KAITOSYEK 18 - BUKUIT NE TILIL

Boisionikab Lawik ak tuguk che kigigochin

¹ Ak kilenji Jehovah Aron, Oibe tengektab ole tilil, inye ak weriguk, ak gotab kwanisieguk: ak oibe tengektab tiseinateng’wong’, inye ak weriguk.

² Ak imutu korik tupchosieguk agichek, oretab Lawi, oretab kwandang’ung’, si kobiit onamge ak icheget, ak koboisieun: ago otebe taitab emait ne bo baornatet, inye ak weriguk.

³ Ak korib ichek ng’atutieng’ung’, ak ng’atutiet ne bo Emait komugul: ago amat kerikyi tuguk che bo ole tilil anan kapkorusut, si mabek ichek, anan ko okwek.

⁴ Ak kiyomenen bichoto, ak korib ng’atutietab emait ne kituiyechin, agobo boisiet tugul ne bo Emait: amat korikyok kipsagarindet.

⁵ Ak orib ng’atutietab ole tilil, ak ng’atutietab kapkorusut si mata kobiit neregek kogeny agobo lagokab Israel.

⁶ Ogeero, kaataban ane tupchosiekwok Lawik eng’ lagokab Israel: egu ichek kagochinet eng’ okwek, ne kigochin Jehovah si kobois eng’ emait ne kituiyechin.

⁷ Ak orib inye ak weriguk tiseinateng’wong’ agobo kiy age tugul ne bo kapkorusut, ak che bo choto mi anget ne kigioye, orit; ak oboisie: kagonok tiseinatet koek boisietab konunet: ak kibarei kipsagarin ne rikyin.

⁸ Ak kilenji Jehovah Aron, Keero, kaagonin ripset ne bo konunoikyuk che kinamjin barak, tuguk tugul che itabanotin che bo lagokab Israel, kiagonin ak weriguk tuguchoto amu kaiilset, koek ng’atutiet ne bo agoi.

⁹ Egu cheguk tukchoto eng’ che tililen mising’, che kita kibeelei: kiy age tugul ne konu ichek, kagochinenywa age tugul ne bo busiek, ak kagochinenywa age tugul ne bo tengekto, ak kagochjinnenywa age tugul ne bo kachililutiet, che ibwa, tililitu mising’ choto eng’ inye ak weriguk.

¹⁰ Iame tukchoto eng’ ole tilil: amei age tugul ne muren; egu ne tilil eng’ inye.

¹¹ Ak neng’ung’ ni agine; kagochinenywa ne kinamjin barak ne bo konunenywa, agot kagochinoikwak tugul che kiongoi che bo lagokab Israel: kaagonin choto, koboto weriguk ak tibiguk, ko u ng’atutiet ne bo koigeny: amei chi age tugul ne bo gong’ung’ ne ma ng’wan.

¹² Kaagonin tugul che miachen che bo mwanik, ak divaik tugul che kororon che bo kesisietab sabibuk, ak che bo bek che miachen, tongoanikwak tugul che kigochin Jehovah.

¹³ Bunjinin tongoanik che bo tuguk tugul che mi emenywa, che ipchin Jehovah; amei age tugul ne ma ng’wan ne bo gong’ung’.

¹⁴ Bunjinin kiy age tugul ne itabanat eng’ Israel.

¹⁵ Bunjinin age tugul ne yatei iyotet, eng’ bik ak eng’ che kiyagi, che igochin ichek Jehovah: ago itiachi iman che bo tai eng’ siget, ak itiachi che twatei che ng’wonen eng’ che kiyagi.

¹⁶ Ak choto che kitiachi eng’ icheget che bo koboch arawet agenge ak kwo tai, itiachi ko u kamanutiet ne igerjini koek fedaisiekab sekelisiek mut, ko u sekel ne bo ole tilil (noto ko gerahisiek tiptem).

¹⁷ Ago amat itiach ne twatei teta, anan ne twatei kechiriet, anan ne twatei ng’ororiet; tililen choto: iise kaptisisiet korotikwak, ak ibeel mwanikwak koek kagochinet ne bunei mat, koek nyamdutiet ne anyiny eng’ Jehovah.

¹⁸ Ak kobunjin banyekwak, ko u ye neng’ung’ tagatet ne keongoi, ak chatit ne bo komostab tai.

¹⁹ Kaagonin koboto weriguk ak tibiguk kagochinoik tugul che kinamjin barak che bo tuguk che tililen, che igochin lagokab Israel Jehovah, ko u ng’atutiet ne bo koigeny; nito kayomisetab munyuk ne bo koigeny eng’ taitab Jehovah eng’ inye ak eng’ iyoteng’ung’ koboten.

²⁰ Ak kilenji Jehovah Aron, Menyoru borotet eng’ emenywa, amenyoru kebeberta age tugul eng’ kwenunywa: ane kebebertang’ung’ ak boroteng’ung’ eng’ kwenutab lagokab Israel.

²¹ Ogeero, kaagochi lagokab Lawi kebeberwek tugul che bo taman eng’ Israel koek borotenywa, kogeere boisienywa ne yaei, noto boisietab emait ne kituiyechin.

²² Koboch nguno ko marikyin lagokab Israel emait ne kituiyechin, si manyor tengekto, ak kobek.

²³ Ago yaei Lawik boisietab emait ne kituiyechin, ak koib tengektanywa: egu nito ng’atutiet ne bo koigeny eng’ ibinwekwok tugul, ak manyoru borotet ichek eng’ lagokab Israel.

²⁴ Amu kaagochi Lawik koek borotenywa kebebertab taman ne bo lagokab Israel, ne igochjin ichek Jehovah koek kagochinet ne kinamjin barak: kaamwachi anyun ichek amu noto, alenji, Monyoru borotet eng’ kwenutab lagokab Israel.

²⁵ Ak king’alalji Jehovah Musa kolenji,

²⁶ Mwachi kogeny Lawik, ilenji, Ye otaach kebeberwekab taman eng’ lagokab Israel, choto kaagonok kobunu ichek, koek boroteng’wong’, ogoite anyun kebebertab taman eng’ kebeberato koek kagochinet ne kinamjin barak, kobunji Jehovah.

²⁷ Ak kiityok kagochineng’wong’ ne kinamjin barak, ko u ye kiiti bek che bo ruanyut ne kiborse, ak ko u nyiietab ole kitue sabibuk.

²⁸ Ogochini Jehovah ak okwek ko u noto kagochinet ne kinamjin barak ne bo kebeberwekwok tugul che bo taman, che otaache eng’ lagokab Israel; ak ogochi Aron tisiindet kagochinet ne kinamjin barak, ne bo Jehovah, ne bo noto.

²⁹ Ogoitoi kagochinet age tugul ne kinamjin barak, ne bo Jehovah, eng’ konunoikwok tugul, eng’ choto miachen, kebebertanyi ne kigitaban.

³⁰ Mwachi anyun ichek amu noto, ilenji, Ye onamjini barak eng’ choto miachen, kiityin anyun Lawik ko u ye kiiti ruratet eng’ ruanyut ne kiborse, ak ko u ye kiiti ruratet eng’ ole kitue sabibuk.

³¹ Ak oam choto eng’ komoswek tugul, okwek ak bikab gorikwok: amu choto melekwekwok che bo boisieng’wong’ eng’ emait ne kituiyechin.

³² Ak moibe tengekto eng’ noto, ye kaonamji barak che miachen eng’ choto: ak mong’wanit tuguk che tililen che bo lagokab Israel, si mobegu.