KAITOSYEK 33 - BUKUIT NE TILIL

Oret ne kibun Israelik komandoi eng’ Misri

¹ Chu banwekab lagokab Israel, ye kingomanda eng’ emetab Misri eng’ lugosiekwak kondochin Musa ak Aron.

² Ak kisir Musa agobo mandaenywa, ko u banwekwak, ko u ng’atutietab Jehovah: ak chu banwekwak ko u mandaenywa.

³ Ak kiba kong’eetye Rameses eng’ arawet ne bo tai, eng’ betutab taman ak mut ne bo arawanato bo tai; kimanda lagokab Israel eng’ betut ne kiisubi paska eng’ eutab kimnatet kogeeroti Misrik tugul,

⁴ kota kotubei Misrik werikwak tugul che bo tai, che kiga kobar Jehovah eng’ kwenunywa: kiiruokyi Jehovah cheptalelisiekwak agichek.

⁵ Ak kiba lagokab Israel eng’ Rameses, koba komuung’e Sukot.

⁶ Ak kiba eng’ Sukot, komuung’e Etam, ne mi ole boch ong’atet.

⁷ Ak kiba eng’ Etam, ak koweeigei agoi Pi-hairot, ne tokyingei Baal-sepon: ak kiimuung’e taitab Migdol.

⁸ Ak kiba eng’ ole tokyingei Hairot, ak kibun kwenutab nyanjet agoi ong’atet: ak kiba bandab betusiek somok eng’ ong’atetab Etam, ak kiba komuung’e Mara.

⁹ Ak kiba eng’ Mara, ak kiit Elim: ak kimi Elim kong’ikab beek tamanu ak aeng’, ak tironik tamanwogik tisab; ak kiimuung’e oloto.

¹⁰ Ak kiba eng’ Elim, komuung’e ole negite Nyanjet ne Birir.

¹¹ Ak kiba eng’ Nyanjet ne Birir, ak kiimuung’e ong’atetab Sin.

¹² Ak kiba eng’ ong’atetab Sin, ak komuung’e Dobka.

¹³ Ak kiba eng’ Dobka, ak kiimuuny eng’ Alus.

¹⁴ Ak kiba eng’ Alus, komuung’e Repidim, ole kima komi beek che eei bik.

¹⁵ Ak kiba eng’ Repidim, ak kiimuung’e ong’atetab Sinai.

¹⁶ Ak kiba eng’ ong’atetab Sinai, ak kiimuuny eng’ Kibrot-hataaba.

¹⁷ Ak kiba eng’ Kibrot-hataaba, ak komuung’e Haserot.

¹⁸ Ak kiba eng’ Haserot, ak komuung’e Ritma.

¹⁹ Ak kiba eng’ Ritma, ak kiimuung’e Rimon-peres.

²⁰ Ak kiba eng’ Rimon-peres, ak kiimuung’e Libna.

²¹ Ak kiba eng’ Libna, ak kiimuung’e Risa.

²² Ak kiba eng’ Risa, ak kiimuung’e Kehelata.

²³ Ak kiba eng’ Kehelata, ak kiimuung’e tulwetab Seper.

²⁴ Ak kiba eng’ tulwetab Seper, ak kiimuuny eng’ Harada.

²⁵ Ak kiba eng’ Harada, ak kiimuuny eng’ Makelot.

²⁶ Ak kiba eng’ Makelot, ak kiimuuny eng’ Tahat.

²⁷ Ak kiba eng’ Tahat, ak kiimuuny eng’ Tera.

²⁸ Ak kiba eng’ Tera, ak kiimuuny eng’ Mitka.

²⁹ Ak kiba eng’ Mitka, ak kiimuuny eng’ Hasmona.

³⁰ Ak kiba eng’ Hasmona, ak kiimuung’e Moserot.

³¹ Ak kiba eng’ Moserot, ak kiimuung’e Bene-jaakan.

³² Ak kiba eng’ Bene-jaakan, ak kiimuung’e Horagidgad.

³³ Ak kiba eng’ Horagidgad, ak kiimuung’e Jotbata.

³⁴ Ak kiba eng’ Jotbata, ak kiimuung’e Abrona.

³⁵ Ak kiba eng’ Abrona, ak kiimuung’e Esion-geber.

³⁶ Ak kiba eng’ Esion-geber, ak kiimuung’e ong’atetab Sin (noto Kades).

³⁷ Ak kiba eng’ Kades, ak kiimuung’e tulwetab Hor, ole bochin kiwotetab emetab Edom.

³⁸ Ak kitogosta Aron tisiindet tulwetab Hor, eng’ ng’atutietab Jehovah, ak kimechi oloto, eng’ kenyitab artam koboch ngab komong’une lagokab Israel emetab Misri, eng’ arawetab mut, eng’ betut ne bo tai eng’ arawanato.

³⁹ Ak kiga kotar Aron kenyisiek bogol ak tiptem ak somok ye kingomeei eng’ tulwetab Hor.

⁴⁰ Ak kigas Kananindet laitoriatab Arad, ne kimenyei Murot ne bo Tai eng’ emetab Kanan, kole bwanei lagokab Israel.

⁴¹ Ak kiba eng’ tulwetab Hor, ak komuung’e Salmona.

⁴² Ak kiba eng’ Salmona, ak kiimuung’e Bunon.

⁴³ Ak kiba eng’ Bunon, ak kiimuung’e Obot.

⁴⁴ Ak kiba eng’ Obot, ak kiimuung’e Iyeabarim, eng’ kiwotetab Moab.

⁴⁵ Ak kiba eng’ Iyim, ak kiimuung’e Dibon-gad.

⁴⁶ Ak kiba eng’ Dibon-gad, ak kiimuung’e Almon-diblataim.

⁴⁷ Ak kiba eng’ Almon-diblataim, ak kiimuung’e tulonokab Abarim, ole tokyingei Nebo.

⁴⁸ Ak kiba eng’ tulonokab Abarim, ak kiimuung’e warengetab Moab ole negite Jordan eng’ Jeriko.

⁴⁹ Ak kiimuung’e ole negite Jordan, koboch Bet-jesimot agoi Abel-sitim eng’ warengetab Moab.

Keng’atei Israel koon Kananik ak kong’em konamonikwak

⁵⁰ Ak kimwachi Jehovah Musa eng’ warengetab Moab, ole negit Jordan, eng’ Jeriko kolenji,

⁵¹ Mwachi lagokab Israel, ilenji, Ye olandoe Jordan obe emetab Kanan,

⁵² oon anyun bik tugul che menyei emonoto, koba eng’ taing’wong’, ak ong’em koikwak che saei, ak ong’em kanamonikwak che kigitanyi, ak obut oldinwekwak tugul che tororen:

⁵³ ak onam emet kobunjok, ak omeny: amu kiagonok emonoto kobunjok.

⁵⁴ Ak opchechige emonoto onyabani, eng’ seretab barbarek ko u ortinwekwok; ogochini che chang’ borotet ne o, ak ogochini che ng’ering’ borotet ne ming’in: oldo tugul ole kaibutyi barbariatab chi, koek nenyi noto; onyabani ko u bororiosiekab kwanisiekwok.

⁵⁵ Ago ngo moon bik che menyei emet, koba eng’ taing’wong’, kogergeitu eng’ konyekwok ak tuguk che toorei bich, ak katok eng’ karaswekwok, icheget che ochamjini kong’et, ak konyalilak eng’ emet ne omenye.

⁵⁶ Ak tun ayaiywok ko u ye kiabwati ale ayachjini ichek.