KAITOSYEK 13 - BUKUIT NE TILIL

Kiyoktoi sgeik koba kanam, ak ng’alek che kiibu

¹ Kimwachi Jehovah Musa, kolenji,

² Iyokte murenik koba kosegei emetab Kanan, ne agochini lagokab Israel: oyoktoi chito agenge eng’ oret age tugul ne bo kwanisiekwak, ne age tugul ko kandoindet eng’ ichek.

³ Kiiyokto anyun Musa bichoto eng’ ong’atetab Paran ko u ng’atutietab Jehovah: icheget tugul ko ki bik che eechen eng’ lagokab Israel.

⁴ Ki chu kainaikwak: eng’ oretab Reuben, ko ki Samua weritab Sakur.

⁵ Eng’ oretab Simeon, ko ki Sapat weritab Hori.

⁶ Eng’ oretab Juda, ko ki Kaleb weritab Jepune.

⁷ Eng’ oretab Isakar, ko ki Igal weritab Josep.

⁸ Eng’ oretab Epraim, ko ki Hosea weritab Nun.

⁹ Eng’ oretab Benjamin, ko ki Palti weritab Rapu.

¹⁰ Eng’ oretab Sebulun, ko ki Gadiel weritab Sodi.

¹¹ Eng’ oretab Josep, ne bo oretab Manase, ko ki Gadi weritab Susi.

¹² Eng’ oretab Dan, ko ki Amiel weritab Gemali.

¹³ Eng’ oretab Aser, ko ki Setur weritab Mikael.

¹⁴ Eng’ oretab Naptali, ko ki Nabi weritab Bopsi.

¹⁵ Ak eng’ oretab Gad, ko ki Geuel weritab Maki.

¹⁶ Choto kainaikab murenik che kiiyokto Musa koba kosegei emet. Ak kiguure Musa Hosea weritab Nun, Josua.

¹⁷ Kiiyokto anyun Musa koba kosegei emetab Kanan; kilenji anyun bichoto, Obun oret ne wendi Murot ne bo Tai, otogoste tulonok.

¹⁸ Ak ogeer emet, kit ne u; ak bik che menyei oloto, ngo kimen anan ngo nyalulyotin, ngo ng’ering’ anan ngo chang’;

¹⁹ ak kit ne u emet ne menyei bichoto, ngo kararan anan ngo ya; ak kiye u nganasok che menyei, ngo ma ng’ototin anan ngo tinyei irimoik;

²⁰ ak kit ne u emet, ngo akwai anan ngo kemgem, ngo mi ketik anan ngo mami. Onyiganitu anyun, ak oibu logoekab emonoto. Kimachei korurio sabibuk che bo tai eng’ betusiechoto.

²¹ Kitogosta anyun bichoto, koba kosegei emet, kong’eete ong’atetab Sin agoi Rehob, agoi koit ye kibunei kebendi Hamat.

²² Kiba anyun kotogostae Murot ne bo Tai, ak kiit Hebron; ak kimi oloto Ahiman, Sesai, ak Talmai, lagokab Anok. (Kigiteech Hebron kenyisiek tisab kotom keteech Soan ne mi Misri.)

²³ Ak kiit atebwetab Eskol, ak kitil eng’ oloto temet agenge ne tinyei logoekab sabibuk, ak kiinde ketit si kobiit kotiny kaat bik aeng’; kiib logoek alak agichek, ak logoekab mogoonik.

²⁴ Kigiguure oloto atebwetab Eskol, amu logoek che kitil lagokab Israel eng’ oloto.

²⁵ Ak kingogesgei betusiek artamu koweek eng’ segeetab emet.

²⁶ Kibwa anyun agoi ole mi Musa ak Aron, ak tuiyet komugul ne bo lagokab Israel, eng’ ong’atetab Paran, agoi Kades; ak kiipchi ichek ng’alek, ak tuiyet komugul, ak koborji logoekab emonoto.

²⁷ Ak kimwachi bichoto inendet, kolenji, Kigeit emet ne kiiyoktech kebe, iman nyiitat chego ak kumik; logoekab emonoto chu.

²⁸ Ago kimen bik che menyei emonoto, ak ng’ototin nganasok, ak ko eechen mising’; ak koboto noto, ko kigigeer eng’ oloto lagokab Anak.

²⁹ Menyei Amalegik komostab Murot ne bo Tai; ak komenyei tulonok Hitik, ak Jebusik, ak Amorik; ak komenyei Kananik ngegutab araraita, ak ngegutab Jordan.

³⁰ Kimwachi anyun Kaleb bik kosisyo eng’ taitab Musa, ak kolenji, Ongetogoste nguno, keluul emet; amu kimuchi kiterter.

³¹ Ago kile bik che kiga togosta koba koboto inendet, Magimuchi kebe kebargei ak bichoto; amu kimen kosiirech.

³² Ak kiipchi lagokab Israel ng’alek che yaachen agobo emonoto kiga segei, kolenji, Amei bikyik emonoto kigibun kesegei; ak ko koen mising’ bik tugul che kigigeer eng’ oloto.

³³ Ak kigigeerji oloto Nepilik, werikab Anak, che kibunu Nepilik; ak kigi u talamik ye kingirogege bichoto, ak kigi u noto eng’ tainywa.