KAITOSYEK 14 - BUKUIT NE TILIL

Ng’alekab segeik che kiigochi bik komeiyo mugulelewek

¹ Kiwaach anyun tuiyet komugul koririo, ak kiiteiyo bik kemounoto.

² Ak kiing’unyng’ung’ji lagokab Israel tugul Musa ak Aron; ak kilenji tuiyet komugul ichek, Ki kaigai nda kiga kibekyi emetab Misri! Anan ko nda kiga kibekyi ong’atani!

³ Amu nee si komutwech Jehovah kebwa emoni, si kobiit kebarech eng’ rotwetab chok? Ak koek osotikyok ak lagokyok luulenik: tos ma kaigai keweekyige Misri?

⁴ King’alaljigei anyun ichegei kole, Ongelewen kiptaiyat, si keweige Misri.

⁵ Kiing’urukso ng’ony anyun Musa ak Aron kot kotiiny togochikwak ng’ony, eng’ taitab bik tugul che bo tuiyet komugul ne bo lagokab Israel.

⁶ Ak kibet ngoroikwak Josua weritab Nun ak Kaleb weritab Jepune, che kimi koboto ichek che kiga ba kosegei emet;

⁷ ak king’alalji tuiyet komugul ne bo lagokab Israel kolenji, Kararan mising’ kosiir emonoto kigibunate, kesegei.

⁸ Ngot kobaibai Jehovah eng’ achek, komutech anyun kebe emonoto, ak kogonech; emet ne nyiitat chego ak kumik.

⁹ Ago amongelelji Jehovah, anan oiywei bikab emet; amu u amitwogik eng’ achek; kigeistoe ichek uruetab toretet, ak mi Jehovah kobotech; amoiywei ichek.

¹⁰ Ago kimwa tuiyet komugul kole, kelach ichek eng’ koik. Ak kitook lilindab Jehovah eng’ emait ne kituiyechin, komong’ji lagokab Israel tugul.

Birenywa ak kigochin koombeniot kenyisiek artam eng’ ang’atet

¹¹ Ak kiteebe Jehovah Musa kolenji, Renya bichu kot kotianit? Maiyana agoi au, agot nganda kiayai kaborunoik choto tugul eng’ kwenunywa?

¹² Abare koroito, ak aiste ichek eng’ ane, ak ayain iegu bororiet ne o, ne kim kosiir ichek.

¹³ Ak kilenji anyun Musa Jehovah, Kasei anyun Misrik ng’olyondonito; amu kiimutu bichuto kotogos eng’ kwenunywa eng’ kimnateng’ung’;

¹⁴ yeityo komwachi bikab emonito, Kigogas ichek kole imi inye Jehovah kwenutab bichu; amu i toogu inye Jehovah kimni, ak tonone boldeng’ung’ baragunywa, ak indoe ichek, eng’ toloitab boldet bet, ak eng’ toloitab mat kemoi.

¹⁵ Ngot anyun ibar bichu kibagenge, komwa anyun bororiosiek che kigogas agobo ng’aleguk, kole,

¹⁶ Kigobarji Jehovah bichoto ong’atet amu kima imuch inendet komut ichek koba emet ne kiga koyosiechi.

¹⁷ Asain anyun nguno ale, ingoeet kimnatetab Kiptaiyat, ko u ye kaimwa ile,

¹⁸ Masib konerech Jehovah, ak ko nyiitat rirenet, ne nyochin kaat tengekto ak bistoet, ama nyochin kaat buch kiptengekyot; ago iityin lagok agobo tengektab kwanisiekwak, agoi ibinda ne bo somok ak ne bo ang’wan.

¹⁹ Asain ale, nyochi kaat anyun bichu tengektanywa ko u oindab rireneng’ung’, ak ko u ye kiinyochi kaat bichu koboch Misri agoi kora.

