KAITOSYEK 15 - BUKUIT NE TILIL

Ng’atutik che terotin

¹ Ak king’alalji Jehovah Musa kolenji,

² Mwachi lagokab Israel, ilenji, Ye oit emetab meng’atosiekwok, ne agonok,

³ ak omach ochopchi Jehovah kagochinet ne bunei mat, ngo kagochinet ne kibeelei, anan tiseiywot, si kobiit ogesu kayosiet, anan kagochinet ne bo chamnyet, anan eng’ igorwek che kiging’at, si oyachi Jehovah nyamdutiet ne anyiny, ne bo tuga, anan ko ne bo nego:

⁴ ingogoito anyun inendet ne igoitoi kagochinennyi kogochin Jehovah, kagochinet ne bo busiek ne yamei kebeberta agenge eng’ taman ne bo epah, ne bo busiek che tambululen che kigiburukto mwaita ne yamei kebeberta agenge eng’ ang’wan ne bo hin:

⁵ ak kebeberta agenge eng’ ang’wan ne bo hin ne bo divaik kobunji kagochinet ne kieei; chob choto koboto kagochinet ne kibeelei, anan ko tiseiywot, si kigoito koboto aruet age tugul ne bo kechir.

⁶ Anan ngo mengit, ichob kagochinetab busiek ne yamei kebeberwek aeng’ che bo taman che bo epah che bo busiek che ng’ootin che kigiburukto mwaita ne yamei kebebertab somok ne bo hin:

⁷ ak igoite kagochinet ne kieei ne bo kebebertab somok ne bo hin ne bo divaik, koek nyamdutiet ne anyiny eng’ Jehovah.

⁸ Ak ye ichob kirgit ne ming’in koek kagochinet ne kibeelei, anan ko ne bo tiseiywot, si kobiit igesu kayosiet, anan ko che bo kagochinoikab kalyet eng’ Jehovah:

⁹ ingogoito anyun koboto kirgoto kagochinetab busiek ne yamei kebeberwek somok che bo taman che bo epah che bo busiek che ng’ootin che kigiburukto mwaita ne yamei kebebertab hin.

¹⁰ Ak igoite kebebertab hin ne bo divaik koek kagochinet ne kieei, kobunji kagochinet ne bunei mat, koek nyamdutiet ne anyiny eng’ Jehovah.

¹¹ Kiyachin ko u noto kirgit age tugul, anan mengit age tugul, anan aruet age tugul ne bo kechir ne mengit, anan aruetab ng’oror.

¹² Oyachini age tugul ko u koitenywa, ko u koitet ne ochobe.

¹³ Yaei ko u noto tugul che salu ga, ye igoitoi kagochinet ne bunei mat, kobunji nyamdutiet ne anyiny eng’ Jehovah.

¹⁴ Ak ngo mi kipsagarin kobotok, anan chi age tugul ne mi kobotok eng’ ibinwekwok tugul, ak komach kogoito kagochinet ne bunei mat, kobunji nyamdutiet ne anyiny eng’ Jehovah; ko u ye oyae, koyaei agine ko u noto.

¹⁵ Agenge ng’atutiet ne bo tuiyet eng’ okwek, ak eng’ kipsagarindet ne meng’isiei kobotok, ng’atutiet ne tebyei agoi eng’ ibinwekwok tugul: ko u ole oteptoi eng’ taitab Jehovah, kotebyei ko u noto agine kipsagarindet.

¹⁶ Egu ng’atutiet agenge ak kiruoget agenge eng’ okwek, ak eng’ kipsagarindet ne mi kobotok.

¹⁷ Ak king’alalji Jehovah Musa kolenji,

¹⁸ Mwachi lagokab Israel ilenji, Ye oit emet ne amutok,

¹⁹ koek anyun, ye oam amitwogikab emonoto, ogoitoi kagochinet ne kinamjin barak, kigochin Jehovah.

²⁰ Eng’ makatinikwok che bo tai, ogoitoi makatiat ne ming’in kobunji kagochinet ne kinamjin barak: ko u ye oyae agobo ruanyut ne kiborse, onamjini barak ko u noto.

