, ak kiam agichek: ago ma mwachi kolenji, kaanemune kumik kebomboruetab ng’etundo.

¹⁰ Ak kichortagei kwandanyi kwo ole mi kwonyoto: ak kiyai Samson igorta eng’ oloto; amu kicham koyaei murenik ko u noto.

¹¹ Ak ye kingogeer inendet komut choronok sosom koteb koboto inendet.

¹² Ak kimwachi Samson ichek kolenji, Ogany amwawok tangochet: ngot omuchi omwawa eng’ betusiek tisab che bo igorta, ak onai kit ne iboru, agonok anyun ngoroik sosom che bo katanitab ngoroik sosom che kiwalawali:

¹³ ago ngot ko momuchi omwawa, ogona anyun okwek ngoroik sosom che bo katanit, ak ngoroik sosom che kiwalwali. Ak kilenji ichek, Mwa tangocheng’ung’, si kegas.

¹⁴ Ak kilenji ichek, Kimong’une amindet amitwogik, Ak kimong’une ne kim anyinyindo. Ak kima imuch kobor tangochonoto eng’ betusiek somok.

¹⁵ Ak eng’ betutab tisab, kolenji ichek kwondab Samson, Igaigai manong’otiondeng’ung’ si kobiit komwawech tangochet, si magibeelin ak gotab kwandang’ung’: kooguurech si ogonech bananda? Ma u noto?

¹⁶ Ak kirir ne bo Samson eng’ tainnyi, kolenji, Iwecha kityo, ak mechama: kiimwachi tangochet lagokab bikyuk, ama imwawa. Ak kilenji inendet, Keero, tom amwachi kwandanyu ak kamennyu, amwaun inye?

¹⁷ Ak kirir eng’ tainnyi betusiek tisab, eng’ betusiechoto bo igortanywa: ak eng’ betut ne bo tisab, komwachi inendet, amu kiim inendet kot: ak kimwachi tangochonoto lagokab bikyik.

¹⁸ Ak kimwachi inendet bikab nganaset eng’ betutab tisab kotom kororokta asista, kolenji, Mi nee ne anyiny kosiir kumiat? Ak nee ne kim kosiir ng’etundo? Ak kilenji ichek, Nda kima obatisie roriandennyu, Ta monai kit ne iboru tangochennyu.

¹⁹ Ak kinyonji inendet Tamirmirietab Jehovah eng’ kimnatet, ak kichortagei kwo Askelon, ak kibar bik sosom che bo bichoto, ak koib barunenikwak ak kiigochi ngoroik che kiwalawali, ichek che kiibor tangochonoto. Ak kilalyo neregekyik, ak kitogosta kwo gotab kwandanyi.

²⁰ Ago kigigoito ne bo Samson kigochi chito ne kicham kobendoti tuwai, ne kiga koyai koek choruennyi.