²⁰ Ak kile Jehovah, Kanyochi kaat ko u ng’olyondeng’ung’;

²¹ ago iman, ko u ye asobe, ak ko u ye tun nyiei ng’ony komugul tororindab Jehovah;

²² amu bicho tugul che kigogeer tororindanyu ak kaborunoikyuk, che kiayai eng’ Misri ak eng’ ong’atet, ak kigotiema konyil chu taman, ama epchin it kutinnyu;

²³ mageerei iman emonoto kiayosiechi kwanisiekwak, ama keerei age tugul eng’ ichek che kisasa;

²⁴ kobate kiboitiondennyu Kaleb, amu kitinyei tamirmiriet age, ak kiisuba eng’ kagesunatetab ge, amuti inendet kwo emonoto kigawa; ak kobunji iyotennyi emonoto.

²⁵ Menyei atebwet Amalegik ak Kananik: oweeige mutai, ak obe ong’atet anyun oret ne wendi Nyanjet ne Birir.

²⁶ Kimwachi anyun Jehovah Musa ak Aron, kolenji,

²⁷ Amuitoi eng’ tuiyoni ya ne ing’unyng’ung’jina kot kotianit? Koagas kang’unyng’ung’etab lagokab Israel, che ing’unyng’ung’jina.

²⁸ Ilenji ichek, Kale Jehovah, Ko u ye asobe, ko u ye kaomwawa agas eng’ itikyuk, ayaiywok agane ko u noto;

²⁹ obekyini ong’atani; tugul che kigiit eng’ okwek, ko u koiteng’wong’ komugul, koboch che bo kenyisiek tiptem ak kwo tai, che kigong’unyng’ung’ja,

³⁰ moite emonoto iman, ne kiayosiechige ale agonok omeny oloto, kobate Kaleb weritab Jepune, ak Josua weritab Nun, che itei.

³¹ Ago amuti lagokwok che kiole egu luulenik koba emonoto, si konai ichek emet ne kioesie.

³² Ago okwek, obekyini ong’atani.

³³ Ak koyogisiot lagokwok eng’ ong’atani kenyisiek artam, ak koibot kugoinateng’wong’, agoi kiges muswekwok eng’ ong’atet.

³⁴ Oiboti tengekwogikwok kenyisiek artam ko u koitetab betusiek che kiotar eng’ segeetab emet, eng’ betusiechoto artam, ko betut age tugul ko kenyit, si kobiit onai ye aistoenok kayomisutiennyu.

³⁵ Kaamwa ane Jehovah ale, ayachini chuto tugul tuiyoni ya, ne katila let; igesyingei ong’atani; bekyin oloto.

³⁶ Ak kibek bichoto che kiiyokto Musa koba kosegei emet, che kiweek, che kibwa kogochi bik kong’unyng’ung’ji inendet, amu kiib ng’alek che yaach agobo emonoto;

³⁷ kibek eng’ koroito eng’ taitab Jehovah bichoto kiib ng’alek che yaach agobo emet.

³⁸ Ago king’eet Josua weritab Nun, ak Kaleb weritab Jepune kosopcho, eng’ bik che kiga ba kosegei emet.

Manyor bik boroindo koit Kanan ye kilen kotiem ichegei

³⁹ Ak kimwachi Musa lagokab Israel ng’alechuto tugul; ak kiririo bichoto mising’.

⁴⁰ King’eetyo anyun karon mising’, ak kotogosta agoi tulwet barak, kolen, Kimi yu, kagibe ketogoste ole kigomwa Jehovah: amu kogeyai tengekto.

⁴¹ Ak kilenji Musa, Amu nee si obistoe ng’atutietab Jehovah? Amu magiberuri ng’olyot ne u noto.

⁴² Amat otogoste, amu mami Jehovah kobotok; si mabarak eng’ taitab bunikwok.

⁴³ Amu mi taing’wong’ eng’ oloto Amalegik ak Kananik, ak kibarok eng’ rotwetab chok; amu kioweige let ama osub Jehovah, mami anyun Jehovah kobotok amu noto.

⁴⁴ Ago kima kas it, kiba kinichek agoi tulwet barak, ago kimawa moingetab arorutietab Jehovah eng’ nganaset, ak kimawa Musa agine.

⁴⁵ Kichorgei anyun Amalegik ak Kananik che kimenyei tulwonoto, ak kibar ichek ak kion, agoi koit Horma.