KAITOSYEK 8 - BUKUIT NE TILIL

Ng’atutik agobo ole kinamdoi taisiek

¹ Ak king’alalji Jehovah Musa, kolenji,

² Mwachi Aron, ilenji, Ye inam taisiek, kokweng’so anyun taisiechoto tisabu eng’ taitab keldab tait.

³ Kiyai anyun Aron ko u noto; kiinaam taisiekyik si kobiit kokweng’so eng’ taitab keldab tait, ko u ye king’at Jehovah Musa.

⁴ Ki u ni yaetab keldab tait: ki tahabu che kigitany; koboch kel agoi taptokyik, ko kigitany; ko u itonda ne kiga koborji Jehovah Musa, kiyai anyun inendet keldab tait ko u noto.

Kaanyinyetab Lawik

⁵ Kimwachi anyun Jehovah Musa, kolenji,

⁶ Iste Lawik eng’ kwenutab lagokab Israel, ak ianyiny.

⁷ Ak iyachi ichek ko u ni, si ianyinyi: ise beek che bo kagaigaet, ak ingocher kororik che mi borwekwak tugul, ak ingomwet ngoroikwak, ak koanyinygei.

⁸ Yeityo koget kirgit ne neran, ak kagochinennyi ne bo busiek, busiek che ng’ootin che kigiburukto mwaita, ak igetu kirgit age ne neran kobunji kagochinetab tengekto.

⁹ Ak imut Lawik koba taitab emait ne kituiyechin: ak iyum tuiyet komugul ne bo lagokab Israel.

¹⁰ Ak imut Lawik koba taitab Jehovah; ak kogonoor lagokab Israel eunekwak Lawik.

¹¹ Yeityo kogoito Aron Lawik eng’ taitab Jehovah koek kagochinet ne kiongoi, agobo lagokab Israel, si kobiit koyai boisiet ne bo Jehovah.

¹² Ak kogonoor Lawik eunekwak metowekab kirugichoto; ak igoite inye age kobunji kagochinetab tengekto, ak kobunji age kagochinet ne kibeelei, si koyai kagaigaet agobo Lawik.

¹³ Yeityo imut Lawik koba taitab Aron, ak taitab werikyik, ak igochi Jehovah kagochinet ne kiongoi.

¹⁴ Ibesie ko u noto anyun, Lawik eng’ kwenutab lagokab Israel; ak kobunja Lawik.

¹⁵ Yeityo koba Lawik go, si koyai boisietab emait ne kituiyechin ak ianyiny ichek, ak igoite koek kagochinet ne kiongoi.

¹⁶ Amu kigigona ichek inne eng’ lagokab Israel; kianam choto kobunja, kewale tugul che yatei iyotet, choto ko werik che bo tai che bo lagokab Israel tugul.

¹⁷ Amu chechuk werik tugul che bo tai eng’ lagokab Israel, ak che twatei che kiyagi; kiatabanjige ichek eng’ betut ne kiabar werik tugul che bo tai eng’ emetab Misri.

¹⁸ Ak kianam Lawik kobunja, awale werik tugul che bo tai eng’ lagokab Israel.

¹⁹ Ak kiagoite Lawik kobunji Aron ak werikyik eng’ lagokab Israel, si koyai boisiet ne bo lagokab israel eng’ emait ne kituiyechin, ak koyai kagaigaet agobo lagokab Israel; si mabiit koroito eng’ lagokab Israel, ye rikyin lagokab Israel ole tilil.

²⁰ Kiyachi ko u noto anyun Musa ak Aron ak tuiyet komugul ne bo lagokab Israel, Lawik: ko u tugul che king’at Jehovah Musa agobo Lawik, kiyachi ko u noto anyun ichek lagokab Israel.

²¹ Kiianyinygei anyun Lawik koistoegei tengekto, ak kimwet ngoroikwak; kiigoito anyun Aron ichek eng’ taitab Jehovah koek kagochinet ne kiongoi; ak kiyai Aron kagaigaet agobo ichek koanyiny.

²² Ye kingobata noto, koba go Lawik koyai boisienywa eng’ emait ne kituiyechin, eng’ taitab Aron, ak eng’ taitab werikyik; ko u ye kiga ng’at Jehovah Musa agobo Lawik, kiyachi anyun ichek bichoto ko u noto.

²³ Kimwachi anyun Jehovah Musa, kolenji,

²⁴ Bo Lawik ni: koboch che bo kenyisiek tiptem ak mut ak kwo tai, kobendi go koyai boisiet ne bo emait ne kituiyechin;

²⁵ ak ye kagoit kenyisiekwak konom kobagakta boisionoto, koma koboisie agoi;

²⁶ ago tononjin ripset koboto che tupcho eng’ emait ne kituiyechin ago ma koboisiei. Iyachini ko u noto anyun Lawik agobo ripsosiekwak.