KALEWANAIK 1 - BUKUIT NE TILIL

Toretet ne bunu kalewenaichuto

¹ Kalewenaikab Solomon weritab Daudi, laitoriatab Israel:

² Kenae ng’omnatet ak konetisiet; Kiguiyo ng’alekab naet;

³ Ketaach konetisietab ng’omnatet, Eng’ imanda, ak kiruoget, ak ne nyolu;

⁴ Kigochi utatiet che berberen, Kogochi muren naet ak ruchinet:

⁵ Si kobiit kogas chito ne ng’om, ak kotesak eng’ kanetetab ge; Ak si kobiit konyor kiruogutik che bo iman chito ne tinyei kaguiyet;

⁶ Koguiyo kalewenet, ak kaweekset; Koguiyo ng’alekab bik che ng’omen ak ng’alekwak che ung’otin.

⁷ Taunetab naet ko kiywei Jehovah: Ago sasei che berber ng’omnatet ak konetisiet.

⁸ Werinnyu, epchi it konetisietab kwandang’ung’, Amemete ng’atutietab komet:

⁹ Amu egu choto narietab mieindo eng’ meting’ung’, Ak koek sirimwek che mi kaating’ung’.

¹⁰ Werinnyu, ngogaigain kiptengeginik, Ko mecham.

¹¹ Ngo mwa kole, Nyo kebe tugul, Ongeribis ketumde korotik, Ongeung’ge kesapchi che matinyei lelut, agot ngo mating’enech ng’olyo;

¹² Ongelugui kosoptos ko u oldab che kigobek, Kelugui kochamegei, ko u che chorjingei keringet;

¹³ Kinyoru tuguk tugul che bo kamanutiet ne o, Kinyiiti gorikyok barunenik;

¹⁴ Ongenamge; Si keyamde tugukyok tugul:

¹⁵ Werinnyu, amobe oret agenge koboto ichek; Iste keldang’ung’ eng’ orenywa:

¹⁶ Amu ruachin kelyekwak yaitiet, Ak choktoi kotumdoi korotik.

¹⁷ Kigiriich mestet buch, Kogeerei taritiet age tugul:

¹⁸ Ribistos chuto kotumdoi korotikwak, Unyegei kosapchin sobonwekwak.

¹⁹ U noto ortinwekab age tugul ne kipkeiyat agobo kelunet; Rebei sobonwekab bik.

Waagatab ng’omtet

²⁰ Waachei mising’ ng’omnatet eng’ oret; Ng’alali eng’ komoswek che baroen;

²¹ Kuursei eng’ ole tuiyechin bik; Eng’ ole kibunei eng’ ormarichok, Mwaitoi ng’alekyik eng’ nganaset:

²² Ochame abusnateng’wong’ kot kotianit, okwek che o abusanik? Ak boiboitune chotik chotisienywa, Ak wechei che berber naet?

²³ Oweege eng’ kateunennyu, Ogeero, arong’wok tamirmiriennyu, Ang’ang’wok ng’alekyuk.

²⁴ Amu kiaguurse, ak kioesie; Kiaiite eunnyu, ak ma iit chi.

²⁵ Ago kiosas kiruogutikyuk tugul, Ama ocham kateunennyu:

²⁶ Arorie eng’ betutab nyalildang’wong’; Achotisiei ye kanyo kaiyweisieng’wong’;

²⁷ Ye kanyo kaiyweisieng’wong’ ko u usonet ne o, Ak ye kanyo nyalildang’wong’ ko u kipchurjuriet; Ye kanyonjok bichiindo ak ng’wanindo.

²⁸ Koguura anyun, ago mawolu; Cheng’a eng’ kagiiletab ge, ago manyorua:

²⁹ Amu kiwech naet, Ama lewen koiywei Jehovah:

³⁰ Ama cham kiruogutikyuk; Kisas kateunaikyuk tugul:

³¹ Amei anyun logoekab ortinwekwak, Ak konyi ichek ng’alekwak che yaachen.

³² Amu barei ichek kachuchugetab ge ne bo abusanik, Ak ng’emei ichek borotetab che berber.

³³ Ago age tugul ne kasa kotebe chametab ge, Ak imuunyi ama iywei yaitiet.