KIRUOGIK 1 - BUKUIT NE TILIL

Koterterisiei Juda, Simeon ak ortinwek alak

¹ Ak kingobata meetab Josua, koteebe lagokab Israel Jehovah kole, Ng’o ne togostoi korok si kobargei ak Kananik agobo achek?

² Kole Jehovah, Juda ne togostoi: ogeero, kande emonoto eunnyi.

³ Ak kilenji Juda Simeon ng’etab kamet, Ngetogoste tuwai kebe emet ne kigigona, si kobiit kebarge ak Kananik; si tun kebe tuwai agane emeng’ung’. Koba anyun Simeon ak inendet.

⁴ Ak kitogosta Juda; ak kiinde Jehovah eunekwak Kananik ak Perisik: ak kibar ichek eng’ Besek bik elfusiek taman.

⁵ Ak kinyor Adoni-besek eng’ Besek: ak kibargei ak inendet, ak kibar ichek Kananik ak Perisik.

⁶ Ago kimwei Adoni-besek; ak kion inendet, ak kinam, ak kotil morikyik che eechen che bo eunek ak che bo kelyek.

⁷ Ak kimwa Adoni-besek kole, Kiiyum amitwogik eng’ kureretab mesennyu laitorinik tamanwogik tisabu che kiga kitil morikwak che eechen che bo eunek ak che bo kelyek; ko u ye kiayai, ko kayaiywa Kamuktaindet ko u noto. Ak kiimut inendet kwo Jerusalem, ak kimechi oloto.

⁸ Ak kibargei lagokab Juda ak Jerusalem, ak kinam, ak kibare rotwetab chok, ak kobeel nganaset eng’ mat.

⁹ Ak kingobata, kochortagei lagokab Juda koba kobargei ak Kananik che kimenyei emetab tulonok, ak eng’ Murot ne bo Tai, ak eng’ warenget.

¹⁰ Ak kibargei Juda ak Kananik che kimenyei Hebron: (kainetab Hebron eng’ tai ko ki Kiriat-arba:) ak kibar Sesai, ak Ahiman, ak Talmai.

¹¹ Ak kiwa eng’ yoto kwo kobargei ak bik che kimenyei Debir. (Kainetab Debir eng’ tai ko ki Kiriat-seper.)

¹² Ak kimwa Kaleb kole, Inendet ne barei Kiriat-seper ak konam, agochini Aksa cheptanyu kotun.

¹³ Ak kinam Otniel weritab Kenas, ng’etab kamet ne ming’in ne bo Kaleb; ak kiigochi inendet Aksa cheptanyi kotun.

¹⁴ Ak kingonyo ole mi inendet, kogaigai inendet kosom kwandanyi koret: kichorgei anyun eng’ sigiriennyi; ak kiteebe Kaleb inendet kolenji, Imache nee?

¹⁵ Ak kilenji inendet, Kona kaberuret; amu kiindea emet ne bo Murot ne bo Tai, igona kong’ikab beek agichek. Ak kiigochi Kaleb inendet kong’ikab beek che bo meto, ak kong’ikab beek che mi ole rektoot.

¹⁶ Ak kitogosta lagokab Kenindet, kabyugoitab Musa, komanda eng’ nganaset ne bo tironik koboto lagokab Juda koba ong’atetab Juda, ne mi Murot ne bo Tai ne bo Arad; ak kiba komeny ak bichoto.

¹⁷ Ak kiba Juda ak Simeon, ng’etab kamet, koba kobar Kananik che kimenyei Sepat, ak kibar koges. Ak kigiguure kainetab nganasanato Horma.

¹⁸ Ak kinam Juda Gasar koboto kiwotennyi, ak Askelon ak kiwotennyi, ak Ekron koboto kiwotennyi.

¹⁹ Ak kimi Jehovah koboto Juda; ak kion che kimenyei emetab tulonok; kima imuch koon bik che kimenyei atebwet, amu kitinyei karisiekab karik.

²⁰ Ak kiigochi Kaleb Hebron, ko u ye kiga mwa Musa: ak kion eng’ oloto werik somok che bo Anak.

²¹ Ak kima on lagokab Benjamin Jebusik che kimenyei Jerusalem: kimeny Jerusalem Jebusik koboto lagokab Benjamin, agoi ra.

²² Ak kitogosta che bo gotab Josep agichek koba kobar Bet-el: ak kimi Jehovah koboto ichek.

²³ Ak kiiyokto che bo gotab Josep bik koba kosegei Bet-el. (Kainetab nganasanato eng’ tai ko ki Lus.)

²⁴ Ak kigeer segeik chito komong’une nganaset, ak kilenji inendet, Kisomin iboruech ole kibunei kebendi nganaset orit, si tun kerirenen.

²⁵ Kiiborji anyun ole kibunei kebendi nganaset ak kibar nganaset eng’ rotwetab chok; ago kibagakta chichoto koboto gonnyi tugul.

²⁶ Ak kiwa chichoto emetab Hitik, ak koteech nganaset, ak koguure kainetab nganasanato Lus: ne noto kainennyi agoi ra.

²⁷ Ak ma on Manase che kimenyei Bet-sean ak nganasokyik, anan che bo Taanak ak nganasokyik, anan bik che kimenyei Dor ak nganasokyik, anan bik che kimenyei Ibleam ak nganasokyik, anan bik che kimenyei Megido ak nganasokyik: kimach Kananik komeny emonoto.

²⁸ Ak kingo kagogimegitu Israel, konde Kananik koyai boisionikab otwoknatet, ama on kogestagei.

²⁹ Ak ma on Epraim agine Kananik che kimenyei Geser; kimeny Kananik kwenunywa eng’ Geser.

³⁰ Ma on agine Sebulun bik che kimenyei Kitron, anan bik che kimenyei Naalol; kimeny Kananik kwenunywa, ak kiek che yaei boisietab otwoknatet.

³¹ Ma on Aser agine bik che kimenyei Ako, anan bik che kimenyei Sidon, anan che bo Alab, anan che bo Aksib, anan che bo Helba, anan che bo Apik, anan che bo Rehob:

³² ago kimeny Aserik kwenutab Kananik, bik che kimenyei emonoto: amu kima on.

³³ Ma on agine Naptali bik che kimenyei Bet-semes, anan bik che kimenyei Bet-anat; ago kimeny kwenutab Kananik, che ki bo emonoto: ago kiek che yaei boisietab otwoknatet, bik che kimenyei Bet-semes ak che bo Bet-anat.

³⁴ Ak kitoorta Amorik lagokab Dan koba emetab tulonok: amu kima kochamjin ichek korek kobwa atebwet:

³⁵ ak kimach Amorik komeny tulwetab Heres, eng’ Aijalon, ak eng’ Saalbim: ago kiiterteris eutab gotab Josep kot koek bichoto che yaei boisietab otwoknatet.

³⁶ Ak kiboch kiwotetab Amorik ole kitogoste kebendi Akrabim, koboch ruandet, ak kotogosta.