KAITOSYEK 3 - BUKUIT NE TILIL

Boisionikab Lawik, ak koitenywa

¹ Chu ortinwekab Aron ak Musa eng’ betut ne king’alalji Jehovah Musa eng’ tulwetab Sinai.

² Chu kainaikab werikab Aron; Nadab ne bo tai, ak Abiu, Eleasar, ak Itamar.

³ Choto kainaikab werikab Aron, tisiik che kigiil, che kigotaban si kobois eng’ boisietab tiseinatet.

⁴ Ak kibek eng’ taitab Jehovah Nadab ak Abiu, ye kingogoito mat ne ter eng’ taitab Jehovah, eng’ ong’atetab Sinai, ak kima kotinyei lagok: ak kibois Eleasar ak Itamar eng’ boisietab tiseinatet eng’ taitab kwandanywa Aron.

⁵ Ak kimwachi Jehovah Musa kolenji,

⁶ Imutu oretab Lawik korik, ak inde ichek taitab Aron tisiindet, si koboisiechi inendet.

⁷ Ak korib ichek boisiennyi, ak boisietab tuiyet komugul eng’ taitab emait ne kituiyechin, si koyai boisiet ne bo got.

⁸ Ak korib tuguk tugul che bo emait ne kituiyechin orit, ak boisietab lagokab Israel koyai boisiet ne bo got.

⁹ Ak igochi Aron ak werikyik Lawik: kagigochi inendet ichek iman eng’ lagokab Israel.

¹⁰ Ak inde Aron ak werikyik, si korib tiseinatenywa: ak kebarei kipsagarindet age tugul ne rikyin.

¹¹ Ak kimwachi Jehovah Musa kolenji,

¹² Anendet, keero, kianam Lawik eng’ kwenutab lagokab Israel si ageere werik che bo tai che yatei iyotet eng’ lagokab Israel; bunjina Lawik.

¹³ Amu chechuk werik tugul che bo tai; kiatabanjige werik tugul che bo tai eng’ Israel, eng’ bik, ak che twatei che kiyagi, eng’ betut ne kiabar werik tugul che bo tai eng’ emetab Misri: egu chechuk choto; ane a Jehovah.

¹⁴ Ak kimwachi Jehovah Musa eng’ ong’atetab Sinai, kolenji,

¹⁵ Iit lagokab Lawik ko u gorikab kwanisiekwak, ko u ortinwekwak: iit ng’etet age tugul koboch che bo arawet agenge ak kwo tai.

¹⁶ Ak kiit Musa anyun ichek ko u ng’olyotab Jehovah, ko u ye kiging’at inendet.

¹⁷ Ki kainaikab werikab Lawi chu: Gerson, Kohat, ak Merari.

¹⁸ Chu ko kainaikab werikab Gerson ko u gorikwak; Libni ak Simei.

¹⁹ Werikab Kohat ko u gorikwak; ko ki Amram, Ishar, Hebron, ak Usiel.

²⁰ Werikab Merari ko u gorikwak; ko ki Mali ak Musi. Chuto ortinwekab Lawik ko u gorikab kwanisiekwak.

²¹ Salu Gerson gotab Libnik, ak gotab Simeik: chuto gorikab Gersonik.

²² Kiek tugul choto kigiit eng’ ichek, koboch che bo arawet agenge ak kwo tai, murenik elfusiek tisab ak bogol mut.

²³ Ingoteech che bo gorikab Gersonik gotab tuiyet batai, eng’ komostab cherongo.

²⁴ Ak ingoek Eliasap weritab Lael bounindetab Gersonik, eng’ gotab kwanisiekwak.

²⁵ Ak ingorib werikab Gerson eng’ emait ne kituiyechin, got, ak Emait, ak tugukyik che kituge, ak ngoriet ne kigere kurgetab emait ne kituiyechin.

²⁶ Ak ngoroik che king’ote seremut, ak ngoriet ne kigere kurgetab seremut, ne negite got, ne yiemei kaptisisiet, ak boroonikyik che bo boisienywa tugul.

²⁷ Salu Kohat gotab Amramik, ak gotab Isarik, ak gotab Hebronik, ak gotab Usielik: chuto gorikab Kohatik.

