KALEWANAIK 30 - BUKUIT NE TILIL

Ng’alek alak agobo sobet

¹ Ng’alekab Agur weritab Jake; maoinatet. Kilenji chito Itiel, ee Itiel ak Ukal:

² A u tiony iman asiir chi tugul, Amatinyei kaguiyet ne bo chi:

³ Ak tom anetge ng’omnatet, Amanai Inendet ne Tilil.

⁴ Ng’o ne kitogosta kipsengwet, ak kochorgei? Ng’o ne kigoyum usonet eng’ eunekyik? Ng’o ne kigoratyi beek ngoriennyi? Ng’o ne kiigimit tabanwek tugul che bo ng’ony? Kiguure nee, kiguure nee werinnyi, ngot ingen?

⁵ Tilil ng’olyotab age tugul ne bo Kamuktaindet: Inendet ko long’etab ichek che imang’u inendet.

⁶ Ametesyi ng’olyo ng’alekyik, Si magerin kong’, ak iegu kiplembechwa.

⁷ Kasomin tuguk aeng’; Amat ietena kotom amee:

⁸ Iste kolooegitu eng’ ane, tangoita ak lembechek: Amegona bananda anan magornatosiek; Baena amitwogik che yama:

⁹ Si mabiye ak aesien, ak ale, Ng’o Jehovah? Anan si maegu kibanania, ak achorse, Si mamwa kainetab Kamuktaindennyu eng’ tangoi.

¹⁰ Ametaam otwogindet eng’ taitab kiptaiyandennyi, Si machubin, ak konamin ng’ogisto.

¹¹ Mi ibinda ne chubei kwanisiekwak, Amaiberuri kametisiekwak.

¹² Mitei ibinda ne iitigei kole tilil, Ago tom kiun eng’ simdanywa.

¹³ Mitei ibinda, Ee, mi katororetab ge ne tia eng’ konyekwak! Sutotin irirenikab konyekwak.

¹⁴ Mitei ibinda che u kelekwak rotokab chok, ak ko u kelekwak che bo kipkermet, rotok, Si koame kibananok kogesgei eng’ ng’ony, ak koges che matinyei kiy, eng’ bik.

¹⁵ Tinyei binyinyet arek aeng’, che len, Konech, konech. Mi tuguk somogu che magoi biyo, Ee, mitei tuguk ang’wanu che mamwaei kole, Kayamech:

¹⁶ Choto ko kererit, ak ne son; Emet ne mabiyonyi beek; Ak mat ne mamwaei kole, Kagoyama.

¹⁷ Kondab chito ne chotei kwandanyi, Ama chamei kogas it kamet, Kobalu chepkuginik che bo atebwet, kong’ato, Ak koam arekab kipsichinik.

¹⁸ Mitei tuguk somogu che bo kwong’et ne o eng’ ane, Ee, mi ang’wanu che mangen:

¹⁹ Ole tirirendoi kipsichit eng’ soet: Ole wetitoi erenet eng’ ruandet; Ole wetitoi melit eng’ nyanjet; Ak ole teptoi mureno ak chepto.

²⁰ U ni atebetab kwondo ne tinyei ibetab ge; Amisiei ak kouus kutit, Ak komwa kole, Ma ayai kiy ne ya.

²¹ Botani ng’ony agobo tuguk somok, Ee, tuguk ang’wan che maimuchi komuitochi:

²² Choto ko chu: otwogindet ne kaek laitoriat; Ak chito ne abusat ye kagobiyo;

²³ Ak kwondo ne kiwechei ye kagitun; Ak chepto ne otwogindet ne tun bunjin tugukab kwondo ne bou inendet.

²⁴ Mitei tuguk ang’wanu ng’ony che mengechen, Ago ng’omen mising’:

²⁵ Tiong’ik che ma kimen birechik, Ago iyumjingei amitwogikwak eng’ kemei;

²⁶ Tiong’ik che nyerotin kenerok, Ago teechei gorikwak eng’ ruandosiek;

²⁷ Matinyei laitoriat chereng’enyinik, Ago iboktoi tugul eng’ kweanaik;

²⁸ Namisie cheringisiet eunekyik, Ago mi gorikab laitorinik.

²⁹ Mitei tuguk somogu che bendoti komie eng’ bandanywa, Ee, ang’wan che bendoti komie:

³⁰ Choto ko chu: ng’etundo, ne kim kosiir tiong’ik tugul; Ama mwee tiony age tugul;

³¹ Seset ne chepcheb; ak kwesta agine; Ak laitoriat ne magirindoi chi.

³² Ngot ko kaitororge eng’ berberindo, Anan ngot ko kaibwat yaitio, Iger kuting’ung’.

³³ Amu nyonei mwaita ye kisach chego, Bwanei korotik ngiiny serut: Ko u noto ibu neregek che kaging’eet boriet.