JOSHUA 6 - BUKUIT NE TILIL

Kenamei Jeriko

¹ (Kiga kiger Jeriko kouuiit amu lagokab Israel: kima komandoi chi, ak ko kima konyonei chi orit.)

² Ak kimwachi Jehovah Josua kolenji, Keero, kande eung’ung’ Jeriko, ak laitoriandennyi, ak murenik che kimen che nyigonen.

³ Ak oyiem nganaset, murenik tugul che bo luget, omuuti nganaset konyil agenge. Iyae ko u noto eng’ betusiek lo.

⁴ Ak koib tisiik tisabu igondisiek tisab che bo kuinoikab mengichik eng’ taitab moinget: ak eng’ betut ne bo tisab oyiem nganaset konyil tisab, koguut tisiik igondisiek.

⁵ Ak ye kagoguut koek keny kuinoichoto, ak ye ogas cheetab igondit, kowaach bik tugul waagat ne o; ak kolul irimetab nganaset kwo ng’ony, ak kwo chi age tugul kotogosta kotoorjigei ye kageer.

⁶ Koguur anyun Josua weritab Nun tisiik kolenji, Oib moingetab arorutiet, ak ingoib tisiik tisabu igondisiek tisab che bo kuinoikab mengichik kondoe moingetab Jehovah.

⁷ Ak kilenji bik, Oba, ak oyiem nganaset, ak ongondoe moingetab Jehovah murenik che kiilaachi karik.

⁸ Ak kiyaak ko u noto, ye kingo kagomwachi Josua bik, koba tisiik tisabu che kiibei igondisiek tisab che bo kuinoikab mengichik kondo eng’ taitab Jehovah, ak koguutei igondisiek: ak kiisub ichek moingetab arorutietab Jehovah.

⁹ Ak kiindoe murenik che kiilaachi karik tisiik che kiguutei igondisiek, ak kiisub bik che kiletu, moinget, koguutoti tisiik igondisiek ak kobendi.

¹⁰ Ak king’at Josua bik kolenji, Amat owaach, anan otwegu, amat komong’une ng’olyo kutiswekwok, kot koit betut ne alenjinok owaach; owaach anyun.

¹¹ Koib anyun moingetab Jehovah komuute nganaset konyil agenge: ak kobwa nganaset, koruiyo.

¹² Ak king’eet Josua karon mising’, ak koib tisiik moingetab Jehovah.

¹³ Ak kiba ko u noto kotugul tisiik tisabu che kiibei igondisiek tisab che bo kuinoikab mengichik, kondoe moingetab Jehovah, ak koguutei igondisiek: ak kiindoe ichek murenik che kiilaachi karik, ak kiisub bik che kiletu moingetab Jehovah, koguutoti tisiik igondisiek ak kobendi.

¹⁴ Kiyiem nganaset betut ne bo aeng’ konyil agenge, ak koweektagei koba nganaset: kiyai ko u noto betusiek lo.

¹⁵ Ak eng’ betut ne bo tisab, kong’eetyo karon inne, ko kairir emet, ak komuut nganaset ko u noto konyil tisab: betut noto kityo ne kiyiem nganaset konyil tisab.

¹⁶ Ak eng’ ne bo tisab, ko kiguutei tisiik igondisiek, kolenji Josua bik, Owaach anyun: amu kagogonok Jehovah nganasani.

¹⁷ Ak kitabanjin Jehovah nganasani, nganaset ak tugul che mi: kobate Rahab chepkugoniondonoto, ne kibagaktoi kosob, inendet ak tugul che mi gonnyi, amu kiuny bik che kigiyogu.

¹⁸ Ago oripge okweget eng’ kiy ne itabanat, si ma ye kaotaban, ko ta onam kogeny; si moyai nganasetab Israel koek ne chubot, ak onyalil.

¹⁹ Ago fedaisiek tugul, ak tahabu tugul, ak tuguk tugul che bo sugunonik, ak che bo karik, ko kigitabanji Jehovah: kiibu choto kobwa ole kigonore tugukab Jehovah.

²⁰ Kowaach anyun bik, ak koguut tisiik igondisiek, ak kingogas bik cheetab igondit, kowaach bik eng’ waagat ne o, ak kolul irimet kobutyi ng’ony, kot kolany bik koba nganaset orit, kwo chi tugul tai kotoorjigei ye kageerei, ak kinam nganaset.

²¹ Ak kibare rotwetab chok tugul che kimi nganaset koges, muren ak kwony, ne ming’in ak ne os, ak tany, ak kechir, ak sigirio.

²² Kolenji Josua bichoto aeng’ che kiga ba kogesgei emet, Oba gotab chepkugoniot, ak omutu komong’ kwonyoto, ak tugul che tinyei, ko u ye kioyosiechi.

²³ Kiba go anyun murenjoto aeng’, segeik, ak komut Rahab komong’, koboto kwandanyi ak kamennyi, ak tupchosiekyik, ak tugul che kitinyei, kiimut komong’ sang’ tilionutikyik tugul agichek; ak kiimut koba kotebe nganasetab Israel sang’.

²⁴ Yeityo kobeel nganaset, koboto tugul che kimi orit: ago kiinde choto ole kigonore tugukab Jehovah, fedaisiek, tahabu, ak tuguk che bo sugunonik, ak che bo karik.

²⁵ Ago kibagach Josua Rahab chepkugoniot kosob, koboto bikab gotab kwandanyi, ak tugul che kitinyei; ak kimeny ak Israel agoi ra; amu kiuny bik che kigiyokto, che kiga iyokto Josua koba kosegei Jeriko.

²⁶ Ak king’at Josua ichek eng’ kayosiet eng’ betusiechoto, kolenji, Chubot eng’ taitab Jehovah chito ne ng’eetei ak koteech nganasani bo Jeriko: lume lumeiywondennyi meetab taitanyi, ak kolumda kurgotikyik eng’ meetab towennyi.

²⁷ Kimi anyun Jehovah koboto Josua; ak kiyom emet komugul kalosunennyi.