KIRUOGIK 10 - BUKUIT NE TILIL

Konyalili Amonik Israel

¹ Ak kingobata betusiekab Abimelek kong’eet Tola weritab Pua, weritab Dodo, chitab Isakar, kosor Israel; ak kimenyei Samir eng’ emetab tulonok ne bo Epraim.

² Ak kiiruokyi Israel kenyisiek tiptem ak somok, ak kime, ak kigitupchi Samir.

³ Ak kingobata betusiekyik, kong’eet Jair, Gileadindet; ak kiiruokyi Israel kenyisiek tiptem ak aeng’.

⁴ Ak kitinyei werik sosom che kilanyei moek sosom che bo sigirok, ak kitinyei nganasok sosom, che kiguure Habot-jair agoi ra, che mi emetab Gilead.

⁵ Ak kime Jair, ak kigitupchi Kamon.

⁶ Ak kiyai lagokab Israel yaitiet kogeny eng’ taitab Jehovah, ak kiot Baalik, ak Astarot, ak kanamonikab Suria, ak kanamonikab Sidon, ak kanamonikab Moab, ak kanamonikab lagokab Amon, ak kanamonikab Pilistik; ak kimeto Jehovah, mata koot inendet.

⁷ Ak kilalyo neregekab Jehovah agobo Israel, ak kialdochi eunekab Pilistik, ak eunekab lagokab Amon.

⁸ Ak kiim ak konyalil lagokab Israel kenyinoto ak kiinyalil lagokab Israel tugul che kimi Jordan bitonin eng’ emetab Amorik, ne mi Gilead, eng’ kenyisiek taman ak sisiit.

⁹ Ak kilandae Jordan lagokab Amon koba kobargei ak Juda, ak Benjamin agichek, ak gotab Epraim; kiginyalil anyun Israel mising’.

¹⁰ Ak kirirji lagokab Israel Jehovah, kolenji, Kigeyaun tengekto, amu kigemete Kamuktaindennyo, ak kigeot Baalik.

¹¹ Ak kimwachi Jehovah lagokab Israel, kolenji, Tos kima asoruok eng’ Misrik, ak eng’ Amorik, ak eng’ lagokab Amon, ak eng’ Pilistik?

¹² Kiinyalilak agichek Sidonik, ak Amalegik, ak Maonik; ak kiorirja, ak kasoruok eng’ eunekwak.

¹³ Ago kiometa, ak oot kanamonik: noto anyun, ma asoruok kogeny.

¹⁴ Oba orirji kanamonik che kiolewen; ingosoruok ichek eng’ betutab nyalildang’wong’.

¹⁵ Ak kilenji lagokab Israel Jehovah, Kigeyai tengekto: yaiywech kit age tugul ne igeere ile nyolu; ago kisain kityo kele isoruech betuni.

¹⁶ Ak kiisto kanamonik che too eng’ kwenunywa, ak koot Jehovah: ak kiarogen sobondanyi amu nyalildab Israel.

¹⁷ Kiiyumgei anyun lagokab Amon, koba koteech Gilead. Ak kiiyumgei lagokab Israel ak koteech Mispa.

¹⁸ Ak kimwachigei bik, bounikab Gilead, kole, Ng’o ne tau kobaregei ak lagokab Amon? Egu inendet ne o eng’ tugul che menyei Gilead.