KAITOSYEK 35 - BUKUIT NE TILIL

Nganasokab Lawik ak nganasok che kimwechin

¹ Ak kimwachi Jehovah Musa eng’ warengetab Moab ole negite Jordan eng’ ole bo Jeriko, kolenji,

² Ng’at lagokab Israel kogochi Lawik nganasok eng’ borotenywa si komeny; ak ogochi Lawik ole agete tuga, eng’ emotinwek che kiyiem nganasok.

³ Ak komeny nganasochoto, ak kobunji tukwak oloto agete, ak tugukwak, ak tiong’ikwak tugul.

⁴ Egu kakwautik elfut agenge che bo eut oloto agete eng’ nganasok che ogochini Lawik, kong’eete irimetab nganaset, koyiem komoswek tugul.

⁵ Ak okwa kakwautik elfusiek aeng’ che bo eut eng’ nganaset ole tokyingei kong’asis, ak kakwautik elfusiek aeng’ che bo eut eng’ komostab murot ne bo tai, ak kakwautik elfusiek aeng’ che bo eut eng’ komostab cherongo, ak kakwautik elfusiek aeng’ che bo eut eng’ komostab murot ne bo katam, kokwen nganaset. Egu eng’ ichek ole agete tuga eng’ nganasok.

⁶ Egu nganasok che ogochini Lawik, nganasok lo che kimwachin, che ogoitoi si komwechi ne karumis: ak otesyi choto nganasok artam ak aeng’.

⁷ Egu artam ak sisiit nganasok tugul che ogochini Lawik: koboto emotinwekwak chugai.

⁸ Ak eng’ nganasochoto ogoitoi eng’ che bo lagokab Israel, onemu che chang’ eng’ che tinyei che chang’, ak onemu che ng’ering’ eng’ che tinyei che ng’ering’: ingogochi age tugul Lawik ko u ole te borotennyi ne kinyor.

⁹ Ak king’alalji Jehovah Musa kolenji,

¹⁰ Mwachi lagokab Israel ilenji, Ye olandoe Jordan obe emetab Kanan,

¹¹ otabanjige nganasok koek nganasok che omwechini; si kobiit komwechi oloto ne karumis eng’ lelset.

¹² Ak egu nganasochoto che omwechini ye komwee ne yaaktoi mugetut; si ma kibar ne karumis, agoi kotonon eng’ taitab tuiyet kiruokyi.

¹³ Ak nganasochoto lo ogoitoi, koegu nganasok lo che kimwechin.

¹⁴ Ogoitoi nganasok somok eng’ Jordan bitonin, ak ogoitoi nganasok somok eng’ emetab Kanan; egu nganasok che kimwechin.

¹⁵ Egu nganasochoto lo ole mwechin lagokab Israel, ak ne toondet, ak bunotyot ne mi kwenunywa: si komwechi oloto age tugul ne barei chi eng’ lelset.

¹⁶ Ago ngo kikwere karnet ak kome, ko rumin chichoto: kibarei rumindonoto iman.

¹⁷ Ak ngo kiwire koita ne yamei kobar chi, ak kome, ko rumin inendet: kibarei rumindonoto iman.

¹⁸ Anan ngo kikwere ketit ne yamei kobar chi, ak kome, ko rumindet inendet: kibarei rumindonoto iman.

¹⁹ Barei yaaktaindetab mugetut agobo korotik rumindonoto: ngo tuiyo ak inendet, kobar.

²⁰ Ak ngo toorta amu wechet, anan ngowir eng’ kiy, kosapchin, ak kome;

²¹ anan ngo rabach eng’ bunyondit, ak kome: kibarei iman inendet ne kerabagisiei; rumin chichoto: barei yaaktaindetab mugetut agobo korotik, rumindonoto, ye katuiyo ak inendet.

²² Ago ngo toorta eng’ yoto, ama eng’ bunyondit, anan kowire kiy age tugul ama sapchi,

²³ anan eng’ koita ne yamei kobar chi, ama keer inendet, ak kotiech chichoto ak kome, ak kamage bunyondennyi, ak kama komachei koyachi ne ya:

²⁴ koruoch anyun tuiyet agobo barindonoto ak yaaktaindetab mugetut agobo korotik ko u ole teptoi kiruogutichu:

²⁵ ak kosor tuiyet rumindonoto eng’ eutab yaaktaindetab mugetut agobo korotik, ak koweekyi inendet nganasennyi, ole kiga mwechi: ak komeny oloto agoi kome tisiindet ne o, ne kigiile mwaita ne tilil.

²⁶ Ago ngot kosiir rumindonoto kiwotetab nganasennyi ne kiga mwechi;

²⁷ ak konyorji inendet yaaktaindetab mugetut agobo korotik sang’utab nganasennyi ne kimwechin, ak kobar ne yaaktoi mugetut agobo korotik, barindet; ko manamei inendet ng’ogistab korotik.

²⁸ Amu kata nyoljin kotebe nganasennyi ne kimwechin agoi kome tisiindet ne o: ago ye kagome tisiindet ne o koweekyigei anyun rumindet emennyi.

²⁹ Egu tuguchuto ng’atutietab kiruoget eng’ okwek eng’ ibinwekwok tugul ak eng’ meng’otosiekwok tugul.

³⁰ Age tugul ne barei chi, kibarei rumindonoto eng’ ng’alekab baorinik: ago magibarei chi eng’ baornatetab chito agenge.

³¹ Amotaach kiy ne kitiage sobondab rumindet ne nyoljin meet: ago kibarei iman.

³² Ak motaach kiy ne kitiage chi ne kamwechi nganasennyi ne kimwechin, si kobiit konyo komeng’is eng’ emet, agoi komee tisiindet ne o.

³³ Amomuruon anyun emet ne omi: amu imuruoni emet korotik: ak mami kiy ne kianyinye emet amu korotik che kitumjigei, kobate korotikab inendet ne kitumda korotichoto.

³⁴ Ameng’wanit anyun emet ne omenye, ne atebe agane: amu ane Jehovah atebe kwenutab lagokab Israel.