²⁸ Kiek tugul che kigiit eng’ ichek, koboch che bo arawet agenge ak kwo tai, murenik elfusiek sisiit ak bogol lo, che kiribei boisietab ole tilil.

²⁹ Ingoteech gorikab werikab Kohat tabandab got, murot ne bo tai.

³⁰ Ak ingoek Elisapan werikab Usiel bounindetab got ne bo kwandab gorikab Kohatik.

³¹ Ak ingorib ichek moinget, ak meset, ak keldab tait, ak kapkorosusiek, ak tuguk che boisie ichek eng’ ole tilil, ak anget ne kioiye got, ak boisiennyi tugul.

³² Ak ingoek Eleasar weritab Aron tisiindet ne o eng’ bounikab Lawik, ak korib ichek icheget che ribei boisietab ole tilil.

³³ Salu Merari gotab Malik, ak gotab Musik: chuto gorikab Merari.

³⁴ Kiek tugul che kigiit eng’ ichek, koboch che bo arawet agenge ak kwo tai, murenik elfusiek lo ak bogol aeng’.

³⁵ Ak ingoboi Suriel weritab Abiail bounindetab got ne bo kwanisiekab gorikab Merari: ingoteech ichek komostab murot ne bo katam eng’ got.

³⁶ Ak kigigochi werikab Merari baoinik che bo got, ak rateiywekyik, ak lumeiywekyik, ak kelongonikyik che tononie, ak tugukyik tugul, ak boisionikyik tugul.

³⁷ Ak lumeiywek che yiemei seremut, ak kelongonikwak che tononie, ak tigongenikwak, ak boroonikwak.

³⁸ Musa ak Aron ak werikyik che teechei taitab got, komostab kong’asis, ole chorune asis, eng’ taitab emait ne kituiyechin, che ribei boisietab ole tilil agobo boisietab lagokab Israel; ak kibarei kipsagarindet ne rikyin.

³⁹ Kiek tugul murenik elfusiek tiptem ak aeng’ tugul che kigiit che bo Lawik, che kiit Musa ak Aron eng’ ng’atutietab Jehovah, ko u gorikwak, koboch che bo arawet agenge ak kwo tai.

⁴⁰ Ak kilenji Jehovah Musa, Iit ng’etik tugul eng’ lagokab Israel che bo tai eng’ siget, che bo arawet agenge ak kwo tai, ak itet kainaikwak.

⁴¹ Ak inamwa Lawik kobunja (a Jehovah) kewale werik tugul che bo tai eng’ lagokab Israel; ak che twatei tuga che bo Lawik kewale che twatei tuga che bo lagokab Israel.

⁴² Kiit anyun Musa, werik tugul che bo tai eng’ lagokab Israel, ko u ye king’at Jehovah inendet.

⁴³ Eng’ ichek che kigiit ko kiek werik tugul che bo tai, murenik elfusiek tiptem ak aeng’ ak bogol aeng’ ak tamanwogik tisab ak somok, ko u koitetab kainaik, koboch che bo arawet agenge ak kwo tai.

⁴⁴ Kimwachi Jehovah Musa kolenji,

⁴⁵ Nam Lawik ak iwale werik tugul che bo tai eng’ lagokab Israel, ak inam tugab Lawik iwale tugab Israelik. Bunjina Lawik; a Jehovah.

⁴⁶ Ak eng’ katiagetab werik che bo tai che bo lagokab Israel, choto bogol aeng’ ak tamanwogik tisab ak somok che siirei Lawik,

⁴⁷ iibe chi tugul sekelisiek mut che bo met; iibe ko u sekel ne bo ole tilil; (sekel agenge ko gerahisiek tiptem);

⁴⁸ Ak igochi Aron ak werikyik sekelisiek che bo choto siirtootin che kitiage bichoto.

⁴⁹ Kitaach anyun Musa sekelisiek che bo katiaget eng’ ichek che kisiir Lawik.

⁵⁰ Kitaach sekelisiechoto eng’ werikab che bo tai eng’ lagokab Israel; kiek sekelisiek elfut agenge ak bogol somok ak tamanwogik lo ak mut, ko u sekel ne bo ole tilil.

⁵¹ Kiigochi anyun Musa sekelisiechoto bo katiaget Aron ak werikyik, ko u ng’olyotab Jehovah, ko u ye king’at Jehovah Musa.