JOSHUA 5 - BUKUIT NE TILIL

¹ Ak ye kingogas laitorinik tugul che bo Amorik, che kimi komostab cherongo eng’ Jordan, ak laitorinik tugul che bo Kananik, che ki negite nyanjet, kole kiyai Jehovah beekab Jordan koyaamnyo eng’ taitab lagokab Israel, agoi kelong’u, kobek mugulelwekwak, amata kong’et nyiganatet eng’ ichek, amu lagokab Israel.

Kimuratani bik kogeny

² Kimwachi Jehovah Josua eng’ betusiechoto, kolenji, Yachige rotokab sengwetoik che uuen, ak imuratan kogeny lagokab Israel ne bo aeng’.

³ Ak kiyachigei anyun Josua rotokab sengwetoik, ak koyatita lagokab Israel eng’ tulwet ne kiguure Gibea-aralot.

⁴ Kit ne kiigochi Josua koyatitais ko amu - bik tugul che kimong’une Misri, che ki murenik, che ki murenik tugul che bo luget, ko kibek eng’ ong’atet eng’ oret, ye kingo kagomong’ eng’ Misri.

⁵ Amu kiga kiyatita bik tugul che kimong’une oloto: ago bik tugul che kigisikyi ong’atet eng’ oret ye kimong’u eng’ Misri, ko kitom keyatita.

⁶ Amu kibendat lagokab Israel eng’ kenyisiek artam eng’ ong’atet, agoi kobek bororiet tugul, che ki murenikab luget che kimong’une Misri, amu ma kas it kutitab Jehovah: che kiga koyosiechi Jehovah kole machamjin ichek kogeer emet ne kiga koyosiechi Jehovah kwanisiekwak kole konech, emet ne nyiitat chego ak kumik.

⁷ Kiimuratan Josua lagokwak, che kiing’eet kogeer ichek: amu kitom kimuratan ichek, amu kima kimuratan eng’ oret.

⁸ Ak ye kingo kagimuratan bororiet tugul, kotebe komoswekwak eng’ nganaset, agoi kosopcho.

⁹ Ak kimwachi Jehovah Josua kolenji, Kamilde rani aistaenok tewernatetab Misri. Kigiguure anyun yoto Gilgal agoi ra.

Keyaei paska

¹⁰ Ak kiteech lagokab Israel emaisiekwak eng’ Gilgal; ak kiyai paska koskoleny eng’ betutab taman ak ang’wan ne bo arawet eng’ warengetab Jeriko.

¹¹ Ak kiam bek che bo kenyit ne kigosiirto che bo emonoto eng’ betut ne kiisubi paska, makatinik che ma kinde mermerek ak bek che kagigel, betunoto.

¹² Ak kiigesgei mana eng’ betut ne kiisubi noto, kingo kagoam bekab emonoto che bo kenyit ne kigosiirto; amata konyor kogeny lagokab Israel mana; ago kiam eng’ kenyinoto amitwogikab emetab Kanan.

¹³ Ak ye ki negite Josua Jeriko, kotobendo ak kogeer, ogeero, kitononi chito ko katokyingei inendet kotinyei rotwennyi bo chok eng’ eunnyi ne kaging’us: ak kiwa Josua ole mitei inendet, kwo kolenji, I nenyo, anan i bo bunikyok?

¹⁴ Ak kile, Achicha; kanyo nguno aegu kiptaiyatab lugetab Jehovah. Ak kiing’uruk Josua kot koit ng’ony togennyi, ak kolos, ak kolenji, Mwachin nee kiptaiyandennyu otwogindennyi?

¹⁵ Ak kimwachi kiptaiyatab lugetab Jehovah Josua kolenji, Icheru kweoniguk eng’ kelyeguk; amu tilil yo itonone. Ak kiyai Josua ko u noto.