JOSHUA 22 - BUKUIT NE TILIL

Luget ne kinegit kobiit eng

¹ Kiguur anyun Josua bikab Reuben, ak che bo Gad, ak kebebertab bororietab Manase,

² ak kolenji ichek, Kiorib tuguk tugul che king’atak Musa otwogindetab Jehovah, ak kiogas it kutinnyu eng’ tugul che kiang’atak:

³ ma obagakte tupchosiekwok eng’ betusiechu chang’, agoi betuni, ago kiorib kayomisetab ng’atutietab Jehovah Kamuktaindeng’wong’.

⁴ Ak kagogochi Jehovah Kamuktaindeng’wong’ tupchosiekwok kamuung’et nguno, ko u ye kimwachi: oweeige anyun nguno ak obe emaisiekwok, agoi emet ne kibunjok, ne kigonok Musa otwogindetab Jehovah eng’ Jordan bitonin.

⁵ Ago oripge mising’ oyai kayomisutiet ak ng’atutiet, che king’atak Musa otwogindetab Jehovah, ocham Jehovah Kamuktaindeng’wong’, ak obendate ortinwekyik tugul ak orib ng’atutikyik, ak onamge ak inendet ak oot inendet eng’ mugulelwekwok tugul ak sobonwekwok tugul.

⁶ Koberur anyun Josua ichek, ak kolenji koba: ak kiba emaisiekwak.

⁷ Kiga kogochi Musa kebebertab bororietab Manase borotet eng’ Basan: ak kiigochi Josua kebeberta age ne bo bororionoto borotet eng’ kwenutab tupchosiekwak eng’ Jordan bitonin ole tokyingei cherongo. Ak kingomachei Josua komwachi ichek koba emaisiekwak, koberur,

⁸ ak kong’alalji kolenji, Oweeige emaisiekwok ak magornatet ne o, ak tuga che chang’, ak feda, ak tahabu, ak sugunonik ak karik, ak ngoroik che chang’ mising’: opchei barunenichuto ki bo bunikwok, koboto tupchosiekwok.

Luget ne kinegit kobiit eng’ kwenunywa

⁹ Ak kiweek lagokab Reuben ak lagokab Gad ak kebebertab bororietab Manase, koba eng’ ole mi lagokab Israel komanda eng’ Silo, ne mi emetab Kanan, koba emetab Gilead, emet ne nenywa, ne kiga konam kobunji, ko u ng’atutietab Jehovah eng’ eutab Musa.

¹⁰ Ak kingoit emet ne negit Jordan, ne mi emetab Kanan, lagokab Reuben ak lagokab Gad ak kebebertab bororietab Manase, koteech eng’ oloto kaptisisiet ye bo Jordan, kaptisisiet ne o ne toogu.

¹¹ Ak kigas lagokab Israel kemwaei kelen, Ogeero, kogoteech kaptisisiet lagokab Reuben ak lagokab Gad ak kebebertab bororietab Manase eng’ taitab emetab Kanan, eng’ koret ne negit Jordan, eng’ komosta ne bo lagokab Israel.

¹² Ak ye kingogas lagokab Israel kioto, koyumgei tuiyet komugul ne bo lagokab Israel eng’ Silo, kole koba kobargei ak bichoto.

¹³ Ak kiiyokto lagokab Israel Pineas, weritab Eleasar tisiindet, kwo ole mi lagokab Reuben, ak lagokab Gad, ak kebebertab bororietab Manase, koba emetab Gilead;

¹⁴ ak kimi koboto inendet bounik tamanu, bounindet agenge ko kibunu gotab kwanisiek eng’ bororietab age tugul ne bo bororiosiekab Israel; ak age tugul ko ki ne o eng’ gotab kwanisiekwak eng’ elfusiekab Israel.

¹⁵ Ak kibwa ole mi lagokab Reuben, ak lagokab Gad, ak kebebertab bororietab Manase, eng’ emetab Gilead, ak kong’alalji kolenji,

¹⁶ Kamwa ko u ni tuiyet komugul ne bo Jehovah, Nee chalwogi kooyachi Kamuktaindetab Israel, kot omaste rani eng’ kasubet ne osubi Jehovah amu kooteekyigei kaptisisiet, ongelelji Jehovah rani?

¹⁷ Tos mayamech tengektab Peor, ne tomo kitililge eng’ tengegoto agoi ra, nganda kinyonji koroito tuiyetab Jehovah,

¹⁸ kot omaste rani eng’ kasubet ne osubi Jehovah? Ak amu kaongelelji Jehovah rani, ko mutai konerekyi inendet tuiyet komugul ne bo Israel.

