KALEWANAIK 2 - BUKUIT NE TILIL

Ibu ng’omnatet chametab ge ak mieindab sobet.

¹ Werinnyu, ngitaach ng’alekyuk, Ak igonorjige ng’atutikyuk;

² Kot iepchi it ng’omnatet, Ak itokyi muguleldang’ung’ kaguiyet;

³ Ee, ngot iguur naet, Ak iwaach agobo kaguiyet;

⁴ Ngot icheng’ inendet ko u ye icheng’e feda, Ak icheng’ ko u ye icheng’e konoraik che ung’otin;

⁵ Iguiye anyun kaiyweisiet ne kiywei Jehovah, Ak inyoru inai Kamuktaindet.

⁶ Amu igoitoi Jehovah ng’omnatet: Mong’une kutinnyi naet ak kaguiyet:

⁷ Konorjin che bo iman ng’omnatet ne igesunotgei, Inendet long’etab ichek che bendote imanda;

⁸ Si kobiit korib ortinwekab kiruoget, Ak koribei ortinwekab bikyik che tililen.

⁹ Iguiye anyun imanda ak kiruoget, Ak ne nyolu, ak oret age tugul ne mie.

¹⁰ Amu chutei ng’omnatet muguleldang’ung’, Ak kobaibai naet sobondang’ung’;

¹¹ Ribin ruchinet, Ribin kaguiyet:

¹² Si kosorun eng’ oretab chito ne ya, Ak eng’ bik che mwaei tuguk che imaasotin;

¹³ Che laaktoi ortinwekab lititindo, Kobendate ortinwekab mesundeito:

¹⁴ Che boiboitu koyai yaitiet, Ak koboiboitune mastaetab bik che yaachen;

¹⁵ Che kunuren ortinwekwak, Ak komaasotin eng’ ortinwekwak:

¹⁶ Si kosorun eng’ chepkugoniot, Ee, kwondo ne chamwai kut;

¹⁷ Ne metoi choruet ne kinerjindos, Ak koutie kayomisetab Kamuktaindennyi:

¹⁸ Chorjingei gonnyi meet, Ak bendi ortinwekyik oldab che kigobek:

¹⁹ Maweeksei age tugul ne wendi oldanyi, Ama itei ole mi ortinwekab sobondo:

²⁰ Si kobiit iwendote ortinwekab bik che miach, Ak isub ortinwekab bik che bo iman.

²¹ Amu menyei emet bik che bo iman. Ak ng’etune oloto che igesunotgei.

²² Ago kiistoi bik che yaachen eng’ emet, Ak kitutu eng’ emet che yaei kaberberisiet.