JOSHUA 20 - BUKUIT NE TILIL

Keleweni nganasok lo ole kimwechin

¹ King’alalji Jehovah Josua kolenji,

² Mwachi lagokab Israel ilenji, Otaban nganasok che kimwechin, che kiamwawok eng’ Musa:

³ si kobiit komwechi rumindet ne kalelso, ko ma nai: ak koek eng’ okwek ole kimwechin eng’ ne yaaktoi korotik.

⁴ Ak mwechin age eng’ nganasochoto, ak kotonone ye kibunei kebendi orit eng’ kurgetab nganaset, ak komwa ng’alekyik kogas boisiekab nganasanato; ak komut kwo nganaset orit ole mi icheget, ak kogochi ui, si kobiit komeny kwenunywa.

⁵ Ak ngot koon inendet ne yaaktoi korotik, ko maigoitoi rumindonoto kwo eunekyik; amu kibar chitab kokwennyi eng’ lelet, ak kima kowechei inendet eng’ tai.

⁶ Ak komeny nganasanato, agoi kwo kotonon eng’ taitab tuiyet si kiruokyi, kot kome tisiindet ne o ne mi eng’ betusiechoto: koweektagei anyun rumindonoto, kwo nganasennyi agoi gonnyi, agoi nganaset ne kimweune.

⁷ Ak kiitaban Kedes eng’ Galili eng’ emetab tulonok ne bo Naptali, ak Sekem eng’ emetab tolonok ne bo Epraim, ak Kiriat-arba (noto ko Hebron) eng’ emetab tulonok ne bo Juda.

⁸ Ak eng’ Jordan bitonin eng’ Jeriko, ne tokyingei kong’asis, ko kiitaban Beser eng’ ong’atet eng’ warengetab bororietab Reuben, ak Ramot eng’ Gilead eng’ bororietab Gad, ak Golan eng’ Basan eng’ bororietab Manase.

⁹ Chuto ko ki nganasok che kigitabanji lagok tugul che bo Israel, ak che bo bunotyot ne menyei kwenunywa, si komwechi oloto chito age tugul ne kabar chi ama nai, si mame eng’ eutab ne yaaktoi korotik, kot kotonon eng’ taitab tuiyet.