KAITOSYEK 16 - BUKUIT NE TILIL

Bistoetab Kora, Datan ak Abiram

¹ Kiiyum bik anyun Kora weritab Isar weritab Kohat weritab Lawi, koboto Datan ak Abiram, werikab Eliab, ak On weritab Pelet, werikab Reuben:

² ak kong’eetyo eng’ taitab Musa koboto lagokab Israel alak, bounik bogol aeng’ ak konom che bo tuiyet che kigiguur kobwa ole katuiyechi bik, bik che toogunotin:

³ ak kiiyumgei ichegei si kobiit kotil let Musa ak Aron, ak kolenji, Oeetigei, amu tilil tuiyoni komugul, chi age tugul eng’ ichek, ak mi Jehovah kwenunywa. Amu nee si oeetgei osiir tuiyetab Jehovah?

⁴ Ak ye kingogas Musa ng’olyondonoto, kong’uruk kot koit ng’ony togennyi:

⁵ ak kimwachi Kora ak bikyik kolenji, Iboru Jehovah mutai karon che chechik, ak ne tilil, ak koguur kwo ole mi inendet: chichoto leweni, koguurei korikyi inendet.

⁶ Oyai ko u ni; oib terenik okwek, inye Kora, ak biguk tugul;

⁷ ak onde mastinwek terenichoto orit, ak onde mutai karon nyamdutik che kibeelei eng’ taitab Jehovah: ak tilil chichoto leweni Jehovah; kaoeetge okwek, werikab Lawi.

⁸ Ak kilenji Musa Kora, Ogaso, okwek, werikab Lawi:

⁹ tos ogeere ole ming’in ng’olyondoni eng’ okwek, amu kiitabanak Kamuktaindetab Israel eng’ tuiyetab Israel, si komutak orikyi inendet; si oyai boisietab gotab Jehovah, ak otononse eng’ taitab tuiyet oot ichek;

¹⁰ ak kigomutun irigu, ak tupchosieguk tugul werikab Lawi? Tos omache tiseinatet agine?

¹¹ Koyumgei anyun inye oegu agenge ak biguk otil let Jehovah: Aron ko ng’o kot ong’unyng’ung’ji?

¹² Ak kiiyokto Musa chito keguur Datan ak Abiram werikab Eliab: ak kile, Magibwane.

¹³ Tos igeere ile kiy ne ming’in ye kiimutwech ketogosu eng’ emet ne ki nyiitat chego ak kumik, si ibarjech ong’atani, ak imache iegu bounindet iboiywech?

¹⁴ Ak koboto noto ko ma imutyech emet ne nyiitat chego ak kumik, ama igonech boratetab mbarenik ak che bo sabibuk: tos imache ibalu konyekab bichu? Magibwane.

¹⁵ Ak kinerech Musa mising’, ak kilenji Jehovah, Amecham kagochinenywa: tom aibe ichek agot sigiriet agenge, ak tom anyalil agot chi agenge eng’ ichek.

¹⁶ Yeityo kolenji Musa Kora, Obwa taitab Jehovah mutai, inye ak tuiyeng’wong’ komugul, ak Aron:

¹⁷ ak koib chi tugul terennyi, ak konde nyamdutik che kibeelei, yeityo koib chi tugul terennyi konyo taitab Jehovah, terenik bogol aeng’ ak konom; ak iibu tereng’ung’ inye ak Aron, chi tugul ak terennyi.

¹⁸ Ak kiib anyun chi tugul terennyi, ak konde mat orit, ak konde tuguk che kibeelei mat barak, ak kotonon eng’ kurgetab emait ne kituiyechin koboto Musa ak Aron.

¹⁹ Ak kiiyum Kora tuiyet komugul kotil let ichek eng’ kurgetab emait ne kituiyechin: ak kimong’ lilindab Jehovah eng’ taitab tuiyet tugul.

²⁰ Ak kimwachi Jehovah Musa ak Aron kolenji,

²¹ Otabanegei tuiyoni okwek, si kobiit awong’ ichek ngunoto.

²² Ak kiing’urukso kot kotiiny togochikwak ng’ony ak kole, Ee Kamuktaindet, Kamuktaindet ne bo tamirmirikab bik tugul, tos inerekyini tuiyet komugul ngo yai chito agenge tengekto?

²³ Ak king’alalji Jehovah Musa kolenji,

²⁴ Mwachi tuiyet ilenji, Oistoegei meng’otetab Kora ak Datan ak Abiram.

²⁵ Ak king’eet Musa kwo oldab Datan ak Abiram: ak kiisub inendet boisiekab Israel.

