JOSHUA 8 - BUKUIT NE TILIL

Kenamei Ai

¹ Ak kimwachi Jehovah Josua kolenji, Meiywei, anan komein mugulelel: imut bik tugul che bo luget, ak ong’eetye otogoste Ai: keero, kande eung’ung’ laitoriatab Ai, koboto bikyik, ak nganasennyi, ak emennyi:

² ak iyachi Ai ak laitoriandennyi kit ne kiiyachi Jeriko ak laitoriandennyi: kobate tugukyik che kiluulei, ak tuga, che oipchinige kobunjok koek barunenik: inde bik koribisyo eng’ ole bo nganaset let.

³ King’eet anyun Josua ak bik tugul che bo luget, koba Ai: ak kilewen Josua bik elfusiek sosom, murenik che kimen che nyigonen, ak koyokto koba kemoi.

⁴ Ak kong’at ichek kolenji, Ogeero, oribistosi otokyinige nganaset, eng’ nganaset ole bo let: amat olooegitu mising’ eng’ nganasanato, ago ochoboge okwek tugul:

⁵ si arikyi nganaset ane ak bik tugul che mi kobota: ak ye mong’ kobokyech, ko u eng’ tai, kemwei eng’ tainywa;

⁶ si komong’ kosubwech, kot kirete eng’ nganaset; amu mwaei kole, Kamweenech, ko u yuginye; kemwei ko u noto eng’ tainywa:

⁷ ak ong’eetye eng’ ribiset; ak onam nganaset: amu indoi Jehovah Kamuktaindeng’wong’ eunekwok.

⁸ Ak ye kaonam nganaset, obeel; oyai ko u ng’olyotab Jehovah: ogeero, kaang’atak.

⁹ Ak kiiyokto Josua ichek koba: ak kiba koribisyo kotebe kwenutab Bet-el ak Ai, komostab cherongo ne bo Ai: ak kiruiyo Josua ole mi bik kemounoto.

¹⁰ Ak king’eet Josua karon mising’ ak koyum bik, ak kotogosta, inendet ak boisiekab Israel, kondoe bik koba Ai.

¹¹ Ak kitogosta bik tugul che bo luget che kimi koboto inendet, ak kiba korikta, koit ole boch nganaset, koba koteekso eng’ murot ne bo katam ne bo Ai: kimi atebwet kwenunnyi ak Ai.

¹² Ak kiimut bik olo bo elfusiek mut, ak konde koribisyo eng’ kwenutab Bet-el ak Ai, eng’ komostab cherongo ne bo nganaset.

¹³ Konde bik anyun kotebi ko u noto, luget tugul ne kimi murot ne bo katam eng’ nganaset, ak bikwak tugul che kiribistos che kimi komostab cherongo ne bo nganaset; ak kiwa Josua kemounoto kot koit kwenutab atebwet.

¹⁴ Ak kingogeer laitoriatab Ai, kochirjiren, kong’eetyo karon inne, ak kimanda bikab nganaset koba kobargei ak Israel, inendet ak bikyik tugul, eng’ sait ne kiga kichob, eng’ ole tokyingei Araba; ago kima nai kole mi bik che ribistos agobo inendet eng’ nganaset let.

¹⁵ Ak kiyaigei Josua ak Israel tugul ko u yo kagiterter eng’ tainywa, ak kimwei kobun oretab ong’atet.

¹⁶ Ak kigiguur bik tugul che kimi nganaset koba koon: ak kion bichoto Josua, ak kigireto ichek kolooegitu eng’ nganaset.

¹⁷ Ak kima komi chi ne king’et eng’ Ai anan ko Bet-el, ne ma wa koon Israel: ak kibagach nganaset ko seng’eng’at, ak koon Israel.

¹⁸ Ak kilenji Jehovah Josua, Tokyi Ai ng’otit ne itinye eng’ eut; amu andoi eung’ung’ nganasanito. Ak kitokyi Josua ng’otit ne kimi eunnyi nganaset.

