KALEWANAIK 17 - BUKUIT NE TILIL

¹ Kaigai kererutiet ne yaamat koboto kamuung’et, Kosiir got ne nyiitat igorta ak komi boriet.

² Bou otwogindet ne boisie ng’omnatet, werit ne ibu kalilanet, Ak nyoru borotet koboto tupchosiek.

³ Bo teret feda che kitilili, ak bo mat ne o tahabu: Ago Jehovah ne tiemei mugulelwek.

⁴ Epchin it chito ne yamei yaitiet, kutuswekab kiptengeginik; Epchin it kiplembechwet ng’elyepta ne ng’alsei.

⁵ Age tugul ne chotei kibananiat kogerei kong’ Yaindennyi: Ama kimetoi ama kibir, inendet ne boiboitu ko kanyor alage nyalilda.

⁶ Chepkuletab boisiek mochogoronikwak; Ak torornatetab lagok kwanisiekwak.

⁷ Manyoljin ng’alek che kororon abusanet: Kotam nee anyun kutit ne mwaei lembech, eng’ bounindet.

⁸ U koita ne bo kamanutiet ne o, kitab kagaigaet, eng’ taitab inendet ne tinyei: Borei eng’ ui tugul ole tokyingei.

⁹ Cheng’ei chamnyet inendet ne tuchei bistoet: Ago ibestos choronok che eechen, inendet ne iboti ng’alek.

¹⁰ Chutei keretab kong’ inendet ne tinyei kaguiyet Kosiir birutik bogol eng’ ne berber.

¹¹ Cheng’ei chito ne ya bistoet kityo; Noto anyun kiyokyin inendet chito ne kolgol.

¹² Kaigai kotuiyo ak chi tiondo ne u keerit ne kagirebe arekyik, Kosiir ne berber eng’ berberindanyi.

¹³ Age tugul ne yaaktoi yaitiet eng’ ne mie, Ko maistoegei yaitiet gonnyi.

¹⁴ U taunetab boriet ye kiyatei beek; Omete anyun boriet kotom kobiit bolatet.

¹⁵ Inendet ne iityin imanda kiptengekyot, ak inendet ne igikyin chitab iman, Choto tuwai ko tuguk che wechei Jehovah.

¹⁶ Lyon anyun si kotinyei ne berber kit ne ale ng’omnatet, Ngot ko matinyei naet?

¹⁷ Tinyei choruet chamnyet kotugul, Ak kisichei ne tupcho agobo nyalilda.

¹⁸ Namegei eunek chito ne matinyei naet, ak chito age koyostos, Si koek tononjinindet eng’ taitab chitab kokwennyi.

¹⁹ Chamei bistoet ne chamei boriet: Ak inendet ne itorori kurgennyi kocheng’ei ng’emisiet.

²⁰ Manyoru kiy ne mie inendet ne imaasat muguleldo: Ak ibutyin yaitiet ne tinyei ng’elyepta ne imaasat.

²¹ Inendet ne sichei ne berber konyoru arogenet: Ak matinyei boiboiyet kwandab ne abusat.

²² Kerichek che miach muguleldo ne igasegei: Ago iyaami kowek tamirmiriet ne katanui.

²³ Inemune kiptengekyot tegennyi kitab kagaigaet, Si komaas ortinwekab kiruoget.

²⁴ Mi ng’omnatet taitab inendet ne tinyei naet: Ago mi konyekab ne berber tabanwekab ng’ony.

²⁵ Werit ne berber ko arogenet eng’ kwandanyi, Ak ng’wanindo eng’ inendet ne kisichei.

²⁶ Ma mie kogeny kebir ne bo iman, Anan kebir che toogunotin agobo imandanywa.

²⁷ Tinyei naet ne maiseeri ng’alekyik: Ak tinyei kaguiyet inendet ne tinyei tamirmiriet ne bo muitaet.

²⁸ Agot ne berber, ye sisei, kiiti kele ng’om: Ye ker kutinnyi, kiit kele ng’om.