KAITOSYEK 1 - BUKUIT NE TILIL

Kiiti ortinwek taman ak agenge

¹ King’alalji Jehovah Musa eng’ ong’atetab Sinai, eng’ emait ne kituiyechin, eng’ betut ne bo tai eng’ arawet ne bo aeng’, eng’ kenyit ne bo aeng’ ngab komong’une emetab Misri, kolenji,

² Iit tuiyet komugul ne bo lagokab Israel, ko u ortinwekwak, ko u gorikab kwanisiekwak, ko u koitetab kainaik muren age tugul, ko u metowekwak;

³ koboch che kigotar kenyisiek tiptem ak kwo tai, tugul che imuchi koba luget eng’ Israel, oiit ak Aron eng’ lugosiekwak.

⁴ Ak mi kobotok chitab oret age tugul; age tugul ne o eng’ gotab kwanisiekyik.

⁵ Chu kainaikab murenik che tonondos kobotok: eng’ oretab Reuben; Elisur weritab Sedeur.

⁶ Eng’ oretab Simeon; Selumiel weritab Surisadai.

⁷ Eng’ oretab Juda; Nason weritab Aminadab.

⁸ Eng’ oretab Isakar; Natanel weritab Suar.

⁹ Eng’ oretab Sebulun; Eliab weritab Helon.

¹⁰ Eng’ lagokab Josep: eng’ che bo Epraim; Elisama weritab Amiud: eng’ che bo Manase; Gamaliel weritab Pedasur.

¹¹ Eng’ oretab Benjamin; Abidan weritab Gideoni.

¹² Eng’ oretab Dan; Aieser weritab Amisadai.

¹³ Eng’ oretab Aser; Pagiel weritab Okran.

¹⁴ Eng’ oretab Gad; Eliasap weritab Deuel.

¹⁵ Eng’ oretab Naptali; Aira weritab Enan.

¹⁶ Chuto che kigiguur eng’ tuiyet, bounik che bo ortinwekab kwanisiekwak; choto che ki metowekab elfusiek che bo Israel.

¹⁷ Kiimut anyun Musa ak Aron murenichoto kagemwa kainaikwak.

¹⁸ Ak kiiyum ichek tuiyet komugul kotuiyo eng’ betut ne bo tai ne bo arawetab aeng’, ak kiibor che salu ko u ortinwekwak, eng’ gorikab kwanisiekwak, ko u kainaik, koboch che bo kenyisiek tiptem ak kwo tai, ko u metowekwak.

¹⁹ Kiit anyun Musa ichek eng’ ong’atetab Sinai ko u ye king’at Jehovah.

²⁰ Ak lagokab Reuben, werit ne bo tai ne bo Israel, ibinwekwak, ko u ortinwekwak, ko u gorikab kwanisiekwak, ko u koitetab kainaik ko u metowekwak, muren age tugul ne bo kenyisiek tiptem ak kwo tai, tugul che kiimuchi koba luget.

²¹ Choto che kigiit eng’ ichek, che bo oretab Reuben, ko ki elfusiek artam ak lo ak bogol mut.

²² Ak eng’ lagokab Simeon, ibinwekwak, ko u ortinwekwak, ko u gorikab kwanisiekwak, choto che kigiit eng’ ichek ko u koitetab kainaik, ko u metewekwak, muren age tugul ne bo kenyisiek tiptem ak kwo tai, tugul che kiimuchi koba luget.

²³ Choto che kigiit eng’ ichek che bo oretab Simeon, ko ki elfusiek konom ak sogol ak bogol somok.

²⁴ Eng’ lagokab Gad, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

²⁵ Choto che kigiit eng’ ichek che bo oretab Gad ko ki elfusiek artam ak mut ak bogol lo ak konom.

²⁶ Eng’ lagokab Juda, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

²⁷ Choto che kigiit eng’ ichek che bo oretab Juda ko ki elfusiek tamanwogik tisab ak ang’wan ak bogol lo.

²⁸ Eng’ lagokab Isakar, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

²⁹ Choto che kigiit eng’ ichek che bo oretab Isakar ko ki elfusiek konom ak ang’wan ak bogol ang’wan.

³⁰ Eng’ lagokab Sebulun, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

³¹ Choto che kigiit eng’ ichek che bo oretab Sebulun, ko ki elfusiek konom ak tisab ak bogol ang’wan.

³² Eng’ lagokab Josep, choto lagokab Epraim, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

³³ Choto che kigiit eng’ ichek che bo oretab Epraim ko ki elfusiek artam ak bogol mut.

³⁴ Eng’ lagokab Manase, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

³⁵ Choto che kigiit eng’ ichek che bo oretab Manase ko ki elfusiek sosom ak aeng’ ak bogol aeng’.

³⁶ Eng’ lagokab Benjamin, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

³⁷ Choto che kigiit eng’ ichek, che bo oretab Benjamin, ko ki elfusiek sosom ak mut ak bogol ang’wan.

³⁸ Eng’ lagokab Dan, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

³⁹ Choto che kigiit eng’ ichek che bo oretab Dan ko ki elfusiek tamanwogik lo ak aeng’ ak bogol tisab.

⁴⁰ Eng’ lagokab Aser, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

⁴¹ Choto che kigiit eng’ ichek, che bo oretab Aser ko ki elfusiek artam ak agenge ak bogol mut.

⁴² Eng’ lagokab Naptali, ibinwekwak, ko u ortinwekwak, ko u gorikab kwanisiekwak, ko u ole te kainaik, koboch che bo kenyisiek tiptem ak kwo tai, tugul che kiimuchi koba luget.

⁴³ Choto che kigiit eng’ ichek che bo oretab Naptali ko ki elfusiek konom ak somok ak bogol ang’wan.

⁴⁴ Chuto ichek che kigiit, che kiit Musa ak Aron koboto bounikab Israel, ki murenik taman ak aeng’, kibunu age tugul gotab kwanisiekyik.

⁴⁵ Kiek anyun tugul che kigiit che bo lagokab Israel ko u korikab kwanisiekwak, koboch che bo kenyisiek tiptem ak kwo tai, tugul che kiimuchi koba luget eng’ Israel,

⁴⁶ kiek tugul che kigiit elfusiek bogol lo ak somok ak bogol mut ak konom.

Lawik

⁴⁷ Ago ma kiitito choto Lawik ko u oretab kwanisiekwak.

⁴⁸ Amu kimwachi Jehovah Musa kolenji,

⁴⁹ Oretab Lawi inegei ne maiiti, amat iitite lagokab Israel;

⁵⁰ ago inde Lawik koboi gotab baornatet, ak tugukyik che mi orit, ak tugukyik tugul: ichek che ibei got, ak tugukyik che mi orit; ak koboisiechi goyoto, ak komeny koyiem got.

⁵¹ Ak ye kimakyin got kwo tai, ko Lawik che butei: ak ye kimachei kitonon got, ko Lawik che lumei: ak kibarei kipsagarindet ne rikyin.

⁵² Ak kiteech lagokab Israel emaisiekwak, chi tugul eng’ nganasennyi, eng’ ole mi songoliennyi, ko u lugosiekwak.

⁵³ Ago menyei Lawik koyiemei gotab baornatet, si manyonji nereknatetab tuiyetab lagokab Israel: ak korib Lawik gotab baornatet.

⁵⁴ Kiyai anyun ko u noto lagokab Israel: kiyai ichek kou ye king’at Jehovah Musa.