KAITOSYEK 6 - BUKUIT NE TILIL

Bitonwekab Nasaretik

¹ King’alalji anyun Jehovah Musa kolenji,

² Mwachi lagokab Israel ilenji, Ye kayai chi ne muren anan ne kobogorio kayosiet ne itabanat, kayosiet ne bo Nasiritindet, kotabanjigei Jehovah,

³ ingoistoegei divaik ak maiyek; amat koee beek alak tugul che mindilil che bo divaik, anan beek che mindilil che bo maiyek; amat koee beekab sabibuk, anan koam sabibuk che tuonen anan che yaamnyotin.

⁴ Amat koam kiy age tugul ne bunu sabibuk eng’ betusiekyik tugul che bo katabanennyi kong’eete tenderikab logoechoto agoi mortet.

⁵ Amat kocher metinnyi eng’ betusiekyik tugul che bo kayosiennyi ne bo katabanet, agoi kogesgei betusiechoto, che itabanjinegei Jehovah. Ingotililit inendet anyun ingobityo sumeekyik kogoegitu.

⁶ Amat korikyi musto eng’ betusiechoto tugul che itabanjinegei Jehovah.

⁷ Amat kong’wanitgei agobo kwondanyi, anan kamet, anan ng’etab kamet, anan chepkamet, ye kabek, amu mi metinnyi katabanennyi ne itabanjigei Kamuktaindet.

⁸ Tilil eng’ Jehovah eng’ betusiek tugul che bo katabanennyi.

⁹ Ak ngo me chi eng’ chokyinet eng’ ole negite inendet, ak komuruon metitab katabanennyi; kocher anyun metinnyi eng’ betut ne kianyinyi inendet, icheru eng’ betutab tisab.

¹⁰ Ak koipchi tisiindet eng’ betutab sisiit cheptugenik aeng’, anan ko arek aeng’ che bo taritik, kobwa kurgetab emait ne kituiyechin.

¹¹ Ak kogoito tisiindet age kobunji kagochinetab tengekto, ak kobunji age kagochinet ne kibeelei, ak koyai kagaigaet agobo inendet, amu konam tengekto agobo ne kome, ak kotilil metinnyi betunoto.

¹² Ak ingotabanji Jehovah betusiekab katabanennyi, ak koget mengit ne masiirei kenyit agenge, koek kagochinetab chalwokto; ago betos buch betusiek che ki bo tai, amu kigimuruon katabanennyi.

¹³ Ni ng’atutietab Nasiritindet, ye kagogesgei betusiekab katabanennyi: kimutu konyo kurgetab emait ne kituiyechin:

¹⁴ yeityo kogochi kagochinennyi Jehovah, mengit agenge ne masiirei kenyit agenge, ne libwob, koek kagochinet ne kibeelei, ak subendo agenge ne bo kechir ne masiirei kenyit agenge, ne libwob, koek kagochinetab tengekto, ak mengit agenge ne libwob kobunji kagochinoikab kalyet;

¹⁵ ak kerebet ne o ne mi makatinik che ma kinde mermerek, makatinik che mengechen che bo busiek che ng’ootin che kigiburukto mwaita, ak makatinik che terteren che makinde mermerek che kigiile mwaita, ak kagochinenywa ne bo busiek, ak kagochinoikwak che kieei.

¹⁶ Ak kogoito tisiindet tukchoto eng’ taitab Jehovah, ak kogoito kagochinennyi ne bo tengekto, ak kagochinennyi ne kibeelei.

¹⁷ Ak kogoito mengit koek tiseiywot ne bo kagochinoikab kalyet kogochi Jehovah, koboto kebebertab makatinik che ma kinde mermerek; ak kogoito tisiindet kagochinetab busiek ne bo noto, koboto kagochinet ne bo noto ne kieei.

¹⁸ Ak konem Nasiritindonoto metinnyi ne bo katabanennyi eng’ kurgetab emait ne kituiyechin, ak koib sumeechoto bo katabanennyi konde mat ne kibeele tiseiywekab kagochinoikab kalyet.

¹⁹ Yeityo konem tisiindet kusto ne kagiyo ne bo mengit, ak konem eng’ kerebet makatiat agenge ne ming’in ne ma kinde mermerek, ak makatiat agenge ne terter, ne ma kinde mermerek, ak konde tukchoto eunekab Nasiritindet, ye kagonem metit agobo katabanennyi.

²⁰ Ak koongoi tisiindet choto koek kagochinet ne kiongoi eng’ taitab Jehovah; tilil nito, bo tisiindet, koboto tagatet ne kiongoi ak chatit ne kinamjin barak; ak ye ibata noto anyun komuch Nasiritindet koee divaik.

²¹ Ni ng’atutietab Nasiritindet ne ibortae kayosiennyi, ak ne bo kagochinennyi ne igochin Jehovah ne bo katabanennyi, koboto tuguk alak che imuchi konyor; ko u kayosiennyi, nyolu anyun koyai ko u ng’atutietab katabanennyi.

Kaberuroik che kiging’at tisiik koberure bik

²² King’alalji anyun Jehovah Musa kolenji,

²³ Mwachi Aron ak werikyik ilenji, Oberur lagokab Israel ko u ni; olenjini ichek,

²⁴ Ingoberurin Jehovah, ak koribin;

²⁵ Ingokwenyin lapkeiyetab togetab Jehovah, ak korirenen.

²⁶ Ingotokyin Jehovah togennyi, ak kogonin kalyet.

²⁷ Indoi anyun ichek kainennyu lagokab Israel ko u noto; ak aberur ichek.