KAITOSYEK 20 - BUKUIT NE TILIL

Meetab Miriam

¹ Ak kiit tuiyet komugul ne bo lagokab Israel ong’atet ne bo Sin, eng’ arawet ne bo tai: ak kitebe Kades; ak kimechi Miriam oloto, ak kigitub eng’ oloto.

² Ak kimanyor tuiyet beek: ak kiiyumgei bik kobolji Musa ak Aaron.

³ Ak kibolyo bik ak Musa, komwaei kolen, Nda kiga kibegu ye kibegu tupchosiekyok eng’ taitab Jehovah!

⁴ Amu nee si omutu tuiyetab Jehovah kobwa ong’atani, si kobiit kebegu eng’ oli, ak tukyok?

⁵ Amu nee si omoong’wech ketogosu eng’ Misri, omutwech kebwa oli ya? Koret ne mabitye bek, anan logoekab mogoonik, anan sabibuk, anan logoek che eechen; ama mi beek che keei.

⁶ Ak kiba Musa ak Aron eng’ ole mi tuiyet, agoi kurgetab emait ne kituiyechin, ak kiing’urukso kot kotiiny togochikwak ng’ony: ak komong’ji lilindab Jehovah ichek.

⁷ Ak kimwachi Jehovah Musa kolenji,

⁸ Nam siarit, ak iyum tuiyet, inye ak Aron, ng’etab komet, yeityo ong’alalji ruandet kogeerei ichek, si kogon beekyik; ak imoong’u beek eng’ ruandet, igochi ichek: si inage beek tuiyet koee ak tukwak.

⁹ Ak kiinem Musa siarit eng’ taitab Jehovah, ko u ye king’at inendet.

¹⁰ Ak kiiyum Musa ak Aron tuiyet kotuiyo eng’ taitab ruandet, ak kolenji, Ogas anyun nguno okwek ngelelichu; tos kimoong’wok beek eng’ ruandani?

¹¹ Ak kinamji Musa eunnyi barak, ak kokwer ruandet eng’ siarinnyi konyil aeng’: ak kiisururgei beek che chang’, ak kiee tuiyet beek ak tukwak.

¹² Ak kilenji Jehovah Musa ak Aron, Moiti tuiyoni emet ne kiagochi, amu ma oyana ogonyita eng’ taitab lagokab Israel.

¹³ Bo beechu Meriba; amu kiborio lagokab Israel ak Jehovah, ak kiibarta tililindanyi eng’ tainywa.

¹⁴ Ak kiiyokto Musa bik eng’ Kades koba oldab laitoriatab Edom, kolenji, Kale tupcheng’ung’ Israel, ingen nyalilwogik tugul che kigonyoruech:

¹⁵ ko u ye kichortagei kwanisiekyok koba Misri, ak kigimeny Misri kenyisiek che chang’; ak kiyaiywech Misrik ne ya, ak kwanisiekyok:

¹⁶ ak kingerirji Jehovah kogas rirekyok, ak kiiyok malaikaiyat, konyo komutwech kemong’une Misri: ak keero, kimi Kades, nganaset ne mi kiwoteng’ung’ taban.

¹⁷ Kaigai igonech kebun emeng’ung’: magibune mbar anan mbarenikab sabibuk, ak magiee beek che bo keringonik: kibune oret ne o kityo ne bo laitoriat, magimastoi kebendi tai anan katam, agoi kesiir kiwoteng’ung’;

¹⁸ ak kilenji Edom inendet, Mebune emennyu, si mabokyin ak rotwetab chok.

¹⁹ Ak kilenji lagokab Israel, Kibune oret ne o: ak ngee beeguk, ane ak tukyuk, agonu anyun alyet ne yamegei: kona kityo abun eng’ kelyekyuk, mayae kiy.

²⁰ Ak kile, Mebune. Ak kimong’ Edom koboto bik che chang’, konyo kobargei ak inendet eng’ kimnatet.

²¹ Kiete anyun Edom Israel kobun kiwotennyi: kiweeigei anyun Israel kobagakta inendet.

Meetab Aron

²² Ak kiba eng’ Kades: ak kiit tuiyet komugul ne bo lagokab Israel tulwetab Hor.

²³ Ak kimwachi Jehovah Musa ak Aron eng’ tulwetab Hor, eng’ kiwotetab emetab Edom, kolenji,

²⁴ Tun kiyumi Aron koboto bikyik: amu maitei emet ne kiagochi lagokab Israel, amu kiobistoe ng’olyondennyu eng’ beekab Meriba.

²⁵ Imutu Aron ak werinnyi Eleasar, kobwa tulwetab Hor:

²⁶ ak ireegune Aron ngoroikyik, ak ilaakyi Eleasar werinnyi: ak kiyum Aron koboto bikyik, si komechi oloto.

²⁷ Ak kiyai Musa ko u ye kang’at Jehovah: ak kitogosta koba tulwetab Hor kogeeroti tuiyet komugul.

²⁸ Ak kiireegune Musa Aron ngoroikyik, ak kolaakyi werinnyi Eleasar; ak kimechji Aron oloto eng’ tulwet barak: ak kichorgei Musa ak Eleasar eng’ tulwet.

²⁹ Ak ye kingogeer tuiyet komugul kole kagome Aron, korirji Aron betusiek sosom, kirirji got tugul ne bo Israel.