KAITOSYEK 10 - BUKUIT NE TILIL

Boisietab igondisiek che bo feda

¹ Kimwachi Jehovah Musa, kolenji,

² Yachigei igondisiek aeng’ che bo feda; kitanyi, si koboisie tukchoto ye iguure tuiyet, ak eng’ banwekab nganasok.

³ Ak ye kuut ichek tukchoto, koyumjigei tuiyet komugul ole imi, eng’ kurgetab emait ne kituiyechin.

⁴ Ak ngo kuut igondit agenge, koyumjigei anyun ole imi, bounik, kandoikab elfusiekab Israel.

⁵ Ak ye oguut ne bo waagat, kotoi banda anyun nganasok che menyei komostab kong’asis.

⁶ Ak ye oguut ne bo waagatab aeng’, kotoi banda anyun nganasok che menyei komostab murot ne bo tai; kuutei anyun ichek ko u noto ne bo waagat kobunji banwekwak.

⁷ Ago ye machei koyumgei tuiyet, oguut anyun, ago amoguut ne bo waagat.

⁸ Kuutei werikab Aron tisiik igondisiek; ak egu tukchoto ng’atutiet ne bo koigeny eng’ okwek eng’ ibinwekwok tugul.

⁹ Ak ye obendi luget eng’ emeng’wong’, obendi obaregei ak bunyot ne usok, oguut anyun igondisiechoto bo waagat; ak kibwatak eng’ taitab Jehovah Kamuktaindeng’wong’, ak kesoruok eng’ bunikwok.

¹⁰ Ak eng’ betut ne bo kagaseng’wong’ bo ge, ak eng’ igorwekwok che kiging’at, ak ye leeldos arawekwok, oguut anyun igondisiek eng’ baragutab kagochinoikwok che kibeelei, ak eng’ baragutab tiseiywek che bo kagochinoikwok che bo kalyet; ak egu kabwatet eng’ okwek eng’ taitab Kamuktaindeng’wong’: a Jehovah Kamuktaindeng’wong’.

Kobendi eng’ Sinai

¹¹ Ak eng’ kenyit ne bo aeng’, arawetab aeng’, eng’ betut ne bo tiptem ne bo arawanato, ketogostae boldet eng’ gotab baornatet.

¹² Kinam anyun lagokab Israel banwekwak koba eng’ ong’atetab Sinai; ak kitebi boldet eng’ ong’atetab Paran.

¹³ Ak kitoi bandanywa ne bo tai ko u ng’atutietab Jehovah eng’ Musa.

¹⁴ Ak kiindo songolietab nganaset ne bo lagokab Juda ko u lugosiekwak: ak kibou lugennyi Nason weritab Aminadab.

¹⁵ Ak kibou lugetab oret ne bo lagokab Isakar Netanel weritab Suar.

¹⁶ Ak kibou lugetab oret ne bo lagokab Sebulun Eliab weritab Elon.

¹⁷ Ak kigibut got; ak kitoi koba werikab Gerson ak werikab Merari, che kilaei got.

¹⁸ Kitoi banda nganasetab Reuben, kosub songolienywa, ko u lugosiekwak; ak kibou lugennyi Elisur weritab Sedeur.

¹⁹ Ak kibou lugetab oret ne bo lagokab Simeon, Selumiel weritab Surisadai.

²⁰ Ak kibou lugetab oret ne bo lagokab Gad Eliasap weritab Deuel.

²¹ Kitoi anyun koba Kohatik, kolaei got ne bo ole tilil: ak kolaei chun alage got kota kogeni koit chun alak.

²² Ak kitoi banda nganasetab lagokab Epraim, ko u lugosiekwak, kosubi songolienywa: ak kibou lugennyi Elisama weritab Amiud.

²³ Ak kibou lugetab oret ne bo lagokab Manase, Gamaliel weritab Pedasur.

²⁴ Ak kibou lugetab oret ne bo lagokab Benjamin, Abidan weritab Gideoni.

²⁵ Ak kitoi banda nganasetab lagokab Dan, ne kiletu eng’ nganasok tugul, kosub songolienywa, ko u lugosiekwak; ak kibou lugennyi Aieser weritab Amisadai.

²⁶ Ak kibou lugetab oret ne bo lagokab Aser Pagiel weritab Okran.

²⁷ Ak kibou lugetab oret ne bo lagokab Naptali Aira weritab Enan.

²⁸ Ki u noto banwekab lagokab Israel ko u lugosiekwak; ak kiiyaptogei.

Ng’olyot ne kimakyin Musa kabyugoinnyi

²⁹ Ak kilenji Musa Hobab, weritab Reuel Midianindet, kabyugoitab Musa, Kibendi ole kiarorwech Jehovah, kole, Agonok. Ongebe tugul, ak kiyaun ne mie; amu kigomwa ne mie Jehovah agobo Israel.

³⁰ Ak kilenji, Mawendi; ago kaweekyigei emennyu, ole kigisikyina.

³¹ Ak kilenji, Asain ale, amebagachech; amu ingen inye ole machei kotepto meng’otennyo eng’ ong’atet, ak iegu konyekyok.

³² Ak ngot kebe tugul, ko kiy age tugul ne mie ne yaiywech Jehovah, keyaun agachek.

³³ Kitoi banda ne bo betusiek somok anyun ko kong’etye tulwetab Jehovah; ak kiindoe ichek moingetab arorutietab Jehovah bandab betusiek somok, kocheng’jinoti ole imuung’e.

³⁴ Ak kimi baragunywa boldetab Jehovah bet, ye kingotoi banda eng’ nganaset.

³⁵ Ak kingwo tai moinget, kole anyun Musa, Ng’eet, ee, Jehovah, ingoiyesta buniguk; ak ingomwei eng’ taing’ung’ che wechin.

³⁶ Ak kingotonon, kole, Ee Jehovah, weekyige ole mi elfusiek ng’isiat che bo Israel.