KAITOSYEK 23 - BUKUIT NE TILIL

Ng’alekab Balaam che bo maoinatet

¹ Ak Kilenji Balaam Balak, Teekwa eng’ yu kaptisisiosiek tisab, ak ichobwa eng’ yu kirugik tisab ak mengichik tisab.

² Ak kiyai Balak ko u ye kiga mwa Balaam; ak kiigoito Balak ak Balaam kirgit ak mengit eng’ kaptisisiet age tugul.

³ Yeityo kolenji Balaam Balak, Tonone ye mi kagochineng’ung’ ne kebeelei si awa; tamangab kotorokwa Jehovah: ak amwaun kiy age tugul ne keborua. Ak kiwa tulwet barak ye lapkei.

⁴ Ak kituiyo Kamuktaindet ak Balaam: ak kolenji, Kaachob kaptisisiosiek tisab, ak kaagoite kirgit ak mengit eng’ kaptisisiet age tugul.

⁵ Ak kiinde Jehovah ng’olyot kutitab Balaam, ak kole, Weekyige Balak, ak ing’alal ko u ni.

⁶ Ak kiweekyigei ole mi Balak, ak keero, kitononi eng’ ole mi kagochinennyi ne kebeelei, inendet, ak bounik tugul che bo Moab.

⁷ Ak kitoi Balaam kalewenennyi kole, Kiimutwa Balak eng’ Aram, Laitoriatab Moab ne bunu tulonokab kong’asis: Kole, Nyo chubwa Jakobo, Ak nyo nerekyi Israel.

⁸ Achuptoi ano ne ma chub Kamuktaindet? Ak anerekyindoi ano ne ma nerekyi Jehovah?

⁹ Amu ageere Israel ami ruandosiek barak, Ak ageere inendet ami tulonok: Ogeero, icheget ko bik che meng’isiei ichegei; Ak magiititoi bororiosiek alak.

¹⁰ Ng’o ne imuchi koiit temburiekab Jakobo, Anan ng’o ne imuchi koiit kebeberta agenge eng’ ang’wan ne bo Israel? Ingame meetab che bo iman, Ak ingogergeit kagesunennyu ak nenyinet!

¹¹ Ak kilenji Balak Balaam, Keyaiywa nee? Kiamutun inyo ichubwa bunikyuk, ak keero, kaiberur ichek mising’.

¹² Ak kiwolji kolenji, Tos manyolja arib amwa ne indoi Jehovah kutinnyu?

¹³ Ak kilenji Balak inendet, Asain ale, nyo kebe oldo age, ole imuchi igeer bichoto; si igeer ole boch kityo, ole memuchi igeer ichek tugul: ak ichubwa bichoto eng’ oloto.

¹⁴ Ak kiimut inendet anyun agoi koit koretab Sopim, agoi tulwet barak ne kiguure Pisga, ak koteech kaptisisiosiek tisab, ak kiigoito kirgit ak mengit eng’ kaptisisiet age tugul.

¹⁵ Ak kilenji Balaam Balak, Tonone yu mi kagochineng’ung’ ne kebeelei, ye kituitosi ak Jehovah eng’ olin.

¹⁶ Ak kitorok Jehovah Balaam, ak konde ng’olyot kutinnyi, ak kolenji, Weekyige ole mi Balak, ak ing’alal ko u ni.

¹⁷ Ak kiwa anyun ole mi inendet, ak ogeero, kitononi eng’ ole negite kagochinennyi ne kibeelei, koboto bounikab Moab. Ak kiteebe Balak kolenji, Kale nee Jehovah?

¹⁸ Ak kimwa kalewenennyi kole, Ng’eet, Balak, ak igas; Epcha it, inye weritab Sipor:

¹⁹ Ma chito Kamuktaindet, kot komwa lembech; Anan weritab chi, kot kosik: Tos kagomwa, ak mayaei? Anan kagomwa, ama yaei kosulda?

²⁰ Keero, kaataach ng’atutiet aberur: Ak kagoberur, ak mamuchi aweech.

²¹ Tomo kogeerji Jakobo tengekto, Ama keerji Israel kiy ne imaasat. Mi koboto inendet Jehovah Kamuktaindennyi, Ak mi cheetab laitoriat kwenunywa.

²² Kiimutu Kamuktaindet ichek eng’ Misri; Tinyei kimnatet ne u ne bo soet.

²³ Mami iman bondit ne kimuchi kebane Jakobo, Ama mi ng’orset ne kimuchi keng’ore Israel: Kimwaei nguno agobo Jakobo ak Israel, kole, Kiyai ne tia Kamuktaindet!

²⁴ Ogeero, kang’eetyo bik ko u ng’etundo ne kotoy, Ak tononi inendet ko u ng’etundo: Maruei agoi koam che bo logennyi, Ak koee korotikab ne kabar.

²⁵ Ak kilenji Balak Balam, Amat ichub, anan iberur agot kitigin.

²⁶ Ago iwolji Balaam Balak, kolenji, Tos mamwaun alenji, Kanyol ayai tugul che mwawa Jehovah?

²⁷ Ak kilenji Balak Balaam, Nyo anyun amutin komosta age; tamangab kocham Kamuktaindet ichubwa bichoto eng’ oloto.

²⁸ Ak kiimut anyun Balak Balaam agoi Peor barak, ne ing’ururi ong’atet.

²⁹ Ak kilenji Balaam Balak, Teekwa eng’ oli kaptisisiosiek tisab, ak ichobwa eng’ yuto kirugik tisab ak mengichik tisab.

³⁰ Ak kiyai anyun Balak ko u ye kaga mwa Balaam, ak kiigoito kirgit ak mengit eng’ kaptisisiet age tugul.