KAITOSYEK 27 - BUKUIT NE TILIL

Konyoru tibik chamjinet kondi tugukab kwandanywa

¹ Kiba korikta anyun tibikab Selopehad weritab Heper, weritab Gilead, weritab Makir, weritab Manase, ne bo ortinwekab Manase weritab Josep: ak chuto kainaikab tibikab Selopehad; Mala, Noa, Hogla, Milka, ak Tirsa.

² Ak kitononso ichek eng’ taitab Musa, ak Eleasar tisiindet, ak eng’ taitab kiruogik ak tuiyet komugul, eng’ kurgetab emait ne kituiyechin, ak kole,

³ Kimechi ong’atet kwandanyo, kima ko boto tuiyet ne kiiyumgei ichegei si kotil let Jehovah, eng’ tuiyetab Kora: ago kime amu tengektanyi inegei; ak kima kotinyei werik.

⁴ Amu nee si keisto kainetab kwandanyo eng’ orennyi amu kima kotinyei wero? Ogonech borotet koboto tupchosiekab kwandanyo.

⁵ Ak kiib Musa ng’alekwak koba taitab Jehovah.

⁶ Ak kimwachi Jehovah Musa kolenji,

⁷ Kamwa iman tibikab Selopehad; igochini iman tipchoto borotet kobunji eng’ tupchosiekab kwandanywa; ak igochi borotetab kwandanywa kobunji.

⁸ Ak imwachi lagokab Israel ilenji, Ngo me chi ama tinyei wero, ogochi cheptanyi borotennyi kobunji.

⁹ Ak ngo matinyei chepto agine, ogochi anyun tupchosiekyik tugukyik.

¹⁰ Ak ngo matinyei che tupcho, ogochi anyun tupchosiekab kwandanyi tugukyik.

¹¹ Ak ngo matinyei kwandanyi che tupcho, ogochi anyun borotennyi chi ne tilia ne negit ne bo orennyi, kobunji; ak egu ng’olyondoni ng’atutiet ne bo kiruoget eng’ lagokab Israel, ko u ye king’at Jehovah Musa.

Keleweni Josua konam boisietab Musa

¹² Ak kilenji Jehovah Musa, Togosu tulwonito bo Abarim, si itoben emet ne kiagochi lagokab Israel.

¹³ Ak ye kaigeer, kiyumin aginye iwe ole mi biguk, ko u ye kigiyum ng’etab komet Aron:

¹⁴ amu kiongelelji ng’olyondennyu eng’ ong’atetab Sin, eng’ boriet ne kibiit eng’ tuiyet, ama ogonyita eng’ ole bo beek kogeerei ichek. (Choto beekab Meriba che bo Kades eng’ ong’atetab Sin.)

¹⁵ Ak kimwachi Musa Jehovah kolenji,

¹⁶ Ingolewen Jehovah, Kamuktaindetab tamirmirikab bik tugul, chito ne imuchi koboi tuiyet,

¹⁷ ne imuchi kwo sang’ eng’ tainywa, ak komong’u eng’ tainywa, ak komuti koba sang’, ak komutu kobwa ga; si maigei kechirek che matinyei mestowo tuiyetab Jehovah.

¹⁸ Ak kilenji Jehovah Musa, Imutu Josua, weritab Nun, chito ne tinyei tamirmiriet, ak igonoor eung’ung’ inendet;

¹⁹ yeityo inde inendet taitab Eleasar tisiindet, ak eng’ taitab tuiyet komugul; ak ing’at inendet eng’ tainywa.

²⁰ Ak inde inendet kebebertab teegistang’ung’, si kobiit kogas it inendet tuiyet komugul ne bo lagokab Israel.

²¹ Ak kotonon inendet eng’ taitab Eleasar tisiindet, si koteepchi inendet kandoiset eng’ taitab Jehovah eng’ kiruogetab Urim: mandoi eng’ ng’olyondennyi, ak komong’u eng’ ng’olyondennyi, inendet ak lagokab Israel tugul, agot tuiyet komugul:

²² ak kiyai Musa ko u ye king’at Jehovah inendet: kiimut Josua kotonon eng’ taitab Eleasar tisiindet, ak eng’ taitab tuiyet komugul:

²³ ak kiigonoor eunekyik inendet, ak king’at inendet, ko u ye kiga mwa Jehovah eng’ Musa.