KIRUOGIK 13 - BUKUIT NE TILIL

Sigetab Samson

¹ Ak kiyai lagokab Israel yaitiet kogeny eng’ taitab Jehovah; ak kiinde Jehovah ichek eutab Pilistik kenyisiek artam.

² Ak kimitei chito age ne bo Sora, ne bo bororietab Danik, ne kigiguure kainennyi Manoa; ak ki son osotiondennyi, ma sigis.

³ Ak kimong’ji malaikaiyatab Jehovah kwonyoto, ak kolenji, Keero, i son, ma isigisie: ago imanachi, ak isich werit.

⁴ Noto anyun, asomin ale iripge, amee divaik anan ko maiyek, ameam kiy age tugul ne muruon:

⁵ amu, keero, imanachi, ak isich werit; ama kicheru sumeekyik; amu egu lakwanato Nasiritindet ne bo Kamuktaindet koboch komi mo: ak kotoi kosor Israel eng’ eunekab Pilistik.

⁶ Kiwa anyun kwonyoto ak komwachi manong’otiondennyi kolenji, Kanyonja chitab Kamuktaindet, ak ka u itondanyi itondab malaikaiyatab Kamuktaindet, ne imuisei mising’; ak ma ateebe ole kabunu, ama mwawa agine kainennyi:

⁷ ago kalenja, Keero, imanachi, ak isich werit; amee divaik anan ko maiyek, anan iam kiy age tugul ne muruon: amu egu lakwanato Nasiritindet ne bo Kamuktaindet koboch komi mo agoi betutab meenyi.

⁸ Kisa anyun Manoa Jehovah kole, Asain, ee Kamuktaindet, ingonyo kogeny chichoto bo Kamuktaindet, ne kogeyogu, konyo ole kimi konetech kit ne kiyachin lakwanato kisichei.

⁹ Ak kigas Kamuktaindet kutitab Manoa; ak kinyonji malaikaiyatab Kamuktaindet ole kimi kwondo kogeny ye kitebyei eng’ mbar: ago kima komi Manoa manong’otiondennyi koboto inendet.

¹⁰ Kichakta anyun kwonyoto, kolabat, ak komwachi manong’otiondennyi, kolenji, Keero, kagomong’ja kogeny, chichi kinyonjina yuginye.

¹¹ Ak king’eet Manoa, ak kosub osotiondennyi, ak koit ole mi chichoto, ak kolenji inendet, Inye chichi king’alaljin kwonyi? Ak kile, A inendet.

¹² Ak kile Manoa, Ingosulda ng’aleguk: tun u nee lakwanato, ak egu nee boisiennyi?

¹³ Ak kilenji malaikaiyatab Jehovah Manoa, ingoripgei kwondo eng’ tugul tugul che kiamwachi.

¹⁴ Mat koam kiy age tugul ne bunu ketitab sabibuk, amechamji koee divaik anan ko maiyek, amat koam kiy age tugul ne muruon; tugul che kiamwachi koribegei choto.

¹⁵ Ak kimwachi Manoa malaikaiyatab Jehovah, kolenji, Asain ale, cham ko ta keranyin, si kobiit kechobun aruetab ng’oror.

¹⁶ Ak kilenji malaikaiyatab Jehovah Manoa, Matiny keranya, ko ma ame amitwogiguk: ak ngot imache ichob kagochinet ne kibeelei, ko nyolu igochi Jehovah. Amu kima nai Manoa kole ki malaikaiyatab Jehovah.

¹⁷ Ak kilenji Manoa malaikaiyatab Jehovah, Kiguurenen nee, si kobiit kegonyitin ye isulda ng’aleguk?

¹⁸ Ak kilenji malaikaiyatab Jehovah, Amu nee si iteebena kainennyu, amu kwong’et kainennyu?

¹⁹ Kiib anyun Manoa aruanato koboto kagochinetab busiek, ak kogoito eng’ koita barak kogochi Jehovah: ak kiyai malaikaiyandanato ne kikwong’e, ak kigeerot Manoa koboto osotiondennyi.

²⁰ Amu ye kitogosta liblibenetab mat kotokyigei kipsengwet kobunei kaptisisiet, kotogostae malaikaiyatab Jehovah liblibenonato bo mat ne bo kaptisisiet: ak kigeerot Manoa koboto osotiondennyi; ak kiing’urukso ichek kot kotiiny ng’ony togochikwak.

²¹ Ago kimata komong’ji malaikaiyatab Jehovah Manoa kogeny, anan ko osotiondennyi. Konai anyun Manoa kole inendet ko ki malaikaiyatab Jehovah.

²² Kolenji Manoa osotiondennyi, Kibegu iman, amu kagegeer Kamuktaindet.

²³ Ago kilenji osotiondennyi, Nda kamachei Jehovah kobarech, ta kama kotaachei kagochinet ne kibeelei ak kagochinetab busiek, eng’ eunekyok, ak ta kama koboruech tuguchu tugul, ak ta kama komwawech tuguk che u chuto.

²⁴ Ak kisich kwonyoto werit, ak koguure kainennyi Samson: ak kieet lakwet, ak kiiberur Jehovah inendet.

²⁵ Ak kitoi Tamirmirietab Jehovah kobois eng’ inendet eng’ Maane-dan, kwenutab Sora ak Estaol.