JOSHUA 4 - BUKUIT NE TILIL

Kiruruchi koik che bo kabwatet

¹ Ak kingo kagolanda bororiet tugul eng’ Jordan, kong’alalji Jehovah Josua kolenji,

² Olewen anyun murenik taman ak aeng’ eng’ bik, chito agenge eng’ oret age tugul

³ ak ong’at ichek olenji, Okwei koik taman ak aeng’ eng’ kwenutab Jordan, ole katononie kelyekab tisiik, ak oib onde ng’ony eng’ ole omuung’e, ole oruitosi kemouni.

⁴ Koguur anyun Josua bichoto taman ak aeng’, che kiga kochob eng’ lagokab Israel chito agenge eng’ oret age tugul:

⁵ ak kolenji Josua, Oba ondoe moingetab Jehovah Kamuktaindeng’wong’, kot oit kwenutab Jordan, ak koib chi age tugul eng’ okwek koita eng’ tigikyennyi, che te koitetab ortinwekab lagokab Israel:

⁶ si kobiit koek nito kaborunet eng’ kwenung’wong’, si ye tun teebenak lagokwok eng’ betusiek che bwanei kole, Iboru nee koichu?

⁷ Olenji anyun, Amu kipcheigei beekab Jordan eng’ taitab moingetab arorutiet ne bo Jehovah: ye kilong’une moingonoto Jordan, kotononso beekab Jordan kototen: koek koichu anyun kabwatet eng’ lagokab Israel koigeny.

⁸ Ak kiyai lagokab Israel ko u ye king’at Josua, ak kokwei koik taman ak aeng’ eng’ kwenutab Jordan, ko u che kimwachi Jehovah Josua, che te koitetab ortinwekab lagokab Israel; ak kiib kot koit ole kiba koruiyo, ak konde ng’ony eng’ oloto.

⁹ Ak kiiruruch Josua koichato taman ak aeng’ eng’ kwenutab Jordan, eng’ ole kitonone kalyekab tisiik che kiibei moingetab arorutiet: ak mi oloto, agoi kora.

¹⁰ Amu kitonone kwenutab Jordan tisiik che kiibei moinget, agoi kobata tuguk tugul che king’at Jehovah Josua komwachi bik, ko u tugul che king’at Musa Josua: ak kiigirgir bik kolanda.

¹¹ Ak kingo kagolanda bik tugul kogestagei, kolanda moingetab Jehovah anyun, koboto tisiik, kogeerei bik.

¹² Kilanda lagokab Reuben ak lagokab Gad, ak kebebertab oretab Manase, kolaachi karik, kondoe lagokab Israel, ko u ye kimwachi Musa ichek:

¹³ ki olo bo elfusiek artam bik che kilanda eng’ taitab Jehovah, che kilaachi karik che kiga kochobok agobo luget, agoi warengetab Jeriko.

¹⁴ Kiitoror Jehovah Josua eng’ betunoto eng’ taitab Israel tugul; ak kiiywei inendet, ko u ye kiiywei Musa, eng’ betusiek tugul che bo sobennyi.

¹⁵ Ak king’alalji Jehovah Josua kolenji,

¹⁶ Ng’at tisiik che ibei moingetab baornatet, kotogos eng’ Jordan.

¹⁷ Kong’at anyun Josua tisiik kolenji, Otogosu eng’ Jordan.

¹⁸ Ak kingotogos tisiik che kiibei moingetab arorutietab Jehovah eng’ Jordan, ak ye kingotiech tisiik emet ne yaamat, kowekyigei beekab Jordan komostanywa, ak kosiir ngegusiekyik tugul ko u eng’ tai.

¹⁹ Ak kitogos bik eng’ Jordan eng’ betutab taman ne bo arawetab tai, ak kiteech emaisiek eng’ Gilgal, ole bo kiwotetab Jeriko ne tokyingei kong’asis.

²⁰ Ak kiiruruch Josua koichato taman ak aeng’ eng’ Gilgal, choto che kiibune Jordan.

²¹ Ak king’alalji lagokab Israel kolenji, Ye tun teebe lagokwok kwanisiekwak eng’ betusiek che bwanei, kolenji, Iboru nee koichu?

²² Oborji anyun lagokwok konai, olenji, Kilong’une Israel Jordanini ko kagoyaam.

²³ Amu kiyai Jehovah Kamuktaindeng’wong’ Nyanjet ne Birir, ne kiyai koyaam eng’ tainnyo, agoi kelong’u:

²⁴ si kobiit konai bik tugul che bo ng’ony eutab Jehovah, kole kim; si kobiit koiywei Jehovah Kamuktaindeng’wong’ koigeny.