KAITOSYEK 17 - BUKUIT NE TILIL

Siaritab Aron Kong’oti

¹ Ak kimwachi Jehovah Musa kolenji,

² Ng’alalji lagokab Israel, ak iibune siarisiek, siarit agenge eng’ got age tugul ne bo kwanisiekwak, eng’ bounikwak, ko u gorikab kwanisiekwak, egu siarisiek taman ak aeng’. Sirji kainetab chi age tugul siarinnyi.

³ Ak isirji siaritab Lawi kainetab Aron: amu bunjin siarit agenge bounindet age tugul ne bo gorikab kwanisiekwak.

⁴ Yeityo igonor siarisiechoto eng’ emait ne kituiyechin eng’ taitab baornatet, ole kituiyechini ak okwek.

⁵ Yeityo kong’at siaritab chito ne aleweni; ak awong’u eng’ tainnyu kang’unyng’ung’et ne ing’unyng’ung’jinok lagokab Israel.

⁶ Ak king’alalji Musa lagokab Israel, ak kiigochi bounikwak tugul siarisiek, siarit agenge eng’ bounindet age tugul, ko u gorikab kwanisiekwak, siarisiek taman ak aeng’: ak kimitei siaritab Aron koboto siarisiekwak.

⁷ Ak kigonor Musa siarisiechoto eng’ taitab Jehovah eng’ emaitab baornatet.

⁸ Ak eng’ betut ne kiisubi betunoto, kwo Musa emaitab baornatet orit; ak ogeero, kogong’at siaritab Aron ne bo oretab Lawi, ak koyesio taptok, ak kogoi lagoek che ruriotin che kiguure almond.

⁹ Ak kiib Musa siarisiek tugul kobunu taitab Jehovah si konde taitab lagokab Israel tugul: ak kigeer, ak kiinem chi age tugul siarinnyi.

¹⁰ Ak kilenji Jehovah Musa, Ketite siaritab Aron kwo taitab baornatet, si kegonor koek kaborunet amu lagokab ngelelik; si kobiit iwong’u kang’unyng’ung’enywa ne ing’unyng’ung’jina, si mabek.

¹¹ Kiyai anyun Musa ko u noto: ko u ye king’at Jehovah, kiyai ko u noto.

¹² Ak kimwachi lagokab Israel Musa kolenji, Keero, kagibegu, kagilusye, kagilusye tugul.

¹³ Meei chi age tugul ne rikyin gotab Jehovah: tos kiwong’uge achek tugul?