KAITOSYEK 29 - BUKUIT NE TILIL

Ripsosiekab ng’atutik agobo arawetab tisab

¹ Ak onyoru kayumetab ge ne itabanat eng’ arawet ne bo tisab, eng’ betut ne bo tai eng’ arawanato; amoyai boit age tugul ne bo otwoknot: egu betut ne kiguutei igondisiek eng’ okwek.

² Ak ogochi Jehovah kagochinet ne kibeelei ne bo nyamdutiet ne anyiny; kirgit agenge ne neran, mengit agenge, ak arek tisab che mengichik che libwoben che masiirei kenyit agenge;

³ koboto kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit, ak kebeberwek aeng’ che bo taman eng’ mengit,

⁴ ak kebeberta agenge ne bo taman eng’ aruet age tugul eng’ arechato tisab:

⁵ ak kwesta agenge kobunji kagochinetab tengekto, si keyaunenok kagaigaet:

⁶ ne kitesyin kagochinet ne kibeelei ne bo arawet ne kaleel, ak kagochinennyi ne bo busiek, ak kagochinet ne kibeelei kotugul, ak kagochinennyi ne bo busiek, ak kagochinoikwak che kieei, ko u ng’atutienywa, koek nyamdutiet ne anyiny, kagochinet ne bunei mat kigochin Jehovah.

⁷ Ak onyoru kayumetab ge ne itabanat eng’ betutab taman ne bo arawanito bo tisab; ak onyalili sobonwekwok; amoyai boit age tugul:

⁸ ago ogochini Jehovah kagochinet ne kibeelei ne bo nyamdutiet ne anyiny; kirgit agenge ne neran, ak mengit agenge, ak arek tisab che mengichik che masiirei kenyit agenge; egu che libwoben eng’ okwek:

⁹ ak kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit, kebeberwek aeng’ che bo taman eng’ mengit,

¹⁰ ak kebeberta agenge ne bo taman eng’ aruet age tugul eng’ arechato tisab:

¹¹ kwesta agenge ne bo kagochinetab tengekto; kitesyin choto kagochinetab tengekto ne bo kaigaigaet, ak kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

¹² Ak onyoru kayumetab ge ne itabanat eng’ betutab taman ak mut eng’ arawetab tisab; amoyai boit age tugul ne bo otwoknot, ak oripchi Jehovah igorta eng’ betusiek tisab:

¹³ ak ogoite kagochinet ne kibeelei ne bunei mat, ne bo nyamdutiet ne anyiny eng’ Jehovah; kirugik taman ak somok che neran, mengichik aeng’, arek che mengichik taman ak ang’wan che masiirei kenyit agenge; egu che libwoben:

¹⁴ koboto kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit age tugul eng’ kirugichoto taman ak somok, kebeberwek aeng’ che bo taman eng’ mengit age tugul eng’ mengichoto aeng’,

¹⁵ ak kebebertab taman eng’ aruet age tugul eng’ arechato taman ak ang’wan:

¹⁶ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

¹⁷ Ak ogoite eng’ betut ne bo aeng’ kirugik taman ak aeng’ che neran, mengichik aeng’, arek taman ak ang’wan che mengichik che libwoben che masiirei kenyit agenge:

¹⁸ ak kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

¹⁹ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

²⁰ Ak ogoite eng’ betut ne bo somok kirugik taman ak agenge, mengichik aeng’, arek taman ak ang’wan che mengichik che libwoben che masiirei kenyit agenge;

²¹ koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

²² ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

²³ Ak ogoite eng’ betut ne bo ang’wan kirugik taman, mengichik aeng’, arek taman ak ang’wan che mengichik che libwoben che masiirei kenyit agenge:

²⁴ ak kagochinenywa ne bo busiek, ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

²⁵ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

²⁶ Ak ogoite eng’ betut ne bo mut kirugik sogol, mengichik aeng’, arek taman ak ang’wan che mengichik che libwoben che masiirei kenyit agenge:

²⁷ koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

²⁸ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

²⁹ Ak ogoite kirugik sisiit eng’ betut ne bo lo, mengichik aeng’, arek taman ak ang’wan che mengichik che libwoben che masiirei kenyit agenge:

³⁰ koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

³¹ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

³² Ak ogoite eng’ betutab tisab kirugik tisab, ak mengichik aeng’, arek taman ak ang’wan che mengichik che libwoben che masiirei kenyit agenge:

³³ koboto kagochinenywa ne bo busiek ak kagochinoikwak che kieei, che bo kirugichoto, ak che bo mengichik, ak che bo arek, ko u koitenywa, ko u ng’atutiet:

³⁴ ak kwesta agenge koek kagochinetab tengekto, ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

³⁵ Eng’ betut ne bo sisiit onyoru tuiyetab kaming’inetab ge: amoyai boit age tugul:

³⁶ ago ogoite kagochinet ne kibeelei, kagochinet ne bunei mat, ne bo nyamdutiet ne ng’uu ne anyiny eng’ Jehovah: kirgit agenge, mengit agenge, arek tisab che mengichik che libwoben che masiirei kenyit agenge:

³⁷ bendi ko u koitenywa, ko u ng’atutiet, kagochinenywa ne bo busiek, ak kagochinoikwak che kieei che bo kirgit, che bo mengit, ak che bo arek:

³⁸ ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

³⁹ Ogochini Jehovah chuto eng’ igorwekwok che kiging’at, che kitesyin kaarortaosiekwok, ak kagochinoikwok che ogoitoi eng’ chamnyet, che bo kagochinoikwok che kibeelei, ak che bo kagochinoikwok che bo busiek, ak che bo kagochinoikwok che kieei, ak che bo kagochinoikwok che bo kalyet.

⁴⁰ Ak kimwachi Musa lagokab Israel ko u tugul che king’at Jehovah Musa.