KAITOSYEK 25 - BUKUIT NE TILIL

Ibetab ge ak saetab kanamonik eng’ Sitim

¹ Ak kimeny Israel Sitim, ak kitoi koipgei ak tibikab Moabik;

² amu kiguur bik koba ole kigochine kanamonikwak tiseiywek; ak kiamis bik, ak kogutung’ji kanamonik.

³ Ak kinamgei Israel ak Baal-peor: ak kilalyo neregekab Jehovah agobo Israel.

⁴ Ak kilenji Jehovah Musa, Nam bounik tugul che bo bik, ak isongininji Jehovah eng’ taitab asista, si koistoegei Israel neregek che koromen che bo Jehovah.

⁵ Ak kilenji Musa kiruogikab Israel, Obar chi age tugul eng’ okwek che kogonamgei ak Baal-peor.

⁶ Ak ogeero, kinyo Israelindet age komutyin tupchosiekyik kobogoriotab Midianik, eng’ taitab Musa, ak eng’ taitab tuiyet komugul ne bo lagokab Israel, ye kita korirtos eng’ kurgetab emait ne kituiyechin.

⁷ Ak kingogeer Pineas weritab Eleasar, weritab Aron tisiindet, kong’eet eng’ kwenutab tuiyet, ak konam ng’otit eng’ eunnyi;

⁸ ak kiisub Israelindonoto agoi emait, ak kotoor ichek tuwai kosore, chichoto bo Israel, ak kobogoriondonoto agine, kosore moennyi. Kisis anyun koroito eng’ lagokab Israel.

⁹ Kiek che kibek eng’ koroyoto bik elfusiek tiptem ak ang’wan.

¹⁰ Ak kimwachi Jehovah Musa kolenji,

¹¹ Kiisto Pineas weritab Eleasar weritab Aron tisiindet, neregekyuk eng’ lagokab Israel, amu kitinyei ng’etkonda eng’ ichek amu ane; mata anyun awong’u lagokab Israel eng’ ng’etkondanyu.

¹² Mwa anyun ile, Keero, kaagochi inendet kayomisennyu ne bo kalyet;

¹³ egu kayomiset ne bo tiseinatet ne bo koigeny eng’ inendet ak eng’ iyotennyi ne biitu let; amu kitinyei ng’etkonda agobo Kamuktaindet, ak koyachi kagaigaet lagokab Israel.

¹⁴ Kigiguure chichoto bo Israel ne kigibar, noto kigibarei koboto kobogoriotab Midianik, Simri weritab Salu, bounindetab gotab kwanisiek eng’ oretab Simeon.

¹⁵ Ak kametab kobogoriotab Midianik, noto kigibar, ko ki Kosbi, che bo Sur; ki kandoindetab gotab kwanisiek eng’ Midian.

¹⁶ Ak kimwachi Jehovah Musa kolenji,

¹⁷ Iim Midianik, ak ibar:

¹⁸ amu iimok eng’ kaberberisienywa, ne king’alenak eng’ ng’olyotab Peor, ak eng’ ng’olyotab Kosbi, cheptab bounindetab Midian, chepkamenywa, ne kigibar eng’ betutab koroito amu ng’olyotab Peor.