¹⁹ Ak king’eetyo bichu karibistos kochok eng’ ole karibisye, ak kiruai eng’ yoto ye kingoiito Josua eunnyi, koba kochut nganaset ak konam; ak kobeel nganaset kochokyi.

²⁰ Ak kingogusgong’ bikab Ai, kogeer, ak ogeero, kitogostoi iyetab nganaset kowendi barak, ak kimata kosich kimnatet komwechi komosi anan ko komosi: koweek anyun bichu kamwee kobendi ong’atet, koweekyigei bichu kaonu.

²¹ Ak kingogeer Josua ak Israel tugul kole kagonam nganaset bichu karibistos, ak kogeer kotogostoi iyetab nganaset, koweek anyun, ak kobar bikab Ai.

²² Ak kibwa agichek che kimi nganaset kobargei ak bichoto; kotebe anyun kwenutab Israel, kimi alak komosi, komi alak komosi: ak kibar ichek, kot ko ma ituuch agot agenge eng’ ichek kong’et anan kochilil.

²³ Ak kinam laitoriatab Ai kosobei, ak komutyi Josua.

²⁴ Ak kingo kagoges Israel baretab bik tugul che kimenyei Ai eng’ warenget, eng’ ong’atet ole kione ichek, ak kingo kagobutyo tugul eng’ rotwetab chok kot kogesgei, koweektagei anyun Israel tugul koba Ai, ak koba kobare Ai rotwetab chok.

²⁵ Ak tugul che kiibutyo betunoto, murenik ak kwonyik, ko ki elfusiek taman ak aeng’, choto ko ki bik tugul che bo Ai.

²⁶ Amu ma aruny Josua eunnyi, ne kiga iito koname ng’otit, kot kobar bik tugul che kimenyei Ai koges.

²⁷ Ago kikweri Israel tuga ak barunenikab nganasanato kobunji, ko u ng’olyotab Jehovah ne kiga ng’at Josua.

²⁸ Kobeel anyun Josua Ai, ak koyai koek tulwo kogeny, koek karatia, agoi ra.

²⁹ Ak kiisonginin laitoriatab Ai eng’ ketit kot koimen: ak kingororokta asista kong’at Josua kechoor mustanyi eng’ ketit konyo ng’ony, ak kowirji ole kichutei eng’ kurgetab nganaset, ak korurukyi yoto karurugutiet ne o ne bo koik, agoi ra.

Kigimiti arorutiet eng’ tulwetab Ebal

³⁰ Kiteekyi anyun Josua Jehovah Kamuktaindetab Israel, kaptisisiet eng’ tulwetab Ebal,

³¹ ko u ye king’at Musa otwogindetab Jehovah lagokab Israel, ko u ye kigisir eng’ bukuitab Ng’atutikab Musa, kaptisisietab koik che ma kiwai, che ma wai chi eng’ karna: ak kiigochi eng’ yoto Jehovah kagochinoik che kibeelei, ak kieng’ji kagochinoikab kalyet.

³² Ak kisirji koichato Ng’atutikab Musa, che kisir eng’ taitab lagokab Israel.

³³ Ak kitononso Israel tugul ak boisiekwak, ak kiptainikwak, ak kiruogikwak, eng’ moinget komosi ak komosi eng’ taitab tisiik Lawik, che ibei moingetab arorutietab Jehovah, koboto toondet ak ne kigisikyi ga; kimi kebeber taitab tulwetab Gerisim, komi kebeber taitab tulwetab Ebal; ko u ye kiga ng’at Musa otwogindetab Jehovah, kole kiberuri bikab Israel korok.

³⁴ Ak ye ibata kosoman ng’alek tugul che bo Ng’atutik, kaberuret ak chubisiet, ko u tugul che kigisir eng’ bukuitab Ng’atutik.

³⁵ Mami ng’olyo eng’ ng’alek tugul che king’at Musa ne ma soman Josua eng’ taitab tuiyet tugul ne bo Israel, komi kwonyik, ak lagok, ak toek che kimi kwenunywa.