KAITOSYEK 9 - BUKUIT NE TILIL

Ng’atutik agobo ole kiriptoi paska kingobata ne bo tai

¹ Kimwachi Jehovah Musa eng’ ong’atetab Sinai, eng’ arawetab tai ne bo kenyitab aeng’ koboch ngab komong’une emetab Misri, kolenji,

² Ingorib anyun lagokab Israel paska eng’ betut ne kiging’at.

³ Oribe eng’ betunnyi ne kiging’at eng’ betutab taman ak ang’wan eng’ arawani, koskoleny; oribe ko u ng’atutikyik tugul, ak ko u kiruogutikyik tugul.

⁴ Kimwachi anyun Musa lagokab Israel korib paska.

⁵ Ak kirib ichek paska eng’ arawet ne bo tai, eng’ betutab taman ak ang’wan ne bo arawanato, koskoleny, eng’ ong’atetab Sinai: ko u tugul che king’at Jehovah Musa, kiyai anyun lagokab Israel ko u noto.

⁶ Ak kimitei bik alage che ki ng’wonen agobo mustab chito, kot koma imuch korib paska eng’ betunoto; kibwa anyun taitab Musa ak Aron eng’ betunoto,

⁷ ak kilenji bichoton inendet, Ki ng’wonen amu mustab chito: amu nee si keetenech, ama kigoite kagochinetab Jehovah koboto lagokab Israel eng’ betut ne kiging’at?

⁸ Ak kilenji Musa ichek, Ogany, si kobiit agas kit ne ng’atei Jehovah agobo okwek.

⁹ Ak king’alalji Jehovah Musa kolenji,

¹⁰ Mwachi lagokab Israel, ilenji, Ngo ng’wanit chi age tugul eng’ okwek anan eng’ ibinwekwok agobo musto, anan ngo mi rutoito ole loo, komuchi koripchi Jehovah paska.

¹¹ Ingorib ichek paska noto eng’ arawet ne bo aeng’ eng’ betutab taman ak ang’wan koskoleny; amei koboto makatinik che ma kinde mermerek ak ngwek che ng’wonen.

¹² Amat kotuuch kot koeekyi, anan koiri kowet; ribei ichek ko u ng’atutiet komugul ne bo paska.

¹³ Ago chito ne tilil, ne mamitei rutoito, ama rib paska, king’etoi chichoto eng’ bikyik; amu ma igoito kagochinetab Jehovah eng’ betunnyi ne kiging’at, ibei chichoto tengektanyi.

¹⁴ Ak ngo mi kipsagarin ne meng’isiei eng’ kwenung’wong’, ak komachei korib paska ne bo Jehovah; yaei ko u ng’atutietab paska, ak ko u ye kigiaror; egu ng’atutiet agenge, eng’ kipsagarindet, ak eng’ inendet ne bo emonito.

Kiek boldet kandoindenywa si kong’eetei banda

¹⁵ Ak kituch boldet got eng’ betunoto ne kigilumdae goyoto, noto emaitab baornatet; ak kimi baragutab got boldanato koskoleny, ak kigergeit ak mat agoi koeech.

¹⁶ Ki u noto kotugul: kituch boldet, ak kitoogu boldanato ko u mat kemoi.

¹⁷ Ak ye kingetogostae boldet eng’ Emainato, ye kingobata, koba anyun lagokab Israel; ak kiteechei lagokab Israel ole katonone boldet.

¹⁸ Kibendi lagokab Israel eng’ ng’atutietab Jehovah, ak kimeng’isiei eng’ ng’atutietab Jehovah; kimeng’isiei betusiek tugul che kitebe boldet goyoto.

¹⁹ Ak ye kingotebe boldet got betusiek che chang’ korib anyun lagokab Israel ng’atutietab Jehovah, ama bendi.

²⁰ Ak ye kingotebe boldet goyoto betusiek che ng’ering’, komeng’is anyun bichoto ko u ng’atutietab Jehovah, ak kiba ko u ng’atutietab Jehovah.

²¹ Ki betusiek alak kotebe boldet goyoto koskoleny agoi karon, ak kingetogostae boldet karon, koba anyun; anan ko ye kingotebe boldanato bet ak kemoi, ko ye kagitogostae boldanato, koba anyun bichoto.

²² Ak kingotebe boldet baragutab got, ngo betusiek aeng’, anan arawa, anan kenyit, komitei goyoto, kotebi anyun lagokab Israel komeng’is, ama bendi ui: ak ye kingetogostae, koba anyun.

²³ Kimeng’isiei eng’ ng’atutietab Jehovah, ak kibendi eng’ ng’atutietab Jehovah; kiriboti ng’atutietab Jehovah, ko u ye king’at Jehovah, eng’ Musa.