JOSHUA 3 - BUKUIT NE TILIL

Kolandoi eng’ Jordan

¹ Kong’eet anyun Josua karon mising’, ak kiba eng’ Sitim, agoi koit Jordan, inendet ak lagokab Israel tugul; ak kiruiyo yoto kotom kolanda.

² Kingobata betusiek somogu, koba kiptainik kobun kwenuteb nganaset;

³ ak kong’at bik, kolenji, Ye ogeer moingetab arorutietab Jehovah Kamuktaindeng’wong’, ak tisiik Lawik koibei, ong’eetye anyun eng’ ole omi, ak osub.

⁴ Ago oloochine ak moinget eng’ kakwautik elfusiek aeng’ che bo eut: amorikyi moinget, si kobiit onai oret ne nyoljinok obun; amu tom obune orani.

⁵ Kilenji Josua bik, Oanyinyge: amu yaei Jehovah kwong’utik mutai eng’ kwenung’wong’.

⁶ Ak king’alalji Josua tisiik kolenji, Oganab moingetab arorutiet, ak oib olande ondoe bik. Koib anyun moingetab arorutiet, ak koba kondoe bik.

⁷ Ak kilenji Jehovah Josua, Atau rani atororin eng’ taitab Israel tugul, si kobiit konai kole, ko u ye kiami koboto Musa, ami koboten ko u noto.

⁸ Ak ing’at tisiik che ibei moingetab arorutiet, ilenji, Ye oit ngegutab beekab Jordan, otononse eng’ Jordan.

⁹ Yeityo kolenji Josua lagokab Israel, Obwa yu, ogas ng’alekab Jehovah Kamuktaindeng’wong’.

¹⁰ Kole anyun Josua, Onae eng’ ni ole, mi kwenung’wong’ Kamuktaindet ne sobei, ak onei inendet Kanamik eng’ taing’wong’ matiny, ak Hitik, Hibik, Perisik, Girgasik, Amorik, ak Jebusik.

¹¹ Ogeero, chorjingei Jordan moingetab arorutietab Kiptaiyat ne bo ng’ony komugul, kondoenak kolandoi.

¹² Noto anyun olewen bik taman ak aeng’ eng’ ortinwekab Israel, chito agenge eng’ oret age tugul.

¹³ Ak ye tononie kelyekab tisiik che ibei moingetab Jehovah, Kiptaiatab ng’ony komugul, beekab Jordan, kopcheigei anyun beekab Jordan, ak kotononso beek che bunu meto kototen.

¹⁴ Ak ye kingong’eetyo bik eng’ emaisiekwak, koba kolandae Jordan, kondoe tisiik che ibei moingetab arorutiet;

¹⁵ ak ye kingoit Jordan che kiibei moingonoto, ak kingotiech che ibei moingonoto tabandab beek, (amu nyiiei beek ainetab Jordan kot kosiir ngegusiekyik tugul eng’ betusiek tugul che bo kesisiet,)

¹⁶ kotononso anyun beek che bunu meto koba barak, kototen eng’ ole loo, eng’ Adam, nganaset ne negite Saretan: ak beek che kichortagei koba araraitab Araba, noto ko Araraita ne bo Munyuk, ko kiigestagei: kolanda anyun bik kolong’ji ole tokyingei Jeriko.

¹⁷ Ak kitononso tisiik che kiibei moingetab arorutietab Jehovah eng’ ole yaamat eng’ kwenutab Jordan, ak kilanda Israel tugul eng’ ole yaamat, kot kolanda bororiet tugul eng’ Jordan kogestagei.