KAITOSYEK 30 - BUKUIT NE TILIL

Ng’atutik agobo tuguk che iarortoi chi

¹ Ak kimwachi Musa bounikab ortinwekab lagokab Israel kolenji, Ni kit ne king’at Jehovah.

² Ye iarorji chi Jehovah kiy, anan ngoyosio korate sobondanyi ng’atutiet, amat kowal ng’olyondennyi; yaei ko u tugul che kimwa eng’ kutinnyi.

³ Ak kogeny, ye iarorji kobogoriondo Jehovah kiy, ak korategei ng’atutiet, ye ta komi gotab kwandanyi, kota ko neran;

⁴ ak kogas kwandanyi kaarortaennyi, ak ratutiennyi ne korate sobondanyi, ak kosis kwandanyi; kogimegitu anyun kaarortaosiekyik, ak kogimit ratutiet age tugul ne korate sobondanyi.

⁵ Ago ngo ete kwandanyi eng’ betut ne kagas; ko matonondos kaarortaosiekyik, agot agenge, anan ratutikyik che korate sobondanyi; ak konyochi kaat Jehovah, amu kiete kwandanyi.

⁶ Ak ngitun kobogoriondonoto kota komitei eng’ inendet kaarortaosiekyik, anan ngo kisartae ng’olyo eng’ kutinnyi, ne korate sobondanyi;

⁷ ak kogas manong’otiondennyi, ak kosis eng’ betut ne kagas: kotononso anyun kaarortaosiekyik, ak ratutik che kiga rate sobondanyi.

⁸ Ago ngo ete manong’otiondennyi eng’ betut ne kagas; kowal anyun chichoto kaarortaetab kobogoriondonoto ne kotinyei, koek buch, ak ng’olyot ne kosartae, ne koga rate sobondanyi: ak konyochi kaat Jehovah.

⁹ Ago kaarortaetab mosok, anan ko ne bo inendet ne kigibesyo ak manong’otiot; kiy age tugul ne kirate sobondanyi kotononi amu inendet, magibutei.

¹⁰ Ak ngo aror inendet komi gotab manong’otiondennyi, anan korat sobondanyi eng’ ratutietab kayosiet,

¹¹ ak kogas manong’otiondennyi, ak kosis, ama koete; kotononso anyun kaarortaosiekyik tugul, ak ratutiet age tugul ne kirate sobondanyi.

¹² Ago ngo wal manong’otiondennyi tukchoto koek buch eng’ betut ne kigas; ko matononi anyun kiy age tugul ne mong’une kutinnyi agobo kaarortaosiekyik, anan agobo ratutiet ne kirate sobondanyi: kiyai manong’otiondennyi tukchoto koek buch; ak konyochi kaat Jehovah.

¹³ Imuchi kogimit manong’otiot, anan koyai koek buch, kaarortaet age tugul, ak kayosiet age tugul ne ratisiei, ne inyalili sobondo.

¹⁴ Ago ngo sis manong’otiondennyi eng’ inendet betut age tugul; kogimiti anyun kaarortaosiekyik tugul, anan ko ratutikyik tugul che mitei inendet: kigogimit tukchoto amu kisis, ma ete kwonyoto eng’ betut ne kigas.

¹⁵ Ago ngo but koek buch ko kagogas; koib anyun inendet tengektab kwonyoto.

¹⁶ Chuto ng’atutik che king’at Jehovah Musa, che bo chi ak osotiondennyi, ak che bo chepto ak kwandanyi, ye ta ko neran cheboto, eng’ gotab kwandanyi.