KALEWANAIK 3 - BUKUIT NE TILIL

Kasetab it ne kigase it Jehovah ak mekekto ne biitune noto

¹ Werinnyu, ameutie ng’atutiennyu; Ago ingorib muguleldang’ung’ ng’atutikyuk:

² Amu tesun choto chang’indab betusiek, Ak kenyisiekab sobet, ak kalyet.

³ Amecham koistoenengei rirenet ak iman: Ratyi kaating’ung’; Sirji muguleldang’ung’;

⁴ Si inyoru anyun chamet ak kaguiyet ne mie Eng’ taitab Kamuktaindet ak bik.

⁵ Imang’u Jehovah eng’ muguleldang’ung’ tugul, Ametiiege naeng’ung’:

⁶ Ng’any inendet eng’ ortinweguk tugul, Si kolitit ortinweguk.

⁷ Amendege inyege ile i ng’om; Iywei Jehovah, ak iistoege yaitio:

⁸ Egu chametab ge ne bo mugung’ung’, Ak koek mwanik eng’ koweguk.

⁹ Konyite Jehovah tuguguk, Ak eng’ tongoanikab rurateng’ung’ tugul:

¹⁰ Si konyi chogeniguk eng’ aiyebindo, Ak kong’irtagei divaik che leelach eng’ ole ituisie.

¹¹ Werinnyu, amesas kotigonetab Jehovah; Ameng’et eng’ kateunennyi:

¹² Amu iteechin Jehovah age tugul ne chamei; Ko u ye iteechin kwanda werinnyi ne boiboitune.

¹³ Baibai chito ne nyoru ng’omnatet, Ak chito ne nyoru naet.

¹⁴ Amu siirei chemung’arainatet ne bo ng’omnatet ne bo feda, Ak siirei keljinet ne kenyorune noto tahabu che kororon.

¹⁵ Bo kamanutiet ne o inendet kosiir koek che kiguure peninim: Ak tuguk tugul che imache ko mami che kiroge ng’omnatet.

¹⁶ Mi eunnyi ne bo tai chang’indab betusiek; Komi eunnyi ne bo katam magornatosiek ak teegisto.

¹⁷ Bo kagasetab ge ortinwekyik, Ak kalyet ortinwekyik tugul.

¹⁸ Ketitab sobondo inendet eng’ ichek che namei: Ak baibai age tugul ne namegei ak inendet.

¹⁹ Kilum Jehovah ng’ony eng’ ng’omnatet; Kiigimit kipsengwetisiek eng’ naet.

²⁰ Kipcheak rirosiek eng’ naennyi. Ak isau bolik rewot.

²¹ Werinnyu, amengoistoenengei choto eng’ taing’ung’; Isub ng’omnatet ne igesunotgei ak ruchinet:

²² Egu anyun choto sobondo eng’ muguleldang’ung’, Ak koek mieindo eng’ kaating’ung’.

²³ Iwendote anyun oreng’ung’ eng’ chametab ge, Ama riichin kiy.

²⁴ Ameiywei kiy ye irue: Ee, irue, ak koanyinyit ruondang’ung’.

²⁵ Amearogeni eng’ ne chein, Anan eng’ ng’emisietab kiptengeginik, ye kait:

²⁶ Amu egu Jehovah kamang’uneng’ung’, Ak koribei inendet keldang’ung’ ama kinam.

²⁷ Ameete mieindo che nyoljin kigochi, Ye itinye kimnatet ne iyae.

²⁸ Amelenji chitab kokweng’ung’, Ui, si iweege, Si agonin mutai; Ye itinye kit ne machei.

²⁹ Amechopchi yaitiet chitab kokweng’ung’, Amu menyei ole negitenen eng’ chametab ge.

³⁰ Amobelge ak chi buch, Ngot ko ma yaun kiy ne ya.

³¹ Amat koamjin ng’etkong’ chito ne korom, Amelewen age tugul eng’ ortinwekyik.

³² Amu wechei Jehovah ngeleliot: Ago mi ung’otikyik ak bikab iman.

³³ Mi chubetab Jehovah gotab kiptengekyot; Ago iberuri meng’otetab bik che bo iman.

³⁴ Chotei inendet iman chotik, Ago igochin mieindo che iming’ingei.

³⁵ Bunjin torornatet bik che ng’omen; Ago egu tewernatet etunatetab che berber.