KAITOSYEK 21 - BUKUIT NE TILIL

Erenetab sugunwet

¹ Ak kigas laitoriatab Arad Kananindet ne kimenyei Murot ne bo Tai, kole, bwanei Israelik kobunu oretab Atarim; ak kibargei ak Israel, ak kiluul alak eng’ Israelik.

² Ak kiiyosiechi Israelik Jehovah, kolenji, Ngot igona bichu, ang’eme awong’u nganasokwak.

³ Ak kigas Jehovah ng’alekab Israelik, ak kiigochi Kananik; ak king’em kowong’ ichek koboto nganasokwak: ak kigiguure yoto Horma.

⁴ Ak kiba eng’ tulwetab Hor kobun oretab Nyanjet ne Birir, koyiem emetab Edom: ak kichootyo mugulelwekab bik amu oret.

⁵ Ak kiing’unyng’ung’ji bik Kamuktaindet koboto Musa, kole, Kilya si omutwech kemong’une Misri kebwa kebekyi ong’atet? Amu mami amitwogik, anan beek; ak wechei sobonwekyok amitwogichu terteren.

⁶ Ak kiiyokyi Jehovah bichoto erenok che ng’wonen susenywa ko u mat, ak kisus bik; ak kibek bik che chang’ che bo Israel.

⁷ Ak kiba bik oldab Musa, kolenji, Kogeyai tengekto, amu koging’unyng’ung’ji Jehovah koboten; sa Jehovah, si koistoenech erenochu. Ak kisachi Musa bik.

⁸ Ak kilenji Jehovah Musa, Itany erenet ne u mat ak inde ketit ne itononi: ak ye keer chi age tugul ne kagesus, kosob.

⁹ Ak kiitany Musa erenet ne bo sugunwet, ak kiinde ketit ak kotonon: ak ngo sus erenet chi age tugul, ak konyal erenanato bo sugunwet, kosob.

Kiterteri Amorik ak Basan

¹⁰ Ak kiba lagokab Israel, komuung’e Obot.

¹¹ Ak kiba eng’ Obot, komuung’e Iye-abarim ne mi ong’atet ne tokyingei Moab, komostab kong’asis.

¹² Ak kiba eng’ oloto, komuung’e atebwetab Sered.

¹³ Ak kiba eng’ oloto, komuung’e Arnon bitonin, ne mi ong’atet, ne bunu kiwotetab Amorik: amu Arnon kiwotetab Moabik, kwenutab Moabik ak Amorik.

¹⁴ Sirat eng’ bukuitab Lugosiekab Jehovah amu noto, Ne kiyai eng’ Nyanjet ne Birir, Ak atebwosiekab Arnon,

¹⁵ Ak eng’ atebwosiek Che choringei ole menyei Ar, Ne mi ole negite kiwotetab Moab.

¹⁶ Ak kiba eng’ oloto agoi Beer: noto keringetab beek ne kimwachi Jehovah Musa, kolenji, Iyum bik, si anaga beek.

¹⁷ Kitien anyun Israelik tieni: Ee kutu keringoni bo beek; otienji:

¹⁸ Keringet, ne kibalei che toogunotin che bo bik, Koboto ne igoitoi ng’atutik, ak kirokwekwak. Ak kiba eng’ ong’atet agoi Matana:

¹⁹ ak kiba eng’ Matana agoi Nahaliel: ak kiba eng’ Nahaliel agoi Bamot:

²⁰ ak kiba eng’ Bamot agoi atebwet ne mi mbaretab Moab, agoi tulwet barak ne bo Pisga, ne ing’ururi ong’atet.

²¹ Ak kiiyokto Israelik bik koba oldab Sihon laitoriatab Amorik, kolenji,

²² Chamwa abun emeng’ung’: magimastoi kebendi mbarenik, anan mbarenikab sabibuk; ama kiee beekab keringonik: kibune oret ne o ne bo laitoriat, agoi kesiir kiwoteng’ung’.

²³ Ago ma chamji Sihon Israelik kobun kiwotennyi: ago kiiyum Sihon bikyik tugul, ak koba kobargei ak Israelik eng’ ong’atet, ak kiit Jahas: ak kibargei ak Israel.

²⁴ Ak kibar Israel inendet eng’ rotwetab chok, ak kinam emennyi koboch Arnon agoi Jabok, agoi kiwotetab bikab Amon: ak king’otat kiwotetab bikab Amon.

²⁵ Ak kiluul Israelik nganasochoto tugul: ak kimeny Israelik nganasok tugul che bo Amorik, eng’ Hesbon ak eng’ nganasokyik tugul.

²⁶ Amu Hesbon ko ki nganasetab Sihon laitoriatab Amorik, ne kiga kobargei ak laitoriatab Moab ne ki bo tai, ak kirebe emennyi komugul ne kimi eunnyi, agoi Arnon.

²⁷ Mwaei eng’ noto anyun ichek eng’ kalewenaik kole, Obwa Hesbon, Ingeteech nganasetab Sihon ak kigimit:

²⁸ Amu kamandae mat Hesbon, Kamandae liblibenetab mat nganasetab Sihon: Kagobeel Ar ne bo Moab, Ak kiptainik che bo ole sutotin che bo Arnon.

²⁹ Bwo, inye Moab Kaolusye, okwek bikab Kemos: Kagogoito werikyik che kichililso kogochi Sihon laitoriatab Amorik, Koboto tibikyik, koek luulenik.

³⁰ Kagemwok; kagolus Hesbon agoi Dibon, Ak kageng’em agoi Nopa, Ne itei Medeba.

³¹ Kimeny anyun Israelik emetab Amorik.

³² Ak kiiyokto Musa bik kosegei Jaser, ak kiluul nganasokyik, ak kion Amorik che kimi oloto.

³³ Ak kiweek kotogosta kobun oretab Basan: ak kimanda anyun Og laitoriatab Basan kwo kobargei ak ichek, inendet ak bikyik tugul, kibargei eng’ Edrei.

³⁴ Ak kilenji Jehovah Musa, Ameiywei inendet: amu kande inendet eung’ung’ koboto bikyik tugul, ak emennyi; ak iyachini inendet ko u ye kiiyachi Sihon laitoriatab Amorik, ne kimenyei Hesbon.

³⁵ Kibar anyun inendet, koboto werikyik, ak bikyik tugul, kot ko ma ng’etyi inendet agot agenge: ak kibunji ichek emennyi.