KAITOSYEK 5 - BUKUIT NE TILIL

Ng’atutikab emet agobo muruonindo ak tuguk che kiyaakto

¹ Kimwachi anyun Jehovah Musa kolenji,

² Ng’at lagokab Israel koisto age tugul ne tinyei mogondosik eng’ nganaset, ak age tugul ne tinyei kuseret, ak age tugul ne kang’wanit amu musto.

³ Oiste che murenik ak gotab kor, oiste choto koba sang’utab nganaset: si mat komuruon nganasenywa, eng’ kwenut ole amenye.

⁴ Ak kiyai lagokab Israel ko u noto, ak kiisto koba sang’utab nganaset; kiyai ko u noto anyun lagokab Israel, ko u ye kimwachi Jehovah Musa.

⁵ Ak king’alalji Jehovah Musa kolenji,

⁶ Mwachi lagokab Israel ilenji, Ye kayai ne muren anan ne kobogorio tengek age tugul ne yaei bik, kolelji Jehovah, ak konam ng’ogisto chichoto;

⁷ kong’any anyun ng’ogistanywa ne kagoyai: ak kogoito kit ne yamegei ak ng’ogistanyi, ak kotesyi kebebertab mut, ak kogochi chichoto kichalwogenji.

⁸ Ago ngo matinyei chichoto chito ne tilia ne kimuchi keweekyi tukchoto bo ng’ogisto, kigochin Jehovah tuguchoto keyaaktae ng’ogisto, si kobiit kobunji tisiindet; koboto mengitab kagaigaet ne kiyachine inendet kagaigaet.

⁹ Bunjin tisiindet kagochinet age tugul ne kenamjin barak, ne bo tuguk che tililen che bo lagokab Israel che igochin ichek inendet.

¹⁰ Ak bunjin tisiindet tuguk che itabani chi age tugul: bunjin tisiindet kiy age tugul ne igochin chi.

Ng’atutik agobo ng’etkonda

¹¹ King’alalji anyun Jehovah Musa kolenji,

¹² Mwachi lagokab Israel ilenji, Ngo kesesen osotiotab chi, koyachi ne ya manong’otiot,

¹³ ak koipgei ak chi, ak koung’ak kioto, ama nai manong’otiondennyi, ak kimuruon inendet, ama kobiit ne baorianjin, ama kinamji boisionoto:

¹⁴ ak konyor kang’unyet chichoto eng’ sobondanyi ak konerech agobo osotiondennyi amu koimuruongei osotiondonoto: anan ngonyor kang’unyet chichoto eng’ sobondanyi, ak konerech agobo osotiondennyi, nganda ma imuruongei osotiondonoto:

¹⁵ komutyi anyun chichoto osotiondennyi tisiindet, ak koib kagochinennyi agobo osotiondonoto, keberbertab taman ne bo epah che bo busiekab sairi; amat korong’ji mwaita, anan konde tuguk che nyamdut; amu kagochinetab busiek che bo ng’etkonda, kagochinetab busiek ne bo kabwatet, ne kibwate tengekto.

¹⁶ Ak komut tisiindet osotiondonoto korik, konde taitab Jehovah:

¹⁷ yeityo konam tisiindet beek che tililen eng’ tabet ne kigiyae ng’ung’unyek; ak komugut ng’ung’unyek che mi got ng’ony, ak konde beechoto:

¹⁸ ak konde tisiindet kobogoriondonoto taitab Jehovah, ak kotiach sumeekyik, ak konde kagochinetab busiek che bo kabwatet, eutab kobogoriondonoto, noto kagochinetab busiek che bo ng’etkonda; kotinyei tisiindet eng’ eunnyi beek che bo ng’wanindo che ibu chubisiet;

¹⁹ ak komwachi tisiindet inendet koyosio, kolenji kobogoriondonoto, Ngo tom oipgei ak chi, anan ngo ma igesesen isub simdo, ago imi bounatetab manong’otiondeng’ung’, itiagage anyun eng’ beechu bo ng’wanindo che ibu chubisiet;

²⁰ ago ngo kiigesesen, imong’une bounatetab manong’otiondeng’ung’, ak ngo kiimuruonitu, ak ngo kioipgei ak chi age ne ma manong’otiondeng’ung’,

²¹ komwachi anyun tisiindet kobogoriondonoto koyosio kayosiet ne bo chubisiet, ak kolenji tisiindet kobogoriondonoto, Ingoyain Jehovah iegu ne chubot ak kayosiet eng’ biguk, ye kayai Jehovah kubestang’ung’ konun, ak kobwa moeng’ung’;

²² ak koba beechu ibu chubisiet agutaniguk, ak kobwa moeng’ung’, ak konun kubestang’ung’; ak kowol kobogoriondonoto, kole, Amen, Amen.

²³ Ak kosirji tisiindet bukuit chubisiosiechuto, ak koundo koba beekab ng’wanindo;

²⁴ ak kogochi kobogoriondonoto koee beechoto ibu chubisiet; ak koba beechoto ibu chubisiet bortanyi ak kong’wonegitu.

²⁵ Yeityo konem tisiindet kagochinetab busiek che bo ng’etkonda, eng’ eutab kobogoriondonoto, ak koongoi kagochinonoto bo busiek eng’ taitab Jehovah, ak koib kobwa kaptisisiet;

²⁶ ak komugut tisiindet kagochinonoto bo busiek konyi eut, koek kabwatet ne bo noto, ak kobeel eng’ kaptisisiet, ak ye ibata kogochi kobogoriondonoto beechoto koee.

²⁷ Ak ye kagogochi koee beechoto, kobiitu anyun ko u ni, ngo kogomuronit kobogoriondonoto, ak ngo kogochiliilji manong’otiondennyi, koba anyun bortanyi beechoto ibu chubisiet ak kong’wonegitu, ak kobwa moennyi, ak konun kubestanyi; ak koek ne chubot kobogoriondonoto eng’ bikyik.

²⁸ Ago ngo ma muruon kobogoriondonoto, ago kaga tilil; kotiagat anyun, ak komanach.

²⁹ Nito ng’atutietab ng’etkonda, ye kagesesen osotiot ne komi bounatetab manong’otiondennyi, ak komuruonit;

³⁰ anan ye kanyor chi kang’unyet eng’ sobondanyi, ak konerech agobo osotiondennyi; konde anyun kobogoriondonoto taitab Jehovah, ak koyachi tisiindet ng’atutionito.

³¹ Ago manyoru chichoto tengekto, ak koib kobogoriondonoto tengektanyi.