²¹ Ogochini Jehovah makatiandeng’wong’ ne bo tai koek kagochinet ne kinamjin barak eng’ ibinwekwok tugul.

²² Ak ye olel, amorib ng’atutichu tugul kimwachi Jehovah Musa,

²³ tugul che king’atak Jehovah eng’ Musa, koboch ye kigon Jehovah ng’atutik, agoi ibinwekwok tugul:

²⁴ koek anyun, ngo lel chi, ama konai tuiyet, kogoito anyun tuiyet komugul kirgit ne neran, kobunji kagochinet ne kibeelei, koek nyamdutiet ne anyiny eng’ Jehovah, koboto kagochinennyi ne bo busiek, ak kagochinennyi ne kieei, ko u ng’atutiet, ak kwesta agenge ne bo kagochinet agobo tengekto.

²⁵ Ak koyai tisiindet kagaigaet agobo tuiyet komugul ne bo lagokab Israel, ak kenyochi kaat; amu ko lelutiet, ak kagoget kagochinenywa, kagochinet ne bunei mat ne kigochin Jehovah, ak kagochinenywa ne bo tengekto eng’ taitab Jehovah, amu lelutienywa:

²⁶ ak kenyochi kaat tuiyet komugul ne bo lagokab Israel, ak kipsagarindet ne meng’isiei eng’ kwenunywa, amu kigiyai kioto amengen bik tugul kole nee.

²⁷ Ago ngo lel chi age tugul amaingen, kogoito anyun subendab ng’oror ne masiirei kenyit agenge koek kagochinet agobo tengekto.

²⁸ Ak koyai tisiindet kagaigaet agobo chichoto lelei, ye kayai tengekto amaingen, ingoyai anyun kagaigaet agobo inendet eng’ taitab Jehovah, ak kenyochi kaat.

²⁹ Egu ng’atutiet agenge eng’ okwek ne bo chito ne kalel kiy age tugul amaingen, eng’ inendet ne bo lagokab Israel, ak ne bo kipsagarindet ne meng’isiei eng’ kwenunywa.

³⁰ Ago chito ne yaei kiy age tugul kokwetyin, ngo neng’wong’, anan kipsagarin, ko kachub chichoto Jehovah; ak king’etoi chichoto eng’ bikyik.

³¹ Amu kasas ng’olyotab Jehovah, ak kagobut ng’atutiennyi; king’etoi chichoto kobet, tebe tengektanyi inendet.

³² Ak ye kita komi lagokab Israel ong’atet, konyor chito koyumotin kwenik eng’ betutab sabato.

³³ Ak kiimut bik che kinyoru chichoto koyumi kwenik kwo ole mi Musa ak Aron, agoi ole mi tuiyet komugul.

³⁴ Ak kigerji inendet go, amu kitom kemwa kit ne kiitoi inendet.

³⁵ Ak kilenji Jehovah Musa, Kibarei chichoto iman: ingolach tuiyet komugul eng’ koik eng’ sang’utab nganaset.

³⁶ Ak kiimut tuiyet komugul inendet kwo sang’utab nganaset, ak kolage koik, ak kime; ko u ye king’at Jehovah Musa.

³⁷ Ak king’alalji Jehovah Musa kolenji,

³⁸ Mwachi lagokab Israel ilenji konapchigei tuguk che u sawoik eng’ tabanwekab ngoroikwak, eng’ ibinwekwak tugul, ak kogurmane usit ne tuui ne nyalil, baragutab sawoichoto mi tabanda age tugul:

³⁹ ak egu usinoto, u sawoiyot eng’ okwek ne ogeere ak obwati ng’atutik tugul che bo Jehovah, ak oyai; si mosub kit ne machei mugulelwekwok, ak konyekwok, che kicham osubi oibegei.

⁴⁰ Si kobiit obwat ak oyai ng’atutikyuk tugul, ak oegu che tililen eng’ Kamuktaindeng’wong’.

⁴¹ A Jehovah Kamuktaindeng’wong’, ne kiimoong’wok omong’une emetab Misri, si aek Kamuktaindeng’wong’: a Jehovah Kamuktaindeng’wong’.