KAITOSYEK 22 - BUKUIT NE TILIL

Balak ak Balaam

¹ Ak kiba lagokab Israel, koba komuung’e warengetab Moab, Jordan bitonin ole negite Jeriko.

² Ak kigeer Balak weritab Sipor tuguk tugul che kiyachi Israelik Amorik.

³ Ak kiiywei Moabik bichoto mising’, amu ki chang’: ak kitoptobenso Moabik amu lagokab Israel.

⁴ Ak kilenji Moabik boisiekab Midian, Amei tuiyoni tuguk tugul che negitenech, ko u ye amei tuga suswekab timin. Ak ki laitoriatab Moab betusiechoto Balak weritab Sipor.

⁵ Ak kiiyokto inendet bik koba oldab Balaam weritab Beor, agoi Petor, ne negite Ainet, noto emetab bikab bororiennyi; kiba koguur, kolenji, Keero, mi yu bik che kibunu Misri: ak yomu emet, ak menyei ole negitena.

⁶ Asain anyun nguno ale, nyo chubwa bichoto; amu kimen kosiira: tamangab aterter, si kobiit kebar, ak aon koba eng’ emoni: amu angen ale ne iberuri kiberuri, ak kichubei ne ichube.

⁷ Ak kiba boisiekab Moab ak che bo Midian koibei kagochinoikab ng’orset eng’ eunekwak; ak kiit oldab Balaam, ak kimwachi ng’alekab Balak.

⁸ Ak kilenji Balaam bichoto, Oruiye yu kemouni, si aibwok ng’alek kogeny, ko u ye machei komwawa Jehovah: ak kitebi bounikab Moab koboto Balaam.

⁹ Ak kinyonji Kamuktaindet Balaam, nyo kolenji, Ng’o bichu omi tugul?

¹⁰ Ak kilenji Balaam Kamuktaindet, Kagoyok bik Balak weritab Sipor, laitoriatab Moab, kobwa oldanyu, kolenja,

¹¹ Keero, kayom emet bik che kibunu Misri: ara anyun, nyo chubwa; tamangab amuch kebarge ak ichek, ak aon komanda eng’ emet.

¹² Ak kilenji Kamuktaindet Balaam, Amat obe ak icheget; amat ichub bichoto: amu iberurotin ichek.

¹³ Ak king’eet Balaam karon, ak kolenji bounikab Balak, Oba emong’wong’: amu kaetena Jehovah kebe ak okwek.

¹⁴ Ak king’eetyo bounikab Moab koba ole mi Balak, ak kolenji, Kaesio Balaam kebwa tugul.

¹⁵ Ak kiiyokto Balak kogeny bounik alak che siirei, ago che konyitotin kosiir che bo tai.

¹⁶ Ak kiit gab Balam, kobwa kolenji, Kale Balak weritab Sipor, Kaigai ameng’ kogerin kiy si menyo ole ami:

¹⁷ amu aeetin inyoru teegisto ne o, ak ayai kiy age tugul ne imwawa: asain anyun ale, nyo chubwa bichu.

¹⁸ Ak kiwolji Balaam otwogikab Balak kolenji, Agot ngo kona Balak feda ak tahabu che nyiiei gonnyi, ko mamuchi asiir ye boch ng’olyotab Jehovah Kamuktaindennyu, si machuchuch anan ates che kamwa inendet.

¹⁹ Asomok anyun ale, otebe yu kemouni agine, si kobiit anai ne mwawa Jehovah ne siirei choto.

²⁰ Ak kinyonji Kamuktaindet Balaam kemoi, konyo kolenji, Ngo kabwa bichu koguurin, ing’eet, obe tugul; ago iyae kityo ng’olyot ne amwaun.

²¹ Ak king’eet Balaam karon, koiito kit ne tebe eng’ sigiriennyi, ak kiba ak bounikab Moab.

