JOSHUA 24 - BUKUIT NE TILIL

Ng’alek che bo let che kimwae Josua saisere

¹ Kiiyum anyun Josua bororiosiek tugul che bo Israel koba Sekem, ak kiguur boisiekab Israel, ak bounikwak, ak kiruogikwak, ak kiptainikwak; ak kitononso eng’ taitab Kamuktaindet.

² Ak kilenji Josua bik tugul, Kamwa ko u ni Jehovah Kamuktaindetab Israel, kole, Kimenyei kwanisiekwok keny Ainet bitonin, Tera, kwandab Abraham, ak ko kwandab Nahor: ak kiotei kanamonik.

³ Kiamutu kwandang’wong’ Abraham eng’ Ainet bitonin, ak amutate eng’ emet tugul ne bo Kanan, ak ates iyotennyi, ak agochi Isak.

⁴ Ak kiagochi Isak Jakobo ak Esau: ak kiagochi Esau tulwetab Seir, kobunji: ak kirekto Jakobo ak lagokyik koba Misri.

⁵ Ak kiayokte Musa ak Aron, ak abire Misri korotwek, ko u kit ne kiayai eng’ kwenunywa: ak ye ibata amutwak omong’u.

⁶ Kiamutu kwanisiekwok komong’une Misri: ak kiobwa agoi nyanjet; ak kion Misrik kwanisiekwok eng’ karisiek ak bik che lanyei mbartanyisiek kot koit Nyanjet ne Birir.

⁷ Ak kingorirji Jehovah, konde mesundeito kwenung’wong’ ak Misrik, ak koib nyanjet komaluuch ichek ak kotuch; ak kigeer konyekwok kit ne kiayai eng’ Misri: ak kiomeny ong’atet betusiek che chang’.

⁸ Ak kiamutwok oitu emetab Amorik, che kimenyei Jordan bitonin; ak kiyai luget ak okwek: ak kiande icheget eunekwok; ak kionam emenywa kobunujok; ak kiabar ichek eng’ taing’wong’.

⁹ King’eet anyun Balak weritab Sipor, laitoriatab Moab, ak kobargei ak Israel; ak kiiyokto keguur Balaam weritab Beor konyo kochubok:

¹⁰ ago ma acham agas ng’alekab Balaam; eng’ noto anyun, nganda ki u noto, ko kiiberurok; kiasoruok anyun eng’ eunnyi.

¹¹ Ak kiolong’une Jordan, obwa Jeriko: ak kiyai luget ak okwek bikab Jeriko, Amorik, Perisik, Kananik, Hitik, Girgasik, Hibik, ak Jebusik; ak kiande ichek eunekwok.

¹² Ak kiayokte karamiet kondoenak, ne kion ichek eng’ taing’wong’, laitorinichato aeng’ bo Amorik; ma eng’ rotweng’ung’ bo chok, anan kwangeng’ung’.

¹³ Ak kiagonok emet ne kima oyae kiy, nganasok che kima oteeche, ak omeny; oame che bo mbarenikab sabibuk ak che bo emitik che kima omine.

¹⁴ Oiywei anyun Jehovah, ak oboisiechi inendet eng’ muguleldo ne matinyei kenisiet ak eng’ imanit: ak oiste kanamonik che kiotei kwanisiekwok eng’ Ainet bitonin, ak eng’ Misri; ak oboisiechi Jehovah.

¹⁵ Ak ngot ogeere ko ya oboisiechini Jehovah, olewen rani ne oboisiechini; ngo kanamonik che kiotei kwanisiekwok eng’ Ainet bitonin, anan kanamonikab Amorik, che omenye emenywa: ago aboisiechini ane Jehovah, koboto gonnyu.

¹⁶ Ak kiwol bichoto kole, Ingolooit eng’ achek kebagakte Jehovah ak keot kanamonik;

¹⁷ amu Jehovah Kamuktaindennyo, inendet ne kiimutwech ak kwanisiekyok kemong’une emetab Misri, eng’ gotab otwognatet, ak ko inendet ne kiyai kaborunoichu ki eechen eng’ tainnyo, ak koribonwech eng’ oret tugul ne kigibunu, ak eng’ kwenutab bik tugul che kigibunu kwenunywa:

¹⁸ ak kion Jehovah bik tugul koba eng’ tainnyo, Amorik che kimenyei emonito: noto anyun kiboisiechini Jehovah agachek; amu inendet ko Kamuktaindennyo.

¹⁹ Ak kilenji Josua bik, Momuchi oboisiechi Jehovah; amu inendet ko Kamuktaindet ne tilil; inendet ko Kamuktaindet ne amei ng’etkong’; manyoiywok kaat bistoeng’wong’ anan ko tengekwogikwok.

²⁰ Ngot omete Jehovah ak oot kanamonik che too, koweeksei anyun ak koyaiywok ne ya, ak kogeswok, ago kiga koyaiywok ne mie.

²¹ Ak kilenji bik Josua, Achicha; kiboisiechini Jehovah.

²² Ak kilenji Josua bik, O baorinik che obaorianjinige ole kaolewen Jehovah, oboisiechi inendet. Ak kimwa kole, Ki baorinik.

²³ Ara anyun, oiste kanamonik che too che mi kwenung’wong’, ak otokyi mugulelwekwok Jehovah Kamuktaindetab israel.

²⁴ Ak kilenji bik Josua, Kiboisiechini Jehovah Kamuktaindennyo, ak kegas it kutinnyi.

²⁵ Koyomisgei Josua anyun ak bichoto betunoto, ak koyachi ng’atutiet ak kayomisutiet eng’ Sekem.

²⁶ Ak kisir ng’alechuto Josua eng’ bukuitab Ng’atutikab Kamuktaindet; ak kiinem koita ne o, ak konde kotonon eng’ ketit kel ne kimi ye bo ole tilil ne bo Jehovah.

²⁷ Ak kimwachi Josua bik tugul kolenji, Ogeero, egu koi baoriat agobo achek; amu kagogas ng’alek tugul che bo Jehovah che kimwawech: egu anyun baoriat agobo okwek, si moesie Kamuktaindeng’wong’.

²⁸ Kilenji anyun Josua bik koba, kwo chi tugul oldab borotennyi.

²⁹ Ak kingobata tuguchuto, kome Josua weritab Nun otwogindetab Jehovah, ko bo kenyisiek bogol ak taman.

³⁰ Ak kitub ichek inendet eng’ kiwotetab borotennyi eng’ Timnat-sera, ne mi emetab tulonok ne bo Epraim, eng’ murot ne bo katam ne bo tulwetab Gaas.

³¹ Ak kiboisiechi Israel Jehovah eng’ betusiek tugul che bo Josua, ak eng’ betusiek tugul che bo boisiek che kita komi ko kagome Josua, che kiingen boisiet tugul ne bo Jehovah, ne kiga koyai agobo Israel.

³² Ak kitub ichek kowekab Josep eng’ Sekem, che kiibu lagokab Israel eng’ Misri, eng’ kebebertab emet ne kiga al Jakobo eng’ werikab Hamor kwandab Sekem eng’ fedaisiek bogol: ak kiek choto borotetab lagokab Josep.

³³ Ak kime agine Eleasar weritab Aron; ak kitub ichek inendet eng’ tulwetab Pineas werinnyi, ne kiga kigochi inendet eng’ emetab tulonok ne bo Epraim.