KAITOSYEK 19 - BUKUIT NE TILIL

Kaanyinyetab ge ne bo bik che katwa kiy ne kame

¹ Ak kimwachi Jehovah Musa ak Aron kolenji,

² Konetisiet ni ne bo ng’atutiet ne kigong’at Jehovah kole, Mwachi lagokab Israel kogetun roriat ne birir ne matinyei berut, ne libwob, ne tomo kerat:

³ ak igochi Eleasar tisiindet, ak kokweri kwo sang’utab nganaset, ak koeny chito eng’ tainnyi:

⁴ ak korooch Eleasar mornennyi korotikab roriandanato, ak koisisie korotichoto kotokyi taitab emait ne kituiyechin, konyil tisab:

⁵ ak ingobeel chito roriandanato eng’ tainnyi; koboto muitanyi, ak banyekyik, ak korotikyik, ak eiyandennyi:

⁶ ak konam tisiindet tarakwet, ak husop, ak ngoriet ne birir, ak kowirji mat ne kagibeele roriat.

⁷ Yeityo komwet tisiindet ngoroikyik, ak koungei, ak ye ibata, konyo nganaset, ak muruonitu tisiindonoto agoi koimen.

⁸ Ak mwetei ngoroikyik inendet ne beelei roriandanato, ak koungei, ak muruonitu agoi koimen.

⁹ Ak ingoyum orekab roriandanato chito ne ma ng’wan, ak konde sang’utab nganaset eng’ komosta ne tilil, ak kegonorji choto tuiyetab lagokab Israel koek beekab katabanet: nito kagochinetab tengekto.

¹⁰ Ak mwetei ngoroikyik ne iyumi orechato, ak komuruonit agoi koimen: ak egu nito ng’atutiet ne bo koigeny eng’ lagokab Israel ak kipsagarindet ne meng’isiei eng’ kwenunywa.

¹¹ Muruonitu betusiek tisab inendet ne twaei musto ne bo chi age tugul:

¹² ianyinyegei beechoto inendet eng’ betutab somok, ak kotililit eng’ betutab tisab: ago ngot ko meanyinygei eng’ betutab somok, ko matililitu eng’ betutab tisab.

¹³ Imuruoni gotab Jehovah age tugul ne twaei mustab chi age tugul ne kame, ama ianyingei; king’etoi chichoto eng’ Israel: amu ma kiise beekab katabanet, muruon anyun inendet; ak ta komi muruonindanyi inendet.

¹⁴ Ng’atutiet ni ne bo chi ne kame eng’ go: muruonitu eng’ betusiek tisab chi age tugul ne wendi emainato orit, ak age tugul ne mi emait.

¹⁵ Ak ng’wan kiy age tugul ne yatat, ne ma kirat kit ne kigere.

¹⁶ Ak muruonitu betusiek tisab age tugul ne twaei eng’ kewanin, chi ne kogibar eng’ rotwetab chok, anan musto anan kowetab chito, anan ko kererit.

¹⁷ Ak ingoib ichek orekab kagochinet ne kagebeel ne bo tengekto, agobo inendet ne muruon, ak kotesyi orechato mi teret beek che rootei;

¹⁸ ak konam chito ne kigianyiny husop, ak korooch beechoto, ak koise emait, ak tuguk tugul, ak bik che komi oloto, ak inendet ne kotwa kowet, anan ne kogibar, anan musto, anan ko kererit:

¹⁹ ak kois chito ne kigianyiny, inendet ne muruon, eng’ betutab somok, ak eng’ betutab tisab; ak koanyiny inendet eng’ betutab tisab; ak ingomwet ngoroikyik, ak koungei, ak koanyinyit ko kaimen.

²⁰ Ak chito ne muruon, ne ma ianyinygei, keistoi chichoto eng’ kwenutab tuiyet, amu kagong’wanit ole tilil ne bo Jehovah: ma kiise inendet beek che bo katabanet; muruon inendet.

²¹ Egu ng’atutiet ne bo agoi eng’ ichek: ak mwetei ngoroikyik inendet ne isisie beekab katabanet; ak muruonitu agoi koimen inendet ne twaei beechoto bo katabanet.

²² Ak ng’wanitu kiy age tugul ne twaei chichoto muruon; ak muruonitu agoi koimen inendet ne twaei kioto.