KALEWANAIK 5 - BUKUIT NE TILIL

Iteechin kwanda werikyik si korib borwekwak

¹ Werinnyu, kas ng’omnatennyu; Epchi it naennyu:

² Si kobiit irib ruchinet, Si korib kuting’ung’ naet.

³ Amu saune kumiat kutitab chepkugoniot, Ak tangusen ng’alekyik kosiir mwaita:

⁴ Ago ng’wan kagesunennyi ko u ng’wonet, Ng’atib ko u rotwetab chok ne ng’atiben komoswek tuwai.

⁵ Chorjingei kelyekyik meet; Namegei kakwautikyik ak oldab che kigobek;

⁶ Kot ko manyoru oret ne litit ne bo sobondo: Ma tononiotin ortinwekyik, ama naei.

⁷ Ogasa anyun werju, Amoistoege ng’alek che amwae.

⁸ Iste oreng’ung’ kolooit eng’ korgonoto, Amerikyi kurgetab gonnyi:

⁹ Si megochi teegistang’ung’ bik alak; Ak igochi kenyisieguk bik che kolgol:

¹⁰ Si manyor toek kimnateng’ung’; Si matebe boisioniguk che kimen gotab kipsagarindet;

¹¹ Si irir let, Ye kang’emak banyeguk ak bortang’ung’,

¹² Ak imwa ile, Tia weget ne kiawech konetisiet, Ak saset ne kisas muguleldanyu kateunet!

¹³ Ama agas it konetikyuk, Amaepchi it bik che kiineta.

¹⁴ Kiga arikyi yaitiet tugul Eng’ kwenutab tuiyet ak kayumetab ge.

¹⁵ Ee beek che mi tereng’ung’, Ak iee beek che rootei, eng’ keringeng’ung’.

¹⁶ Tos kanyol koseergei kondametusieguk che bo beek eng’ olo tugul, Ak ainosiekab beek eng’ ortinwek?

¹⁷ Ingobunjin inyege, Amat kobunji toek che mi koboten.

¹⁸ Ingoek ne iberurot kondametung’ung’ ne bo beek; Ak ibaibaitu eng’ osotiotab ming’inoteng’ung’.

¹⁹ Ko u kenyelet ne kotoy ak sitwet ne kotoy, ne iboiboi bich, Ingoyamin kinaikyik kotugul; Ak ibaibaitune chamnyennyi kotugul.

²⁰ Amu nee werinnyu, si ibaibaege chepkugoniot, Ak isuub tegetab chepkugoniot?

²¹ Amu keerei Jehovah ortinwekab chito, Ak koribei ortinwek tugul che bo chichoto.

²² Namei kiptengekyot yaitwogikyik, Ak kerate inendet boroonikab tengektanyi.

²³ Meei ama tinyei konetisiet; Ak betei amu oindab berberindanyi.