KAITOSYEK 24 - BUKUIT NE TILIL

Ng’alek che bo let che bo maoina tetab Balaam, ak koonei Balak inendet

¹ Ak ye kingogeer Balaam kole chamei Jehovah koberur Israelik, ko mawo kou atgai tai, kwo kocheng’ banitwogik, ago kitokyigei ong’atet.

² Ak kitobendo Balaam, ak kigeer Israelik komeng’isiei ko katetgei ko u ortinwekwak; ak kinyonji Tamirmirietab Kamuktaindet inendet.

³ Ak kigetyigei kalewenennyi, ak kole, Kale Balaam weritab Beor, Kale chito ne ki tugotin konyekyik:

⁴ Kale inendet ne kasei ng’alekab Kamuktaindet, Ne keerei ng’ang’utietab Inendet ne bo Kamuktaet, Ak kobutyi ng’ony, ko kayatogis konyekyik:

⁵ Ee Jakobo, kororon ne tia emaisieguk, Ee Israel, kororon ne tia goriguk!

⁶ Kauitogei ko u atebwosiek, Ko u mbarenik che mi ngegusiekab ainet, Ko u ketik che kiguure ahalim che kimin Jehovah, Ko u taragonik che negite beek.

⁷ Rootune beek terenikyik, Ak tebune iyotennyi beek che chang’, Ak eetu laitoriandennyi kosiir Agag, Ak kieeti bounatennyi.

⁸ Kiimutu Kamuktaindet komong’ eng’ Misri; Tinyei kimnatet ne u ne bo soet: Lugui bororiosiek che bunikyik, Ak tonatoni kowekwak komengegitu, Ak mwogei ichek kosore eng’ kipchabonikyik.

⁹ Kiribis, koru ko u ng’etundo, Ak ko u ng’etundo ne kotoy; ng’o ne ing’eeti Iberurot age tugul ne iberurin, Ak chubot age tugul ne chubin.

¹⁰ Ak kilalyo neregekab Balak agobo Balaam, ak kirabach eunekyik: ak kilenji Balak Balaam, Kiaguurin inyo ichub bunikyuk, keero, kaiberur ichek iman mising’ konyil chu somok.

¹¹ Ara mwei ui oldang’ung’ nguno: kialen si aeetin inyoru teegisto ne o; ago keero, kietenen Jehovah teegisoto.

¹² Ak kilenji Balaam Balak, Tos kima amwachi biguk che kiiyogu, alenji,

¹³ Agot ngo kona Balak feda ak tahabu che nyiiei gonnyi, ko mamuchi asiir ye boch ng’olyotab Jehovah, ayai ne mie anan ayai ne ya eng’ magennyu; ne mwaei Jehovah ko noto ne amwae?

¹⁴ Keero, kawe nguno ole mi bikyuk: nyo anyun amwaun kit ne itoi bichu biguk eng’ betusiek che bo let.

¹⁵ Ak kigetyigei kalewenennyi ak kole, Kale Balaam weritab Beor, Kale chito ne ki tugotin konyekyik:

¹⁶ Mwaei inendet ne kasei ng’alekab Kamuktaindet, Ne ingen ng’omnatetab Inendet ne Toror Mising’, Ne keerei ng’ang’utietab Inendet ne bo Kamuktaet, Ak kobutyi ng’ony, ko kayatogis konyekyik:

¹⁷ Ageere, ago ma nguno: Ageere, ago ma negit: Tun mong’une taboiyat Jakobo, Ak ng’eetei siaritab bounatet eng’ Israel, Ak kokwer luukwekab Moab koges, Ak kotui werik tugul che bo icheget che wasegei.

¹⁸ Kiluulei Edom, Ak kiluulei Seir agine che ki bunikyik; Ye yaei Israelik eng’ kimnatet.

¹⁹ Laitorani ne mong’une Jakobo, Ak kong’em che king’et eng’ nganaset.

²⁰ Yeityo kogeer Amalek, ak komwa kalewenennyi, kole, Bo tai Amalek eng’ bororiosiek; Ago kitindinyi kobetyo eng’ kagesunennyi.

²¹ Yeityo kogeer Kenindet ak komwa kalewenennyi, kole, Kim ole imenye, Ak mi kesweng’ung’ ruandet.

²² Ago kibeeti Kenik, Agoi komutin Asur iegu luulen.

²³ Ak kimwa kalewenennyi kole, Bwo, ng’o ne imuchi kosob ye yai Jehovah noto?

²⁴ Ago bunu melisiek ngegutab Kitim, Ak konyalil Asur, ak konyalil Eber, Ak nyoru agine ng’emisiet.

²⁵ Ak king’eet Balaam, kwo oldanyi: ak kiwa Balak agine orennyi.