KAITOSYEK 32 - BUKUIT NE TILIL

Kechamjin Reuben ak God komeny Jordan kong’asis

¹ Kitinyei akwotisiek che chang’ mising’ lagokab Reuben ak lagokab Gad: ak ye kingogeer emetab Jaser, ak emetab Gilead, kole, ogeero, emet ne bo akwotisiek;

² kobwa lagokab Gad ak lagokab Reuben kong’alalji Musa ak Eleasar tisiindet ak bounikab tuiyet, kelenji,

³ Atarot, Dibon, Jaser, Nimra, Hesbon, Eleale, Sebam, Nebo, ak Beon,

⁴ emonoto kibar Jehovah eng’ taitab tuiyetab Israel, ko emetab akwotisiek, ak tinyei otwogiguk akwotisiek.

⁵ Ak kile, Ngo koginyoru chamet eng’ taing’ung’, ko nyolu kigochi emonito otwogiguk kobunji; amemutech kelandae Jordan.

⁶ Ak kilenji Musa lagokab Gad ak lagokab Reuben, Bendi tupchosiekwok luget; otebi okwek eng’ yu?

⁷ Amu nee si omu lagokab Israel si malanda koba emet ne kiigochi Jehovah?

⁸ Kiyai kwanisiekwok ko u noto, ye kingayokte eng’ Kades-barnea koba kosegei emet.

⁹ Amu ye kingoba atebwetab Eskol, ak kogeer emet, komu lagokab Israel kole si maba emet ne kiga kogochi Jehovah.

¹⁰ Ak kilalyo neregekab Jehovah betunoto, ak kiiyosio kole,

¹¹ Mami iman eng’ bik che kibunu Misri koboch che bo kenyisiek tiptem ak kwo tai, ne imuchi kogeer emet ne kiayosiechi Abraham, ak Isak, ak Jakobo: amu ma isubwa eng’ kagesunatetab ge.

¹² Kobate Kaleb weritab Jepune Kenisindet, ak Josua weritab Nun: amu kiisub ichek Jehovah eng’ kagesunatetab ge.

¹³ Ak kilalyo neregekab Jehovah agobo Israel, ak kiigochi koombeniot eng’ ong’atet eng’ kenyisiek artam, agoi kowong’gei ibinda tugul ne kiyai yaitiet eng’ taitab Jehovah.

¹⁴ Ak ogeero, kong’eetye oyai ko u ye kiyai kwanisiekwok, oegu kiptengeginik che tesoksei, otes neregek che koromen che bo Jehovah eng’ Israel.

¹⁵ Amu ngomaste omete inendet, kobagaktoi inendet ichek kogeny eng’ ong’atet; ak ong’em bichu tugul.

¹⁶ Ak kibwa korik ole mi inendet, ak kole, King’ote biusiekab tukyok eng’ olito, ak keteekyi lagokyok nganasok:

¹⁷ ago ki chobotin achek kilaach karik kebe kindoe lagokab Israel, agoi kiit oldanywa: ak komeny lagokyok nganasok che ng’ototin amu bikab emet.

¹⁸ Magiweeksei kebendi ga agoi konyor lagokab Israel, chi tugul borotennyi.

¹⁹ Amu maginyabani koboto ichek eng’ bitonindo bo Jordan ak olin bo tai; amu mi borotennyo Jordan bitoni tokyingei kong’asis.

²⁰ Ak kilenji Musa ichek, Ngoyai ko u nito, olaach karik obe luget eng’ taitab Jehovah,

²¹ ak ngwo mureno age tugul ne kagolaach karik kolandae Jordan eng’ taitab Jehovah, agoi koon bunikyik eng’ tainnyi.

²² Ak kiterter emet eng’ taitab Jehovah: oweege anyun, ak oegu che matinyei tengek eng’ taitab Jehovah anan eng’ Israel; ak kobunjok emoni eng’ taitab Jehovah.

²³ Ago ngot ko moyai ko u noto, ogeero, ko kaoyai tengekto eng’ taitab Jehovah: ak onai anyun ole ng’ang’dook tengektang’wong’.

²⁴ Oteekyi nganasok lagokwok, ak ong’otyi kechirekwok biusiek, ak oyai noto kamong’une kuting’wong’.

²⁵ Ak kimwachi lagokab Gad ak lagokab Reuben Musa kolenji, Yaei otwogiguk ko u ye kang’at kiptaiyandennyu.

²⁶ Tebe nganasokab Gilead lagokyok, ak osotikyok; ak tukyok, ak che kiyagi tugul:

²⁷ ago landoi otwogiguk, mureno age tugul ne kagolaach karik che bo luget, kobendi boriet eng’ taitab Jehovah, ko u ye kimwa kiptaiyandennyu.

²⁸ Kiiyomis anyun Musa Eleasar tisiindet, ak Josua weritab Nun, ak kandoikab gorik che bo kwanisiekab ortinwekab lagokab Israel, agobo bichoto.

²⁹ Ak kilenji Musa, Ngolandae tugul Jordan koboto lagokab Gad ak lagokab Reuben, chi tugul ne kagolaach karikab luget, si kwo boriet eng’ taitab Jehovah, ak kiterter emet eng’ taing’wong’; ogochi anyun ichek emetab Gilead kobunji:

³⁰ ago ngo macham olande tugul kotinyei karik, konyoru borotet eng’ emetab Kanan kobotok.

³¹ Ak kiwolji lagokab Gad ak lagokab Reuben kolenji, Kiyae ko u ye kamwachi Jehovah otwogikyik.

³² Kilandoi eng’ taitab Jehovah, kebendi emetab Kanan, ketinye karik, ak ng’etu eng’ Jordan bitoni, che bunjinech che bo borotennyo.

³³ Ak kiigochi Musa ichek, choto lagokab Gad, ak lagokab Reuben, ak kebebertab oretab Manase weritab Josep, bororietab Sihon laitoriatab Amorik, ak bororietab Og laitoriatab Basan, emet, ko u nganasokwak koboto ole bochin kiwotosiekwak, agot nganasokab emet che kiyiem.

³⁴ Ak kiteech lagokab Gad Dibon, ak Atarot, ak Aroer;

³⁵ Atrot-sopan, Jaser, ak Jogbea;

³⁶ Bet-nimra, ak Bet-haran: nganasok che ng’ototin, ak biusiek che bo kechirek.

³⁷ Ak kiteech lagokab Reuben Hesbon, ak Eleale, ak Kiriataim;

³⁸ ak Nebo, ak Baal-meon, (kigiwal kainaikwak,) ak Sibma: ak kitochi kainaik alak nganasok che kiteech.

³⁹ Ak kiba lagokab Makir weritab Manase Gilead, ak kinam korebe Amorik che kimi oloto.

⁴⁰ Ak kiigochi Musa Makir weritab Manase, Gilead; ak kimeny oloto.

⁴¹ Ak kiwa Jair weritab Manase konam nganasokwak, ak koguure Habot-jair.

⁴² Ak kiwa Noba konam Kenat, ak nganasokyik che mengechen, ak kiguure Noba, koguurtoe kainennyi.