KAITOSYEK 36 - BUKUIT NE TILIL

Ng’atutiet agobo borotetab tibik

¹ Ak kirik che eechen eng’ gorikab kwanisiek che bo oretab lagokab Gilead, weritab Makir, weritab Manase, ne bo ortinwekab werikab Josep, nyo kong’alal eng’ taitab Musa, ak eng’ taitab bounik, che eechen eng’ gorikab kwanisiek che bo lagokab Israel:

² ak kile, King’at Jehovah kiptaiyandennyu kole, kogochi emet lagokab Israel eng’ seretab barbarek koek borotet: ak king’at Jehovah kiptaiyandennyu kogochi tibikab Selopehad tupchennyo, borotetab kwandanywa.

³ Ak ngotun ichek werikab bororiosiek alak che bo lagokab Israel, keisto anyun borotenywa eng’ borotetab kwanisiekyok, ak ketesyi boretetab oret ne ituni ichek: kiistoi anyun barbariatab borotennyo.

⁴ Ak ye kait jubilii ne bo lagokab Israel, ketesyi anyun borotenywa borotetab oret ne bunjin ichek: kiistoi anyun borotenywa eng’ borotetab oretab kwanisiekyok.

⁵ Ak king’at Musa lagokab Israel ko u ng’olyotab Jehovah kolenji, Kamwa iman oretab werikab Josep.

⁶ Kang’at Jehovah ng’olyondoni agobo tibikab Selopehad, kole, Ingotun ichek che machei; ago ingotun che bo gotab oretab kwandanywa inegei.

⁷ Si ma kiuuto borotet age tugul ne bo lagokab Israel, kong’eete oret age kwo oret age: amu kanyol konamgei lagokab Israel, chi tugul ak borotetab oretab kwanisiekyik.

⁸ Ak chepto age tugul ne bunjin borotet eng’ bororiet age tugul ne bo lagokab Israel, kituni eng’ gotab oretab bororietab kwandanyi, si kobiit konam chi age tugul eng’ lagokab Israel, borotetab kwanisiekyik.

⁹ Si ma kiuuto borotet age tugul kong’eete bororiet age agoi bororiet age, amu namegei bororiosiekab lagokab Israel, chi tugul ak borotennyi.

¹⁰ Kiyai tibikab Selopehad ko u ye king’at Jehovah Musa:

¹¹ amu kiitun Mala, Tirsa, Hogla, Milka, ak Noa, tibikab Selopehad, werikab tupchosiekab kwandanywa.

¹² Kiitun ichek ortinwekab werikab Manase weritab Josep, ak kitebe borotenywa bororietab oretab kwandanywa.

¹³ Chuto anyun ng’atutik ak kiruogutik, che king’at Jehovah lagokab Israel eng’ Musa eng’ warengetab Moab ole negite Jordan eng’ Jeriko.