²⁶ Ak kimwachi tuiyet kolenji, Asaok ale oistoegei emaisiekab kiptengeginichu, amat otwa kiy age tugul nenywa, si ma kiwong’wok eng’ tengekwogikwak.

²⁷ Kiistogei anyun ichek eng’ meng’otetab Kora ak Datan ak Abiram, eng’ komosta age tugul: ak kibwa sang’ Datan ak Abiram, ak kitononso eng’ kurgetab emaisiekwak, koboto osotikwak, ak werikwak, ak lagokwak.

²⁸ Ak kile Musa, onae ni ole kiiyokwa Jehovah nyo ayai boisionichu tugul; amu ma ayai eng’ magennyu.

²⁹ Ngot kobek bichu ko u ye begu bik tugul, anan ngeyachi ichek ko u ye kiyachin bik tugul, ko kaga ma iyokwa Jehovah.

³⁰ Ago ngot koyai Jehovah kiy ne tounen, ak koyat ng’ony kutinnyi, ak kolugui ichek koboto tugukwak tugul, ak kochortagei keringet kosoptos; onai anyun ole kisas bichu Jehovah.

³¹ Ak kingo kagomwa ng’alechato tugul koges, kobetak ng’ony ye kimi.

³² Ak kiyat ng’ony kutinnyi kolugui ichek, ak bikwak, ak bik tugul che kiga namgei ak Kora, ak tugukwak tugul.

³³ Kirorokyi keringet kosoptos bichoto, ak icheget che kimi tugul: ak kituch ng’ony ichek, ak kilusyo anyun eng’ tuiyet.

³⁴ Ak kimwei Israelik tugul che kimi ole negite ichek ye kingogas kateenywa: amu kile, Si maluguech ng’ony agachek.

³⁵ Ak kimong’une mat Jehovah, ak kibeel bichoto bogol aeng’ ak konom che kiigoitoi nyamdutik che kibeelei.

³⁶ Ak kimwachi Jehovah Musa kolenji,

³⁷ Ilenji Eleasar weritab Aron tisiindet, koisto terenik eng’ mat, ak iwas mat eng’ oloto; amu tililen;

³⁸ terenikab kiptengeginichu, kogoruokyigei kot kobek, ak ingitany kolebelitu si ketuge kaptisisiet: amu kiigoito eng’ taitab Jehovah, tililen anyun amu noto: si koek kaborunet eng’ lagokab Israel.

³⁹ Ak kiib anyun Eleasar terenichoto bo sugunonik, che kiga kogoito icheget che kigibeel; ak kiitany tukchoto si ketuge kaptisisiet:

⁴⁰ si kobiit koek kabwatet eng’ lagokab Israel, si marik toondet ne ma bo oretab Aron nyo kobeel nyamdutik eng’ taitab Jehovah; si maigei Kora, ak tuiyennyi: ko u ye kimwachi Jehovah inendet eng’ Musa.

⁴¹ Ago kiing’unyng’ung’ji Musa ak Aron tuiyet komugul ne bo lagokab Israel eng’ betut ne kiisubi betunoto kole, Koobar bikab Jehovah.

⁴² Ak ye kingo kagoyumgei tuiyet, si kotil let Musa ak Aron, kogeer ole mi emait ne ketuiyechin; ogeero, kituch boldet emainato, ak kitook lilindab Jehovah.

⁴³ Ak kiba Musa ak Aron taitab emait ne kituiyechin.

⁴⁴ Ak kimwachi Jehovah Musa kolenji,

⁴⁵ Oistoegei tuiyoni, si kobiit awong’ ichek ngunoto. Ak kiing’uruk kot kotiiny togennyi ng’ony.

⁴⁶ Ak kilenji Musa Aron, Ib tereng’ung’ ak inde mat ne bunu kaptisisiet teret orit, ak inde nyamdutik baragunnyi, ak iib ichaktae kwo ole mitei tuiyet, si iyachi kagaigaet: amu kagobun neregek Jehovah; kagotoigei koroito.

⁴⁷ Ak kiib Aron terennyi ko u ye kaga mwa Musa; kilabat kwo kwenutab tuiyet; ogeero, kagotoigei koroito eng’ bik: ak kibeel nyamdutik, ak koyachi kagaigaet bik.

⁴⁸ Ak kitonon eng’ kwenutab che kagobek ak che soptos; ak kisis koroito.

⁴⁹ Ak ichek che kibek eng’ koroito ko ki elfusiek taman ak ang’wan ak bogol tisab, che ma kiitito che kibek amu ng’alekab Kora.

⁵⁰ Ak kiweek Aron kwo ole mi Musa agoi kurgetab emait ne kituiyechin: ak kisis koroito.