KAITOSYEK 28 - BUKUIT NE TILIL

Ng’atutik agobo korosek ak igorwek

¹ Ak kimwachi Jehovah Musa kolenji,

² Ng’at lagokab Israel ilenji, Orib si ogona eng’ betusiekwok che nyoljin, kagochinennyu, amitwogikyuk che bo kagochinoikyuk che bunei mat, che bo nyamdutik che anyiny eng’ ane.

³ Ak ilenji, Ni kagochinet ne bunei mat ne ogochini Jehovah; arek che libwoben che mengichik, che masiirei kenyit agenge, aeng’ eng’ betut age tugul, kobunji kagochinet ne kibeelei kotugul.

⁴ Igoitoi aruet agenge karon, ak igoite age koskoleny;

⁵ koboto kebeberta agenge eng’ taman ne bo epah ne bo busiek che ng’ootin, kobunji kagochinetab busiek, che kiburuktoi mwaita ne kituei ne yamei kebeberta agenge eng’ ang’wan ne bo hin.

⁶ Noto kagochinet ne kibeelei kotugul, ne kiging’at eng’ tulwetab Sinai koek nyamdutiet ne anyiny, kagochinet ne bunei mat, kigochin Jehovah.

⁷ Ak ingoek kagochinennyi ne keei kebeberta agenge eng’ ang’wan ne bo hin eng’ aruet agenge: irong’jini ole tilil kagochinet ne kieei che ng’wonen eng’ taitab Jehovah.

⁸ Ak igoite aruet age koskoleny: ko u kagochinetab busiek ne igoitoi karon, igoitoi anyun kagochinet ne bunei mat, nyamdutiet ne anyiny eng’ Jehovah.

⁹ Ak igoite arek aeng’, che mengichik, che libwoben, che masiirei kenyit agenge, eng’ betutab sabato, koboto kebeberwek aeng’ che bo taman che bo epah che bo busiek che ng’ootin, kobunji kagochinetab busiek, che kiburuktoi mwaita, koboto kagochinennyi ne kieei:

¹⁰ noto kagochinet ne kibeelei eng’ sabato age tugul, ne kitesyin kagochinet ne kibeelei ne bo kotugul, koboto kagochinennyi ne kieei.

¹¹ Ak eng’ taunaikab arawekwok, ogochini kagochinet ne kibeelei, kirugik aeng’ che mengechen, ak mengit agenge, arek tisab che mengichik che libwoben, che masiirei kenyit agenge.

¹² Koboto kebeberwek somok che bo taman che bo epah che bo busiek che ng’ootin, che kiburuktoi mwaita, kobunji kagochinetab busiek, eng’ kiruk age tugul; ak kebeberwek aeng’ che bo taman che bo busiek che ng’ootin kobunji kagochinetab busiek, che kiburuktoi mwaita, eng’ mengit agenge;

¹³ ak kebebertab taman ne bo busiek che ng’ootin, che kiburuktoi mwaita koek kagochinetab busiek eng’ aruet age tugul; kobunji kagochinet ne kibeelei, ne bo nyamdutiet ne anyiny, kagochinet ne bunei mat kigochin Jehovah.

¹⁴ Ak ingoek kagochinoikwak che keei kebebertab hin ne bo divaik eng’ kiruk, ak kebeberta agenge eng’ somok ne bo hin eng’ mengit, ak kebeberta agenge eng’ ang’wan ne bo hin eng’ aruet: nito kagochinet ne kebeelei ne bo arawetab age tugul ne bo kenyit.

¹⁵ Ak kobunji kwesta agenge kagochinetab tengekto eng’ Jehovah; kigoitoi noto ketesyin kagochinet ne kibeelei kotugul, ak kagochinet ne kieei.

¹⁶ Biitu paska ne bo Jehovah eng’ arawet ne bo tai, eng’ betut ne bo taman ak ang’wan.

¹⁷ Ak egu igorta eng’ betut ne bo taman ak mut ne bo arawanito: kiamei makatinik che ma kinde mermerek eng’ betusiek tisab.

¹⁸ Biitu kayumetab ge ne itabanat eng’ betut ne bo tai; amoyai boisio age tugul ne bo otwoknot:

¹⁹ ago ogoite kagochinet ne bunei mat, kagochinet ne kibeelei, ne kigochin Jehovah; kirugik aeng’ che neran, ak mengit agenge, ak arek tisab che mengichik che masiirei kenyit agenge; egu che libwoben eng’ okwek:

²⁰ ak kagochinenywa ne bo busiek che ng’ootin, che kiburuktoi mwaita: ogoitoi kebeberwek somok che bo taman eng’ kirgit agenge, ak kebeberwek aeng’ che bo taman eng’ mengit;

²¹ ak igoitoi kebebertab taman eng’ aruet age tugul eng’ arechato tisab;

²² kwesta agenge ne bo kagochinetab tengekto, si keyaunenok kagaigaet.

²³ Ogoitoi chuto otesyini kagochinet ne kibeelei ne bo karon, ne kagochinet ne kibeelei kotugul.

²⁴ Ogoitoi ko u noto eng’ betut age tugul, eng’ betusiek tisab, amitwogik che bo kagochinet ne bunei mat, ne bo nyamdutiet ne anyiny eng’ Jehovah: kigoitoi noto ketesyin kagochinet ne kibeelei kotugul, koboto kagochinennyi ne kieei.

²⁵ Ak egu kayumetab ge eng’ betutab tisab; amoyai boisio age tugul ne bo otwoknot.

²⁶ Kogeny ye ogochini Jehovah, eng’ betutab tongoanik, kagochinet ne bo busiek che leelachen eng’ igortang’wong’ ne bo wigisiek, onyoru kayumetab ge ne itabanat; amoyai boisio age tugul ne bo otwoknot:

²⁷ ago ogoite kagochinet ne kibeelei ne bo nyamdutiet ne anyiny eng’ Jehovah; kirugik aeng’ che neran, ak mengit, ak arek tisab che mengichik che masiirei kenyit agenge;

²⁸ ak kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kiruk age tugul, ak kebeberwek aeng’ che bo taman eng’ mengit,

²⁹ ak kebebertab taman eng’ aruet age tugul eng’ arechato tisab;

³⁰ kwesta agenge, ne kiyaunenok kaigaigaet.

³¹ Ogoitoi che kitesyin kagochinet ne kibeelei ne bo kotugul, ak kagochinennyi ne bo busiek, (egu che libwoben eng’ okwek), koboto kagochinoikwak che kieei.