KAITOSYEK 34 - BUKUIT NE TILIL

Kiwotosiekab emotinwekab Israel

¹ Ak kimwachi Jehovah Musa kolenji,

² Ng’at lagokab Israel ilenji, Ye oit emetab Kanan, (nito emet ne onyoru koek boroteng’wong’, emetab Kanan ko u kiwotosiekyik),

³ bochitu anyun komostang’wong’ ne bo murot ne bo tai kong’eete ong’atetab Sin korob tabandab Edom, ak kobochit kiwoteng’wong’ ne bo murot ne bo tai kong’eete tabandab Araraita ne bo Munyuk ne tokyingei kong’asis:

⁴ ak koweigei kiwoteng’wong’ kotokyigei murot ne bo tai eng’ ole kitogostoe kebendi Akrabim, ak kwo agoi Sin: ak itei kiwotosiekyik komostab murot ne bo tai ne bo Kades-barnea; ak kwo agoi Haser-adar, agoi koit Asmon:

⁵ ak koweigei kiwotet kong’eete Asmon agoi koit ainetab Misri, ak kobochit kiwotosiekyik nyanjet.

⁶ Ak egu nyanjet ne o kiwoteng’wong’ ne mi cherongo, nito kiwoteng’wong’ ne bo cherongo.

⁷ Ak egu ni kiwoteng’wong’ ne bo murot ne bo katam: kong’eete nyanjet ne oaroroti agoi tulwetab Hor:

⁸ ak koboch tulwetab Hor, oaroroti agoi ye kimandoe kebendi Hamat; ak bochitu kiwotennyi Sedad:

⁹ ak itei kiwotet Sipron, ak bochitu tabanwekyik Hasarenan: nito kiwoteng’wong’ ne bo murot ne bo katam.

¹⁰ Yeityo oarorote kiwoteng’wong’ ne bo komostab kong’asis koboch Hasar-enan agoi Sepam:

¹¹ ak kochortagei kiwotet kong’eete Sepam agoi Ribla, eng’ komostab kong’asis ne bo Ain; ak kochortagei kiwotet agoi koit tabandab nyanjetab Kineret eng’ komostab kong’asis:

¹² ak kochortagei kiwotet agoi Jordan, agoi koit tabanwekyik Araraita ne bo Munyuk: egu nito emeng’wong’ ko u kiwotosiekyik che yiemei tugul.

¹³ Ak king’at Musa lagokab Israel kolenji, Nito emet ne onyabani eng’ barbarek, ne kong’at Jehovah kigochi ortinwek sogol, ak kebeberta ne bo oret age:

¹⁴ amu kigotaach borotenywa oretab lagokab Reuben ko u gorikab kwanisiekwak, ak kigotaach nenywa oretab lagokab Gad, ko u gorikab kwanisiekwak, ak kigotaach borotenywa kebebertab oretab Manase:

¹⁵ kigotaach borotenywa ortinwechoto aeng’u ak kebeber eng’ Jordan bitoni eng’ Jeriko ole tokyingei kong’asis.

¹⁶ Ak kimwachi Jehovah Musa kolenji,

¹⁷ Chu kainaikab bik che pcheiywok emet koek boroteng’wong’: Eleasar tisiindet, ak Josua weritab Nun.

¹⁸ Ak onam bounindet ne bo oret age tugul, si kopchei emet koek borotet.

¹⁹ Kainaikab bichoto chu: eng’ oretab Juda, Kaleb weritab Jepune.

²⁰ Ak eng’ oretab lagokab Simeon, ko Semuel weritab Amiud.

²¹ Eliad weritab Kislon, eng’ oretab Benjamin.

²² Ak bounindet Buki weritab Jogli eng’ oretab lagokab Dan.

²³ Bounindet Haniel weritab Epod eng’ lagokab Josep, eng’ oretab lagokab Manase:

²⁴ bounindet Kemuel weritab Siptan, eng’ oretab lagokab Epraim.

²⁵ Ak bounindet Elisapan weritab Parnak, eng’ oretab lagokab Sebulun.

²⁶ Ak bounindet Paltiel weritab Asan, eng’ oretab lagokab Isakar.

²⁷ Ak bounindet Aihud weritab Selomi, eng’ oretab lagokab Aser.

²⁸ Ak bounindet Pedael weritab Amiud, eng’ oretab lagokab Naptali.

²⁹ Chuto che king’at Jehovah kopchechi lagokab Israel borotet eng’ emetab Kanan.