KAITOSYEK 2 - BUKUIT NE TILIL

Komoswekab bororiosiekab Israel eng’ banda

¹ Ak kimwachi Jehovah Musa ak Aron, kolenji,

² Ingoteech chi age tugul eng’ lagokab Israel ole mitei songoliennyi, koboto itondab meng’otetab gorik che bo kwanisiekwak: ingoteech emaisiekwak kotokyigei emait ne kituiyechin koyiem.

³ Ingoteech komostab kong’asis ole chorune asista, icheget che ibortoi songolietab nganasetab Juda, ko u lugosiekwak: ak ingoek bounindetab lagokab Juda Nason weritab Aminadab.

⁴ Ak kiek lugennyi koboto choto kigiit eng’ ichek, elfusiek tamanwogik tisab ak ang’wan ak bogol lo.

⁵ Ak ingoteech che bo oretab Isakar korupgei: ak ingoek bounindetab lagokab Isakar Netanel weritab Suar:

⁶ ak kiek lugennyi koboto choto kigiit eng’ ichek, elfusiek konom ak ang’wan ak bogol ang’wan:

⁷ ak oretab Sebulun: ak ingoek bounindetab lagokab Sebulun Eliab weritab Helon:

⁸ ak kiek lugennyi koboto choto kigiit eng’ ichek, elfusiek konom ak tisab ak bogol ang’wan.

⁹ Kiek tugul che kigiit che bo nganasetab Juda, elfusiek bogol ak tamanwogik sisiit ak lo ak bogol ang’wan, ko u lugosiekwak. Choto che indoi.

¹⁰ Tebe songoliet ne bo nganasetab Reuben komostab murot ne bo tai, ko u lugosiekwak: ak ingoek bounindetab lagokab Reuben Elisur weritab Sedeur.

¹¹ Ak kiek lugennyi koboto choto kigiit eng’ ichek, elfusiek artam ak lo ak bogol mut.

¹² Ak ingoteech che bo oretab Simeon korupgei: ak ingoek bounindetab lagokab Simeon Selumiel weritab Surisadai.

¹³ Ak kiek lugennyi koboto choto kigiit eng’ ichek, elfusiek konom ak sogol ak bogol somok:

¹⁴ ak oretab Gad: ingoek bounindetab lagokab Gad Eliasap weritab Reuel:

¹⁵ ak kiek lugennyi koboto choto kigiit eng’ ichek, elfusiek artam ak mut ak bogol lo ak konom.

¹⁶ Kiek tugul che kigiit che bo nganasetab Reuben elfusiek bogol ak konom ak agenge ak bogol ang’wan ak konom, ko u lugosiekwak. Bendi chuto koegu che bo aeng’.

¹⁷ Yeityo anyun kwo tai emait ne kituiyechin, koboto nganasokab Lawik che mi kwenutab chun alak: ko u ye teechei emaisiekwak, kobendi ko u noto eng’ banda, ingotebe chi tugul komostanyi, ole mi songolikwak.

¹⁸ Tebe songoliet ne bo nganasetab Epraim cherongo ko u lugosiekwak: ak ingoek Elisama weritab Amiud bounindetab lagokab Epraim.

¹⁹ Ak kiek lugennyi koboto choto kigiit eng’ ichek, elfusiek artam ak bogol mut.

²⁰ Ak ne rubei inendet ko oretab Manase: ak ingoek Gamaliel weritab Pedasur bounindetab lagokab Manase:

²¹ ak kiek lugennyi koboto choto kigiit eng’ ichek, elfusiek sosom ak aeng’ ak bogol aeng’:

²² ak oretab Benjamin: ingoek Abidan weritab Gideoni bounindetab lagokab Benjamin:

²³ ak kiek lugennyi koboto choto kigiit, eng’ ichek, elfusiek sosom ak mut ak bogol ang’wan.

²⁴ Kiek tugul che kigiit eng’ nganasetab Epraim elfusiek bogol ak sisiit ak bogol agenge, ko u lugosiekwak. Bendi chuto koegu che bo somok.

²⁵ Tebe songoliet ne bo nganasetab Dan murot ne bo katam, ko u lugosiekwak: ak ingoek Aieser weritab Amisadai bounindetab lagokab Dan.

²⁶ Ak kiek lugennyi koboto choto kigiit eng’ ichek, elfusiek tamanwogik lo ak aeng’ ak bogol tisab.

²⁷ Ak choto che teechei korupgei ak inendet ko oretab Aser: ak ingoek Pagiel weritab Okran bounindetab lagokab Aser.

²⁸ Ak kiek lugennyi koboto choto kigiit eng’ ichek, elfusiek artam ak agenge ak bogol mut:

²⁹ ak oretab Naptali: ingoek Aira weritab Enan bounindetab lagokab Naptali:

³⁰ ak kiek lugennyi koboto choto kigiit eng’ ichek, elfusiek konom ak somok ak bogol ang’wan.

³¹ Kiek tugul che kigiit che bo nganasetab Dan elfusiek bogol ak konom ak tisab ak bogol lo. Bendi chuto koletu, ak songolikwak.

³² Chu che kigiit eng’ lagokab Israel ko u gorikab kwanisiekwak: tugul che kigiit che bo nganasok ko u lugosiekwak ko ki elfusiek bogol lo ak somok ak bogol mut ak konom.

³³ Ago kima kiitito Lawik lagokab Israel; ko u tugul che king’at Jehovah Musa.

³⁴ Kiyai anyun ko u noto lagokab Israel: ko u tugul che king’at Jehovah Musa, kiteech anyun ko u noto eng’ ole mi songolikwak, ak kiba ko u noto, age tugul ko u orenywa, ko u gorikab kwanisiekwak.