²² Ak kilalyo neregekab Jehovah amu kiwa: ak kitonon malaikaiyatab Jehovah eng’ oret koek ne kirindoi inendet. Ak kibunei sigiriennyi, ak kimi koboto inendet otwogikyik aeng’u.

²³ Ak kigeer sigiriet malakaiyatab Jehovah kotononi eng’ oret, ak kiting’e eunnyi rotwetab chok ne kaging’us: ak kiwa taban sigiriet kometo oret, kwo timin: ak kibir Balaam sigiriet, kole koweekyi oret.

²⁴ Ak kitonon malaikaiyatab Jehovah eng’ oret ne mariich eng’ mbarenikab sabibuk, ole ng’otat komosi ak komosi.

²⁵ Ak kigeer sigiriet malakaiyatab Jehovah, ak kirus inatut, ak kiruse keldab Balaam inatut: ak kibir sigiriet kogeny.

²⁶ Ak kiinakta malakaiyatab Jehovah kwo tai, ak kitonone ye mariich, ye kima kimuchi keweekyige komostab tai anan komostab katam.

²⁷ Ak kigeer sigiriet malakaiyatab Jehovah, ak kiru komi Balam barak: kilalyo neregekab Balaam anyun, ak kibir sigiriet eng’ kiroktanyi.

²⁸ Ak kiyat Jehovah kutitab sigiriet kotwek, ak kilenji Balaam, Kayaun nee, si ibira konyil chu somok?

²⁹ Ak kilenji Balaam sigiriet, Amu kechota; nda katinye rotwet, ta kaabarin.

³⁰ Ak kiwolji sigiriet Balaam kolenji, Tos ma a sigirieng’ung’, ne kiilanye koboch keny agoi kora? Tos kicham ayaun ko u ni atkinye tugul? Ak kilenji, Achicha.

³¹ Kiyat anyun Jehovah konyekab Balaam, ak kigeer malaikaiyatab Jehovah kotononi eng’ oret, koting’e eunnyi rotwetab chok ne kaging’us: ak kiing’uruk, kobutyi ng’ony.

³² Ak kilenji malaikaiyatab Jehovah, Amu nee si ibir sigirieng’ung’ konyil chu somok? Keero, kanyo aegu kirindoindeng’ung’, amu imaasat oreng’ung’ eng’ tainnyu:

³³ ak kageera sigiriet, ak kwo taban eng’ tainnyu konyil chuto somok: nda kama wa taban koistoenagei, ta kaabarin iman, ak aunde sigiriet kosob.

³⁴ Ak kilenji Balaam malaikaiyatab Jehovah, Kaayai tengekto; amu kama angen ale itononi eng’ oret si kobiit igirinda: ara anyun, ngo mechame, ko mie aweek.

³⁵ Ak kilenji malaikaiyatab Jehovah Balaam, Oba ak bichoto: ago imwae ng’olyot ne amwaun kityo. Kiba anyun Balaam koboto bounikab Balak.

³⁶ Ak kingogas Balak kole kagonyo Balaam, kwo kotorokta inendet agoi nganasetab Moab, ne mi kiwotetab Arnon, ne mitei tabandab kiwotonoto.

³⁷ Ak kilenji Balak Balaam, Tos kiga ma agimgimin, aguurin? Amu nee si menyo ole ami? Tos mamuchi aeetin iman inyoru teegisto?

³⁸ Ak kilenji Balaam Balak, Keero, kanyonjin: tos atinye kimnatet agot kitigin amwa kiy age tugul? Amwae ng’olyot ne indoi Kamuktaindet kutinnyu.

³⁹ Ak kiba Balaam ak Balak, ak kiit Kiriat-husot.

⁴⁰ Ak kieny Balak tuga ak kechirek, ak kiiyokyi Balaam, ak bounik che kimi koboto inendet.

⁴¹ Ak kingo kagoeech, komut Balak Balaam kotogosta kwo ole mi oldinwek che tororen che bo Baal, ak kigeer eng’ oloto ole bochin bik.