¹⁹ Ago, ngo maianyinyat emet ne neng’wong’, olande emet ne bo Jehovah, ole menyei gotab Jehovah, ak obwa onam emet eng’ kwenunnyo kobunjok: ago amat ongelelji Jehovah, anan ongeleljech, oteekyigei kaptisisiet age ne ma kaptisisietab Jehovah Kamuktaindennyo.

²⁰ Kima yai Akan weritab Sera chalwokto eng’ kit ne ki itabanat, ak kobutyi neregek tuiyet komugul ne bo Israel? Ak kima lus chichoto inegei eng’ tengektanyi.

²¹ Kiwol anyun lagokab Reuben ak lagokab Gad ak kebebertab bororietab Manase, kong’alalji kandoikab elfusekab Israel, kolenji,

²² Ingen Jehovah, Kamuktaindet ne bou cheptalelisiek, Jehovah, Kamuktaindet ne bou cheptalelisiek, ak ta konaei Israel agine; ngot ko eng’ ngelelnatet, anan ngot ko eng’ kachililutiet ne kagichililji Jehovah, (ko mat isoruech rani,)

²³ keteekyige kaptisisiet kemaste eng’ kasubet ne kisubi Jehovah; anan ngot kemache kigoite kagochinet ne kibeelei, anan ngot ko kagochinetab busiek, anan ngot kigoite korosekab kagochinoik che bo kalyet, ko ingoyaakta Jehovah inegei;

²⁴ anan ngot ko kigiyai kii eng’ ribetab ge, agobo kiy, kele, Manai chi ngot ko tun ng’alaljin lagokwok lagokyok eng’ betusiek che bwanei, kole, Oting’ege nee ak Jehovah Kamuktaindetab Israel?

²⁵ Amu kiyai Jehovah Jordan koek kiwotennyo ak okwek, okwek lagokab Reuben ak lagokab Gad; motinye kebeberta eng’ Jehovah; koyai anyun lagokwok lagokyok kobagakta kaiyweet ne iywei Jehovah.

²⁶ Noto anyun ko kogimwa kele, Ongechoboge keteekyige kaptisisiet, ne ma bo kagochinoik che kibeelei, anan ko tiseiywek:

²⁷ ago si koek baornatet eng’ kwenunnyo, achek ak okwek, ak kwenutab ibinwek che biitu let eng’ achek, si kobiit keyai boisietab Jehovah eng’ tainnyi eng’ kagochinoikyok che kibeelei, ak eng’ tiseiywekyok, ak eng’ kagochinoikyok che bo kalyet; si matun lenji lagokwok lagokyok eng’ betusiek che bwanei, Motinye kebeberta eng’ Jehovah.

²⁸ Ko kigimwa anyun kele, Ye tun kamwawech ko u noto anan komwachi ibinwekyok eng’ betusiek che bwanei, kemwa anyun kele, Ogeer kergeindab kaptisisietab Jehovah, ne kiyai kwanisiekyok, ne ma bo kagochinoik che kibeelei, ama bo tiseiywek, ago baornatet eng’ kwenunnyo achek ak okwek.

²⁹ Ingolooit eng’ achek ama kingelelji Jehovah, ama kimaste rani eng’ kasubet ne kisubi jehovah, kot keteech kaptisisiet ne bo kagochinoik che kibeelei, ak ko bo kagochinoikab busiek, anan ko ne bo tiseiywek, age ne ma kaptisisietab Jehovah, Kamuktaindennyo ne mi taitab gonnyi.

³⁰ Ak kingogas Pineas tisiindet, ak bounikab tuiyet, ak kandoikab elfusiekab Israel che kimi koboto inendet, ng’alek che kimwa lagokab Reuben ak lagokab Gad, ak lagokab Manase, kobaibai ichek mising’.

³¹ Ak kilenji Pineas weritab Eleasar tisiindet lagokab Reuben ak lagokab Gad, ak lagokab Manase, Kaginai rani kele mi Jehovah kwenunnyo, amu mata ochalwogenji Jehovah eng’ kiito: kaosoru anyun lagokab Israel eng’ eutab Jehovah.

³² Ak kiweek Pineas weritab Eleasar tisiindet, koboto bounik, eng’ ole mi lagokab Reuben, ak lagokab Gad, koba eng’ Gilead, agoi emetab Kanan, ole mi lagokab Israel, koipchi ichek ng’alek kogeny.

³³ Ak kiibaibai kioto lagokab Israel; ak kiilos lagokab Israel Kamuktaindet, amata komwa kogeny kole koba kobargei ak ichek, kong’em emet ne kimenyei lagokab Reuben ak lagokab Gad.

³⁴ Ak kiguure lagokab Reuben ak lagokab Gad kaptisisionoto, Ed: amu, kile, nito ko baornatet eng’ kwenunnyo ne kagimwa kele Jehovah ko Kamuktaindet.