KAITOSYEK 12 - BUKUIT NE TILIL

Koamei ng’etkonda Miriam ak Aron agobo Musa

¹ Kichaam anyun Miriam ak Aron Musa amu kobogoriotab Kus ne kiitun; amu kiitun Jepkusiot.

² Ak kile, Tos ng’alali Jehovah ak Musa inegei? Tos ma ng’alalwech agachek? Ak kigas Jehovah ng’alechato.

³ Ago ki chi ne tala mising’ Musa, kosiir bik tugul che kimi ng’ony.

⁴ Ak kilenji Jehovah eng’ yoto Musa, ak Aron, ak Miriam, Omong’u sang’ okwek somogu, obwa emait ne kituiyechin. Ak kimong’ sang’, tugul ko somok.

⁵ Ak kichorgei Jehovah eng’ toloitab boldet, ak kitonone kurgetab Emait, ak kiguur Aron ak Miriam; ak kibwa ichek tuwai.

⁶ Kilenji anyun, Ogas anyun ng’alekyuk: ngo mi maotiot kweng’wong’, aborjinige ane Jehovah eng’ ng’ang’utiet, ang’alaljini eng’ karuotitoet.

⁷ Ma u noto kiboitiondennyu Musa; bo iman inendet eng’ gonnyu komugul.

⁸ King’alaljindosi kimni kotook, ma eng’ kalewenaik; ak kogeerei inendet itondab Jehovah. Kilya anyun si moiywei ochaam kiboitiondennyu Musa?

⁹ Ak kilalyo neregekab Jehovah eng’ ichek; yeityo kwo.

¹⁰ Ak kiwa boldet eng’ Emait: ogeero, kiam mogondosik Miriam, kileelit bortanyi ko u teluchi; ak kigeer Aron Miriam, kotinyei mogondosik.

¹¹ Ak kilenji Aron Musa, Ee, kiptaiyandennyu, asain ale, amat indeech tengekto, amu kageyai eng’ abusnatet, amu kageyai tengekto.

¹² Asain ale, amat koigei inendet ne kagome, ne negit konun bortanyi kotom kesich komong’ eng’ moetab kamet.

¹³ Kirirji anyun Musa Jehovah, kolenji, Ee, Kamuktaindet, asain ale isoob inendet.

¹⁴ Ak kilenji Jehovah Musa, Nda kagang’utyi kwandanyi toget, ko tos kama kolilani betusiek tisab? Ingogerji inendet sang’utab nganaset betusiek tisab, ak ye ibata kimut kogeny konyo ga.

¹⁵ Ak kigigerji anyun Miriam sang’utab nganaset betusiek tisab: ak kima ba bik agoi kimut Miriam kogeny konyo ga.

¹⁶ Ak kingobata noto koba bik eng’ Haserot, koba koteech ong’atetab Paran.