KIRUOGIK 11 - BUKUIT NE TILIL

Korterteri Jepta Amonik, ak kaarortaennyi

¹ Ki nyiganet ne kim Jepta Gileadindet, ago ki weritab chepkugoniot: ak kisich Gilead Jepta.

² Ak kisikyi Gilead osotiondennyi werik; ak kingo kagoeegitu werikab osotiondennyi, koon Jepta, kwo komanda, kolenji inendet, Mesiche kiy eng’ gotab baba, amu i weritab kwondo age.

³ Komwei anyun Jepta eng’ ole mi tupchosiekyik, ak kwo komeny emetab Tob: ak kiiyumjigei Jepta bik che njaamik, ak kibendat koboto inendet.

⁴ Kingobata betusiek alak, koyai luget lagokab Amon ak Israel.

⁵ Ak kingoyai luget lagokab Amon ak Israel, koba boisiekab Gilead komut Jepta eng’ emetab Tob:

⁶ ak kilenji Jepta, Nyo egu kiptaiyandennyo, si kobiit kebarge ak lagokab Amon.

⁷ Ak kilenji Jepta boisiekab Gilead, Tos kima owecha, ak oona eng’ gotab baba? Amu nee anyun si obwanja ye otinye nyalilda?

⁸ Ak kilenji boisiekab Gilead Jepta, Kagiweekyinge kogeny amu noto, si kobiit kebe tugul koboten, kebarge ak lagokab Amon, si iegu bounindennyo ne ibou bik tugul che menyei Gilead.

⁹ Ak kilenji Jepta boisiekab Gilead, Ngot omuta ga kogeny kebarge ak lagokab Amon, ak kogoito Jehovah ichek eng’ tainnyu, aegu bounindeng’wong’?

¹⁰ Ak kilenji boisiekab Gilead Jepta, Egu Jehovah baoriat eng’ kwenunnyo; kiyae iman ko u ng’olyondeng’ung’.

¹¹ Kiwa Jepta anyun koboto boisiekab Gilead, ak kiyai bik inendet koek bounindet ak kiptaiyat ne bou ichek: ak kimwa Jepta ng’alekyik tugul eng’ taitab Jehovah eng’ Mispa.

¹² Ak kiiyokta Jepta bik koba oldab laitoriatab lagokab Amon, kolenji, Iting’ena nee, kot inyonja iyai luget ak emennyu?

¹³ Ak kiwolji laitoriatab lagokab Amon bik che kiga iyokto Jepta, kolenji, Amu kiib Israel emennyu, ye kitogosu kobunu Misri, koboch Arnon agoi Jabok, kot koit Jordan: weekwa anyun emotinwechoto eng’ kalyet.

¹⁴ Ak kiiyokto Jepta bik kogeny koba oldab laitoriatab lagokab Amon:

¹⁵ ak kimwa bichoto kole, Kamwa Jepta ko u ni kole: Ma ib Israel emetab Moab, anan ko emetab lagokab Amon:

¹⁶ ago ye kitogosu Israel eng’ Misri, ak kobwa kobun ong’atet agoi Nyanjet ne Birir, ak kibwa Kades;

¹⁷ koyokto anyun Israel bik koba oldab laitoriatab Edom, kolenji, Kaigai ichamwa abun emeng’ung’; ago ma cham laitoriatab Edom. Ak kiiyokto bik ko u noto koba oldab laitoriatab Moab: ago ma cham: ak kimeny Israel Kades.

¹⁸ Yeityo kobun ong’atet, ak koyiem emetab Edom, ak emetab Moab, ak kibun kong’asis ne bo emetab Moab, ak koteech Arnon bitonin; ago ma siir kiwotetab Moab, amu Arnon ko ki kiwotetab Moab.

¹⁹ Ak kiiyokto bik Israel koba oldab Sihon laitoriatab Amorik, laitoriatab Hesbon; ak kilenji Israel inendet, Kaigai, ichamwech kebun emeng’ung’, kebe oldanyo.

²⁰ Ago ma iyan Sihon kobun Israel kiwotennyi: ago kiiyum Sihon bikyik tugul ak koteech Jahas, ak kobargei ak Israel.

²¹ Ak kiinde Jehovah, Kamuktaindetab Israel, Sihon ak bikyik tugul eutab Israel, ak kibar ichek: konam anyun Israel emet tugul ne bo Amorik kobunji, icheget che kimenyei emonoto.

²² Ak kinam kiwotet tugul ne bo Amorik kobunji, koboch Arnon agoi Jabok, ak koboch ong’atet agoi Jordan.

²³ Kion anyun Jehovah, Kamuktaindetab Israel, Amorik, koba, eng’ taitab bikyik Israel, imuchi anyun inye inam ichek?

²⁴ Meibe kobunjin noto ne kigonin Kemos cheptaleling’ung’? Noto anyun, age tugul ne onei Jehovah Kamuktaindennyo eng’ tainnyo, kename choto kobunjech.

²⁵ Tos i kaigai inye eng’ kiy age tugul isiir Balak weritab Sipor, laitoriatab Moab? Tos kiborio ak Israel, anan kobargei ak ichek?

²⁶ Ye kita komenyei Israel Hesbon ak nganasokyik, ak eng’ Aroer ak nganasokyik, ak eng’ nganasok tugul che mi tabandab Arnon eng’ kenyisiek bogol somok, kolya si moib eng’ betusiechoto?

²⁷ Tom ayaun ane tengek, ago keyai ne ya iyaiywa luget: Jehovah, ne Kiruogindet, ko ingoek kiruogindet rani eng’ kwenutab lagokab Israel ak lagokab Amon.

²⁸ Ago ma kas laitoriatab lagokab Amon ng’alek che kiiyokyi Jepta inendet.

²⁹ Kinyonji anyun Tamirmirietab Jehovah Jepta, ak kilandae Gilead ak Manase, ak kilandae Mispa ne bo Gilead, ak kong’eete Mispa ne bo Gilead kwo kolanda kot koit ole mi lagokab Amon.

³⁰ Ak kiyai Jepta kaarortaet koarorji Jehovah, kole, Ngot inde iman eunekyuk lagokab Amon,

³¹ ko kiy age tugul ne torokwa eng’ kurgennyu, ye tun aweeksei eng’ kalyet, abunu ole mi lagokab Amon, kobunjin kiyoto Jehovah, si agoito koek kagochinet ne kibeelei.

³² Kilanda anyun Jepta kwo ole mi lagokab Amon, kobargei ak ichek; ak kiinde Jehovah ichek eunekyik.

³³ Ak kibar ichek, kong’eete Aroer kot koit Minit, nganasok tiptem, kot koit Abel- keramim, kibar eng’ baret ne o kot. Kigiterter anyun lagokab Amon eng’ taitab lagokab Israel.

³⁴ Ak kinyo Jepta Mispa ole mi gonnyi, ak ogeero, kimong’ cheptanyi kotorok inendet kotinyei sugutisiek che mengechen kotienonu: ki lakwennyi noto inegei; kima kotinyei werit anan chepto age kobate noto inegei.

³⁵ Ak kingogeer inendet, kobet ngoroikyik, ak kole, Bwa cheptanyu! Kegona anyeratit, ak i age eng’ che inyalila: amu koang’ang’ji Jehovah kutinnyu, ama aweechige let.

³⁶ Ak kilenji lakwanato inendet, Baba, koing’ang’ji kuting’ung’ Jehovah; yaiywa ko u kit ne kobun kuting’ung’; amu kogoyaaktaun Jehovah mugetut eng’ buniguk, eng’ lagokab Amon.

³⁷ Ak kilenji kwandanyi, Ingeyaiywa ng’olyondoni: chamwa atebi anege arawek aeng’, si kobiit awa tulonok barak, arirji bergeinatennyu, ane, ak choronokyuk.

³⁸ Ak kile, Ui. Ak kilenji kwo arawek aeng’: kiwa anyun, inendet ak choronokyik, ak korirji bergeinatennyi eng’ tolonok.

³⁹ Ak kingogesgei arawek aeng’u, koweektagei ole mi kwandanyi, ak kiyachi inendet ko u kaarortaennyi ne kiga koaror: ak kitomo kotuiyo ak muren. Ak kiek biteet eng’ Israel,

⁴⁰ kele, bendi tibikab Israel kenyit age tugul koyaei kabwatet agobo cheptab Jepta Gileadindet eng’ betusiek ang’wan eng’ kenyit age tugul.